Puku ya Bobedi ya Dikgoši

6 Barwa ba baporofeta ba re go Elisha: “Bona! Lefelo le leo re dulago le wena go lona, ga le re lekane. 2 Hle re dumelele gore re ye kgauswi le Noka ya Jorodane gomme ge re fihla moo re tla rema mehlare gomme ra dira lefelo leo re ka dulago go lona.” A re go bona: “Sepelang.” 3 Ke moka yo mongwe wa bona a re: “Re kgopela gore o sepele le rena bahlanka ba gago.” Ke moka Elisha a re: “Ke tla sepela le lena.” 4 Ka gona a sepela le bona ke moka ba fihla Nokeng ya Jorodane gomme ba thoma go rema mehlare. 5 Ge yo mongwe wa bona a dutše a rema mohlare, hlogwana ya selepe seo a bego a se swere e ile ya wela ka meetseng. A goeletša a re: “Joo mong wa ka, ke be ke se adimilwe!” 6  Mohlanka wa Modimo wa nnete a re: “E wetše kae?” Ka gona a mmontšha mo e wetšego gona. Ke moka a rema seripa sa kota a se lahlela moo hlogwana ya selepe e wetšego gona gomme hlogwana yeo ya phaphamala. 7 A re go yena: “E tope.” Ka gona a e topa.

8 Kgoši ya Siria ya ya go lwa le Baisiraele. Ka gona ya boledišana le bahlanka ba yona ya re: “Re tla ya re hloma ditente lefelong le itšego.” 9 Ke moka mohlanka wa Modimo wa nnete a romela molaetša go kgoši ya Isiraele a re: “Hlokomela gore o se ke wa feta lefelong le ka gobane ke moo Basiria ba nyakago go go hlasela gona.” 10 Kgoši ya Isiraele ya romela molaetša go batho ba yona bao ba bego ba le lefelong leo mohlanka wa Modimo wa nnete a bego a mo lemošitše ka lona. Elisha a dulela go lemoša kgoši ya Isiraele gomme kgoši ya Isiraele ya sepelela kgole le lefelo leo e bile e ile ya phema go feta lefelong leo gantšhi.

11 Kgoši ya Siria ya kwata kudu ya ba ya bitša bahlanka ba yona ya re go bona: “Mpotšeng gore ke mang mo gare ga rena yo a thekgago kgoši ya Isiraele?” 12 Ke moka yo mongwe wa bahlanka ba gagwe a re: “Ga a gona kgoši mong wa ka, eupša Elisha moporofeta wa Isiraele ke yena a botšago kgoši ya Isiraele dilo tšeo wena kgoši o di bolelago ka kamoreng ya gago.” 13 Kgoši ya Siria ya re: “Sepelang le yo mo nyaka, le bone gore o mo kae e le gore ke romele batho gore ba ye ba mo sware.” Ka morago a botšwa gore Elisha o Dothane. 14 Ke moka a napa a romela mašole a mantšhi ka dipere le dikariki tša ntwa, a tla e le bošego gomme a dikanetša motse woo.

15 Ge mothuši wa mohlanka wa Modimo wa nnete a tsoga mesong gomme a tšwela ka ntle, o ile a bona mašole a dikologile motse ka dipere le ka dikariki tša ntwa. Ka yona nako yeo, mothuši yoo wa Elisha a re go yena: “Joo mong wa ka! Re tla dira eng?” 16 Eupša Elisha a re: “O se ke wa tšhoga ka gobane bao ba nago le rena ke ba bantšhi go feta bao ba nago le bona.” 17 Ke moka Elisha a rapela a re: “Hle Jehofa, mo thuše gore a bone.” Jehofa a napa a bula mahlo a mothuši yoo wa Elisha gomme a bona dithaba tšeo di tletšego ka dipere le dikoloi tša ntwa tšeo di swanago le mollo go dikologa Elisha.

18 Ge Basiria ba etla go Elisha, Elisha o ile a rapela Jehofa a re: “Hle otla setšhaba se ka bofofu.” Ka gona a se otla ka bofofu go ya ka seo Elisha a se kgopetšego. 19 Ke moka Elisha a re go bona: “Tsela yeo le e swerego ga se yona, e bile motse wo ga se wo le o nyakago. Ntateleng, ke tla le iša go monna yoo le mo nyakago.” Eupša o ile a ba iša Samaria.

20 Ge ba fihla Samaria, Elisha a re: “Hle Jehofa, ba dire gore ba bone.” Ke moka Jehofa a dira gore ba bone gomme ba bona gore ba Samaria. 21 Ge kgoši ya Isiraele e ba bona ya re go Elisha: “Mong wa ka, na ke ba bolaye? Ke ba bolaye?” 22 Eupša Elisha a re: “O se ke wa ba bolaya. Na o ka bolaya batho bao o ba thopilego ntweng?* Ba fe dijo le meetse e le gore ba je gomme ba nwe ke moka ba boele go mong wa bona.” 23 A ba direla monyanya o mogolo. Ba ja ba ba ba nwa, ka morago ga moo a re ba boele go mong wa bona. Sehlopha sa Basiria seo se hlaselago batho ba bangwe ga se sa ka sa hlwa se sa boa gape nageng ya Isiraele go tlo e hlasela.

24 Ka morago ga moo Bene-hadada kgoši ya Siria a kgoboketša mašole a gagwe ka moka gomme a ya a dikanetša Samaria. 25 Go ile gwa wa tlala e kgolo Samaria, gomme Bene-hadada le mašole a gagwe ba dikanetša Samaria go fihlela ge hlogo ya tonki e rekišwa ka dikarolwana tše 80 tša silifera gomme mantle a maeba ao a ka tlalago diatla tše pedi* a rekišwa ka dikarolwana tše hlano tša silifera. 26 Ka letšatši le lengwe ge kgoši ya Isiraele e be e sepela godimo ga leboto la motse, mosadi yo mongwe o ile a e goelela a re: “Kgoši mong wa ka, re thuše!” 27 Ke moka kgoši ya re: “Ge e ba Jehofa a sa go thutše, nna ke tla go thuša bjang? Na o nagana gore nka go fa dijo, beine goba makhura?” 28 Ke moka kgoši ya re: “Bothata bja gago ke eng?” Mosadi yoo a re: “Mosadi yo o itše go nna: ‘Tliša morwa wa gago re mo je lehono gomme re tla ja morwa wa ka gosasa.’ 29 Ka gona re ile ra apea morwa wa ka ra mo ja. Ke moka letšatšing la go latela ka re go yena: ‘Tliša morwa wa gago re mo je.’ Eupša yena a khutiša morwa wa gagwe.”

30 Ge kgoši e se na go kwa mantšu a mosadi yoo, ya gagola diaparo tša yona. Ge kgoši e be e sepela godimo ga leboto, batho ba ile ba bona gore e be e apere seaparo sa go dirwa ka lesaka ka gare ga diaparo tša yona. 31 Kgoši ya re: “Anke Modimo a nkotle a be a oketše kotlo yeo ge e ba nka se kgaole hlogo ya Elisha morwa wa Shafata lehono!”

32 Elisha o be a dutše ka ntlong ya gagwe a na le banna ba bagolo. Kgoši e ile ya roma monna yo mongwe gore a e ete pele a ye go Elisha. Eupša pele monna yoo a ka fihla, Elisha o ile a botša banna ba bagolo a re: “Morwa yo wa mmolai o rometše motho gore a tle a nkgaole hlogo. Ge motho yoo a fihla le tswalele lebati le mo pitlaganye ka lona. Na le a o kwa mošito wa maoto a mong wa gagwe yoo a mo šetšego morago?” 33 Ge Elisha a sa bolela le banna ba bagolo, monna yoo a bego a romilwe ke kgoši, o ile a fihla ke moka kgoši le yona ya tsena, ya re: “Masetlapelo a a tšwa go Jehofa. Ke ka baka la eng ke swanetše go dula ke letetše Jehofa gore a nthuše?”