Hesekiele

20 Ka letšatši la lesome, la kgwedi ya bohlano, ka ngwaga wa bošupa, ba bangwe ba banna ba bagolo ba Isiraele ba ile ba tla ba dula pele ga ka e le gore ba tle ba botšiše ka Jehofa. 2 Ke moka Jehofa a bolela le nna a re: 3 “Morwa wa motho, botša banna ba bagolo ba Isiraele o re: ‘Mmuši Morena Jehofa o re: “Na le tlile go botšiša ka nna? ‘Ke ikana ka nna Modimo yo a phelago gore nka se le arabe,’ o realo Mmuši Morena Jehofa.”’

4 “Na o itokišeleditše go ba ahlola? Na o itokišeleditše go ba ahlola wena morwa wa motho? Ba botše dilo tše di šišimišago tšeo borakgolokhukhu ba bona ba di dirilego. 5 O ba botše o re: ‘Mmuši Morena Jehofa o re: “Letšatšing leo ke kgethilego Isiraele ke ile ka ikana le go bana ba Jakobo gomme ka dira gore ba ntsebe nageng ya Egepeta. Ke ile ka ikana go bona ka re: ‘Ke nna Jehofa Modimo wa lena.’ 6 Letšatšing leo ke ile ka ikana gore ke tla ba ntšha nageng ya Egepeta ka ba iša nageng yeo ke ba nyaketšego yona, e lego naga yeo e elago maswi le todi ya dinose. Naga yeo e be e le botse go phala dinaga ka moka. 7 Ka re go bona: ‘Yo mongwe le yo mongwe wa lena a a lahle dilo tše di šišimišago tšeo di lego pele ga gagwe gomme le se ke la itšhilafatša ka medingwana ya Egepeta yeo e šišimišago. Ke nna Jehofa Modimo wa lena.’

8 “‘“Eupša ba ile ba ntlhanogela ba se nyake go ntheetša. Ba ile ba se lahle dilo tše di šišimišago tšeo di bego di le pele ga bona gomme ba se tlogele go rapela medingwana e šišimišago ya Egepeta. Ke ile ka ba botša gore ke tlo ba galefela ka ba ka ntšhetša bogale bja ka ka moka go bona ba le nageng ya Egepeta. 9 Ke dirile dilo tše ka moka, e le gore ditšhaba tšeo di dulago le bona di se ke tša nyatša leina la ka. Ka gobane ke ile ka dira gore ba ntsebe pele ga ditšhaba tšeo ge ke be ke ba ntšha Egepeta. 10 Ka gona ke ile ka ba ntšha nageng ya Egepeta gomme ka ba tliša lešokeng.

11 “‘“Ke ile ka ba nea melao ya ka le ditaelo tša ka, e le gore motho yo a di latelago a tšwele pele a phela. 12 Ke ile ka ba nea le disabatha tša ka gore e be leswao magareng ga ka le bona, e le gore ba gopole gore ke nna Jehofa ke dirago gore ba be ba bakgethwa.

13 “‘“Eupša Baisiraele ba ile ba ntlhanogela lešokeng. Ga se ba ka ba theetša melao ya ka, ebile ba ganne go latela ditaelo tša ka tšeo di dirago gore motho a tšwele pele a phela ge e ba a di latela. Ba šilafaditše disabatha tša ka, ka gona ke ile ka ba botša gore ke tlo tšhollela bogale bja ka go bona kua lešokeng gomme ka ba fediša. 14 Ke ile ka dira dilo tše ka moka e le gore ditšhaba tšeo ke ba ntšhitšego pele ga tšona di se ke tša nyatša leina la ka. 15 Le gona, ke ile ka ikana go bona lešokeng gore nka se ba iše nageng yeo ke bego ke šetše ke ba neile yona, e lego naga yeo e elago maswi le todi ya dinose, yona naga e botse go di phala ka moka, 16 ka gobane ba ganne ditaelo tša ka ebile ga se ba latela melao ya ka. Le gona ba šilafaditše disabatha tša ka ka gobane ba ile ba kgetha go rapela medingwana ya bona yeo e šišimišago.

17 “‘“Ke ba kwetše bohloko gomme ka se ba fediše. Ga se ka ba fedišetša lešokeng. 18 Ke ile ka botša bana ba bona ba le lešokeng ka re: ‘Le se ke la theetša melao ya borakgolokhukhu ba lena, goba la latela ditaelo tša bona, le gona le se ke la itšhilafatša ka medingwana ya bona e šišimišago. 19 Ke nna Jehofa Modimo wa lena. Latelang melao ya ka le be le theetšeng ditaelo tša ka gomme le phele ka tšona. 20 Le direng gore disabatha tša ka e be tše kgethwa, ke moka tšona e tla ba leswao magareng ga ka le lena e le gore le tsebe gore ke nna Jehofa Modimo wa lena.’

21 “‘“Bana bao le bona ba ile ba ntlhanogela. Ba ile ba se latele melao ya ka ebile ba se theetše ditaelo tša ka tšeo di dirago gore motho a dule a phela ge e ba a di latela. Ba ile ba šilafatša disabatha tša ka, ka gona ke ile ka ba botša gore ke tlo ba galefela ka ba ka ntšhetša kgalefo ya ka ka moka go bona lešokeng. 22 Eupša ke ile ka se ba galefele e le gore ditšhaba tšeo di bonego ge ke be ke ba ntšha Egepeta di se ke tša tla tša nyatša leina la ka. 23 Le gona ke ile ka ba enela ba le lešokeng, ka ba botša gore ke tlo ba phatlalaletša ditšhabeng tše dingwe ka ba ka ba gašanyetša dinageng, 24 ka gobane ga se ba latela melao ya ka, le gona ba ganne ditaelo tša ka, ba ba ba šilafatša disabatha tša ka, ebile ba rapela medingwana e šišimišago ya borakgolokhukhu ba bona. 25 Le gona ke ile ka ba tlogela ba latela melao yeo e sego ya loka le go theetša ditaelo tšeo di bego di ka se ba thuše gore ba tšwele pele ba phela. 26 Ke ile ka ba tlogela ba šilafatšwa ke go dira dihlabelo ka go fiša ngwana yo mongwe le yo mongwe wa mathomo mollong,* gore ke tle ke ba fediše, e le gore ba tsebe gore ke nna Jehofa.”’

27 “Wena morwa wa motho, bolela le Baisiraele o re: ‘Mmuši Morena Jehofa o re: “Borakgolokhukhu ba lena le bona ba nnyaditše ka go se mpotegele. 28 Ke ile ka ba tliša nageng yeo ke bego ke enne gore ke tla ba fa yona. Ya re ge ba bona meboto ka moka le mehlare yeo e nago le makala a mantši, ba thoma go dira dihlabelo tša bona le dibego tša bona tšeo di sa nthabišego moo. Ba ile ba neela dihlabelo tša bona tšeo di nkgago bose gona moo, ba ba ba tšholla dibego tša bona tša dino gona moo. 29 Ke moka ka ba botšiša ka re: ‘Lefelo le le phagamego leo le yago go lona ke la eng? (Lefelo leo le sa bitšwa Lefelo le le Phagamego go fihla le lehono.)’”’

30 “Bjale botša Baisiraele o re: ‘Mmuši Morena Jehofa o re: “Na le itšhilafatša go swana le borakgolokhukhu ba lena, ka go rapela medingwana ya bona yeo e šišimišago le go e latela? 31 Na go fihlela le lehono le sa tšwela pele le itšhilafatša ka go direla medingwana ya lena e šišimišago dihlabelo ka go fiša bana ba lena mollong? Lena Baisiraele, na ke le arabe ge le mpotšiša?”’

“Mmuši Morena Jehofa o re: ‘Ke ikana ka nna Modimo yo a phelago gore nka se le arabe. 32 Lena le re: “A re swaneng le ditšhaba tše dingwe le malapa a dinaga tše dingwe ao a rapelago kota le leswika.” Bjale ke le botša gore seo le se naganago se ka se tsoge se diregile.’”

33 “Mmuši Morena Jehofa o re: ‘Ke ikana ka nna Modimo yo a phelago gore ke tla le buša ke le kgoši ka seatla se matla, gomme ke tla otlollela letsogo la ka go lena ka le otla ka ba ka ntšhetša bogale bja ka go lena. 34 Ke tla diriša letsogo la ka leo le nago le matla gore ke le ntšhe ditšhabeng le go le kgoboketša go tšwa dinageng tšeo le gašanyeditšwego go tšona. Ke tla dira seo ke galefile. 35 Ka le iša lešokeng la ditšhaba tše dingwe ke moka ka le sekiša moo re lebantše difahlego.

36 “Mmuši Morena Jehofa o re: ‘Ke tla le sekiša go no swana le ge ke sekišitše borakgolokhukhu ba lena lešokeng la naga ya Egepeta.’ 37 ‘Ke tla dira gore le fete ka fase ga molamo wa modiši gomme ka dira gore le phethe kgwerano ya ka. 38 Eupša gare ga lena ke tla tloša bao ba ntlhanogelago le bao ba sa mpotegelego. Ke tla ba ntšha nageng yeo ba dutšego go yona yeo e sego ya gabo bona gomme nka se ba dumelele gore ba tsene nageng ya Isiraele. Ke moo le tlago go tseba gore ke nna Jehofa.’

39 “Mmuši Morena Jehofa o re: ‘Lena Baisiraele, yo mongwe le yo mongwe wa lena a a sepele a yo rapela medingwana ya gagwe yeo e šišimišago. Eupša ge e ba le sa ntheetše, go tlo tla nako yeo le ka se sa kgonago go šilafatša leina la ka le lekgethwa ka dihlabelo tša lena le medingwana ya lena yeo e šišimišago.’

40 “Mmuši Morena Jehofa o re: ‘Mo thabeng ya ka e kgethwa, yona thaba e telele ya Isiraele, ke gona moo Baisiraele ka moka ba tlago go ntlhankela gona. Ke tla le amogela le go le kgopela gore le ntšhe meneelo le dienywa tša lena tša mathomo, e lego dilo tša lena ka moka tše kgethwa.’ 41 “‘Ke tla le amogela ka baka la dihlabelo tša lena tšeo di nkgago bose, ge ke tla be ke le ntšha ditšhabeng tše dingwe ebile ke le kgoboketša go tšwa dinageng tšeo le bego le gašantšwe go tšona. Ke tla le bontšha gore ke nna yo mokgethwa gomme ditšhaba tšeo le tšona di tla bona seo.’

42 “‘Le tla tseba gore ke nna Jehofa ge ke le tliša nageng ya Isiraele, e lego naga yeo ke ilego ka ena gore ke tla e nea borakgolokhukhu ba lena. 43 Ge le le moo le tla gopola tsela yeo le ilego la itshwara ka yona le dilo ka moka tšeo le ilego la di dira tšeo le itšhilafaditšego ka tšona, le tla hlabja ke dihlong ka baka la dilo ka moka tše mpe tšeo le di dirilego. 44 Lena Baisiraele le tla tseba gore ke nna Jehofa ge ke tla be ke dira dilo tšeo ka baka la leina la ka, e sego ka baka la tsela e mpe yeo le tla bego le itshwere ka yona goba dilo tše mpe tšeo le di dirilego,’ o realo Mmuši Morena Jehofa.”

45 Jehofa a bolela le nna gape a re: 46 “Morwa wa motho, lebelela ka thoko ya ka borwa gomme o phatlalatše molaetša wa ka o be o porofetele sethokgwa seo se lego nageng ya ka borwa. 47 O botše sethokgwa sa ka borwa o re: ‘Ekwa seo Jehofa a se bolelago. Mmuši Morena Jehofa o re: “Ke gotša mollo gore o go tšhume gomme o tla tšhuma mohlare o mongwe le o mongwe o motala le wo o omilego. Mollo wo o ka se ke wa tingwa gomme batho ka moka go tloga ka borwa go ya ka leboa ba tla kwa phišo ya wona. 48 Batho ka moka ba tla bona gore mollo woo o goteditšwe ke nna Jehofa, ka baka leo ga go na motho yo a ka kgonago go o tima.”’”

49 Ke moka ka re: “Joo Mmuši Morena Jehofa! Batho ba bolela ka nna ba re: ‘O phela a bolela ka dika le diema.’”