Doiteronomio

13 “Ge e ba mo go lena go ka ba le moporofeta goba motho yo a bolelago dilo tšeo di tlago go direga nakong e tlago a diriša ditoro, gomme a le tshepiša gore le tlo bona selo se itšego goba mohlolo, 2 ke moka dilo tšeo tša direga ka nnete, e bile a le botša a re: ‘A re rapeleng medimo e mengwe, e lego medimo yeo le sa e tsebego, ke moka re e hlankele,’ 3  lena le se ke la theetša moporofeta yoo goba motho yoo, ka gobane Jehofa Modimo wa lena o a le leka gore a tsebe ge e ba le rata yena Jehofa Modimo wa lena ka dipelo tša lena ka moka le ka moya wa lena ka moka. 4 Le lateleng Jehofa Modimo wa lena, le mmoifeng, le lateleng ditaelo tša gagwe, e bile le theetšeng lentšu la gagwe, le mo hlankeleng le be le mmotegele. 5 Eupša moporofeta yoo goba motho yo a bolelago dilo tšeo di tlago go direga a diriša ditoro a bolawe, ka gobane o dira gore batho ba se ke ba kwa Jehofa Modimo wa lena yo a le ntšhitšego nageng ya Egepeta a ba a le lokolla moo* le bego le le makgoba. O dira gore le se ke la sepela tseleng yeo Jehofa Modimo wa lena a le laetšego gore le sepele ka yona. Le gona, le tlošeng motho yo mobe mo gare ga lena.

6 “Ge e ba morwarrago, yena morwa wa mmago, goba morwa wa gago goba morwedi wa gago goba mosadi wa gago goba mogwera wa gago yo mogolo a ka leka go go hlalefetša ka sephiring a re: ‘A re yo hlankela medimo e mengwe,’ e lego medimo yeo wena goba borakgolokhukhu ba gago le bego le sa e tsebe, 7 yona medimo ya ditšhaba tšeo di le dikologilego, e ka ba e le tšeo di lego kgauswi le lena goba tšeo di lego kgole le lena, kae le kae mo nageng, 8 gona o se ke wa dumela seo a se bolelago goba wa mo theetša. Le gona, o se ke wa mo kwela bohloko goba wa mo šokela goba wa mo šireletša, 9 eupša o mmolaye. E be wena wa mathomo o mo kgatlago ka maswika gore a bolawe. Ke moka, ka morago setšhaba ka moka le sona se mo kgatle ka maswika. 10 O mo kgatle ka maswika a hwe, ka gobane o be a nyaka go dira gore o se sa hlankela Jehofa Modimo wa gago yo a go ntšhitšego nageng ya Egepeta moo o bego o le lekgoba. 11 Ke moka Baisiraele ka moka ba tla kwa ka taba yeo gomme ba tšhoga. Ka gona, mo go lena go ka se be le motho yo a tlago go bušeletša gape selo se sebe sa go swana le se.

12 “Ge e ba go o mongwe wa metse ya lena yeo Jehofa Modimo wa lena a le neago yona gore le dule go yona, le ka kwa batho ba bolela ba re: 13 ‘Batho bao ba se nago mohola ba tšwile mo gare ga lena gore ba leke go aroša badudi ba motse wa gabo bona, ba re: “A re yeng re yo hlankela medimo e mengwe,” e lego medimo yeo le bego le sa e tsebe,’ 14 ge e ba le ka nyakišiša ka taba ye gomme la botšiša le ba bangwe ke moka gwa hlatselwa gore ke nnete selo seo se šišimišago se dirilwe gare ga lena, 15 gona le bolayeng badudi ba motse woo ka tšhoša. Le fedišeng motse woo ka tšhoša le dilo ka moka tšeo di lego go wona gotee le diruiwa tša wona. 16 Le kgobokeletšeng dilo ka moka tša bohlokwa tša motse woo bogareng bja mebaraka ya wona. Le fiše motse woo ka mollo gomme dilo tšeo e tla ba sebego se se feletšego seo se direlwago Jehofa Modimo wa lena, ke moka motse woo e tla ba marope go ya go ile. Ga se wa swanela go agwa gape le ka mohla. 17 Le se ke la tšea selo seo se bego se swanetše go fedišwa e le gore Jehofa a se sa le galefela, eupša a le gaugele, a le kwele bohloko, a be a le dire ba bantšhi, feela bjalo ka ge a enetše borakgolokhukhu ba lena. 18 Le theetše Jehofa Modimo wa lena ka gore le latele ditaelo ka moka tšeo ke le neago tšona lehono, e le gore le dire seo se lokilego pele ga Jehofa Modimo wa lena.