Hesekiele

6 “‘Bjale ge moleti a ka bona manaba a etla eupša a se letše lenaka gore a lemoše batho, ke moka gwa ba le motho yo a bolawago, motho yoo o tla be a bolailwe ka baka la molato wa gagwe, eupša motho yo a letago o tla ikarabela ka lehu la motho yoo.’

7 “Wena morwa wa motho, ke go kgethile gore o be moleti wa Baisiraele. Ge o ekwa lentšu la ka o ba lemoše. 8 Ge ke botša motho yo mobe gore o tlo hwa, eupša wena wa se mo lemoše gore a tlogele dilo tše mpe tšeo a di dirago, o tla hwa e le motho yo mobe ka baka la molato wa gagwe, eupša wena o tla ikarabela ka lehu la gagwe. 9 Eupša ge wena o lemošitše motho yo mobe gore a tlogele dilo tše mpe tšeo a di dirago, fela a gana, yena o tla hwela molato wa gagwe eupša wena o tla phološa bophelo bja gago.

10 “Wena morwa wa motho, botša Baisiraele o re: ‘Le itše: “Melato ya rena le dibe tša rena di a re imela, di dira gore re felelwe ke matla, bjale re ka tšwela pele bjang re phela?”’ 11 O ba botše o re: ‘Mmuši Morena Jehofa o re: “Ke ikana ka nna Modimo yo a phelago gore ga ke thabe ge ke bona motho yo mobe a ehwa, eupša ke a thaba ge ke bona a tlogela dilo tše mpe tšeo a di dirago gomme a tšwela pele a phela. Lena Baisiraele, boang! Boang le tlogele dilo tše mpe tšeo le di dirago gore le se ke la hwa.”’

12 “Wena morwa wa motho, botša batho ba geno o re: ‘Dilo tše dibotse tšeo di dirwago ke moloki di ka se mo phološe ge a hlanoga. Ebile ge motho yo mobe a ka lesa go dira dilo tše mpe a ka se otlwe. Le gona ge motho yo a lokilego a ka dira sebe, a ka se tšwele pele a phela ka baka la dilo tše dibotse tšeo a kilego a di dira. 13 Ge ke botša moloki gore ruri o tla tšwela pele a phela, eupša yena a tshepa gore dilo tša go loka tšeo a di dirilego di tla mo phološa, gomme a dira dilo tše mpe, gona dilo ka moka tša go loka tšeo a di dirilego di ka se gopolwe, eupša o tla hwa ka baka la dilo tše mpe tšeo a di dirilego.

14 “‘Ge ke botša motho yo mobe gore o tlo hwa, gomme yena a tlogela go dira dilo tše mpe, a dira tšeo di lokilego, 15 a ba a bušetša selo seo a se tšeetšego motho yo a mo kolotago, ebile a patela dilo tšeo a bego a di tšere ka botsotsi, a ba a phela ka melao yeo e dirago gore motho a tšwele pele a phela ka go dira dilo tše di lokilego, gona motho yoo o tla tšwela pele a phela. A ka se hwe. 16 O tla lebalelwa dibe ka moka tšeo a di dirilego. Ka ge a dira dilo tša go loka, o tla tšwela pele a phela.’

17 “Eupša batho ba geno ba itše: ‘Jehofa ga a dire dilo ka toka,’ mola e le bona ba sa dirego dilo ka toka.

18 “Ge moloki a ka tlogela go dira dilo tša go loka gomme a dira dilo tše mpe, o swanetše go hwa ka baka la dilo tše mpe tšeo a di dirago. 19 Ge e ba motho yo mobe a tlogela go dira dilo tše mpe gomme a dira dilo tša go loka ebile a dira dilo ka toka, gona o tla tšwela pele a phela.

20 “Eupša lena le itše: ‘Jehofa ga a dire dilo ka toka.’ Lena Baisiraele, ke tla ahlola yo mongwe le yo mongwe wa lena go ya ka dilo tšeo a di dirago.”

21 Ka letšatši la bohlano, ka kgwedi ya lesome, ka ngwaga wa bo-12, ge re be re le bothopša, go ile gwa tla motho yo a phologilego a etšwa Jerusalema, a re go nna: “Motse o wišitšwe!”

22 Mantšiboa pele monna yoo a ka tla, seatla sa Jehofa se ile sa tla go nna. O ile a mpula molomo pele monna yoo a etla go nna mesong. Ka gona molomo wa ka o ile wa bulega ka kgona go bolela.

23 Jehofa a bolela le nna a re: 24 “Morwa wa motho, batho bao ba dulago mašopeng a ba bolela ka naga ya Isiraele ba re: ‘Aborahama o be a le noši eupša o ile a tšea naga ye ya ba ya gagwe. Rena re ba bantši, ruri re neilwe naga ye gore e be ya rena.’

25 “Ka gona ba botše o re: ‘Mmuši Morena Jehofa o re: “Le ja nama yeo e nago le madi, le rapela medingwana ya lena e šišimišago ebile le tšwela pele le bolaya batho. Bjale naga ye e tla ba ya lena bjang? 26 Le tshepile sabola ya lena, le dira dilo tše di šišimišago, ebile yo mongwe le yo mongwe wa lena o robetše le mosadi wa wa gabo. Bjale naga yeo e tla ba ya lena bjang?”’

27 “Wena o ba botše o re: ‘Mmuši Morena Jehofa o re: “Ke ikana ka nna Modimo yo a phelago gore bao ba dulago mašopeng ba tla bolawa ka sabola, bao ba lego nageng ke tla ba nea dibata gore di ba je, gomme bao ba lego mafelong ao a šireletšegilego le ka maweng, ba tla bolawa ke bolwetši. 28 Ke tla dira gore naga yeo e be lešope e be e šale e se na selo, ka ba ka dira gore boikgantšho bja yona bo fedišwe. Le gona ke tla dira gore dithaba tša Isiraele e be lešope, gwa se sa ba le motho yo a fetago go tšona. 29 Ke moo ba tlago go tseba gore ke nna Jehofa ge ke dira naga ye lešope, ebile ke dira gore e šale e se na selo ka baka la dilo ka moka tše di šišimišago tšeo ba di dirilego.”’

30 “Wena morwa wa motho, batho ba geno ba bolela ka wena kgauswi le maboto le mejakong ya dintlo, ba botšana ba re: ‘Etlang re kweng seo Jehofa a se bolelago.’ 31 Ba tla kopana gore ba dule pele ga gago go swana le batho ba ka, gomme ba tla kwa seo o se bolelago eupša ba ka se se dire. Ba leka go go kgahla ka dilo tšeo ba di bolelago eupša ka dipelong ba nyaka go huma ka botsotsi. 32 Tseba gore mo go bona o no swana le koša ya marato yeo e opelwago ka lentšu le lebotse le ka seletšo sa metato seo se letšwago ke motho yo a nago le bokgoni. Ba tla kwa mantšu a gago eupša ga go le o tee yo a tlago go dira seo o se bolelago. 33 Ge dilo tšeo di phethega e le ka nnete, ke moo ba tlago go tseba gore moporofeta o be a le gare ga bona.”