Hosea
14 “Wena Isiraele, boela go Jehofa Modimo wa gago
Gobane o wišitšwe ke molato wa gago.
2 Boelang go Jehofa
Gomme le re go yena: ‘Re swarele molato wa rena, o amogele botse bjoo re bo dirago.
Re tla go tumiša ka melomo ya rena go swana le ge re go direla dihlabelo ka dipowana.
3 Asiria e ka se re phološe.
Re ka se namele dipere.
Re ka se hlwe re sa bitša dilo tšeo re di dirilego ka matsogo a rena gore ke Modimo wa rena.
Ka gobane ke wena o kwelago ngwana yo a se nago tatagwe bohloko.’
4 Ke tla ba alafa gomme ba thoma go botega.
Ke tla ba rata ka pelo ya ka ka moka
Ka gobane ga ke sa ba galefetše.
5 Ke tla swana le phoka go Isiraele.
O tla ba botse go swana le lepolomo.
O tla tsema medu ya gagwe go swana le mehlare ya Libanoni.
6 Makala a gagwe e tla ba a mantšhi.
O tla ba botse go swana le mohlware
Gomme a nkga bose go swana le mohlare wa Libanoni.
7 Nna Modimo wa bona ke tla ba šireletša bjalo ka ge eka ba dutše moriting wa ka.
Ba tla bjala mabele e bile ba tla hloga go swana le moterebe.
Ba tla tuma go swana le beine ya Libanoni.
8 Efuraime o tla re: ‘Ga ke sa na taba le medingwana.’
Nna ke tla mo araba gomme ka mo hlokomela.
Ke tla swana le mohlare wa mojunipere woo o golago gabotse.
Ke nna ke tlago go go fa dienywa.”
9 Yo bohlale ke mang? Anke a kwešiše dilo tše.
Ke mang yo a nago le temogo? Anke a di tsebe.
Gobane ditsela tša Jehofa di lokile
Gomme baloki ba tla sepela go tšona.
Eupša badiradibe ba tla kgopša go tšona gomme ba wa.