Ekisodo

6 Ka gona Jehofa a re go Moshe: “Bjale gona o tla bona tšeo ke tlago go di dira Farao, ke tla diriša matla a ka go mo gapeletša gore a le lokolle gomme ka morago ga gore a bone matla a ka o tla le botša gore le tloge nageng ya gagwe a gapeletšega.”

2 Ke moka Modimo a re go Moshe: “Ke nna Jehofa. 3 Ke be ke fela ke iponagatša go Aborahama, Isaka le Jakobo ke le Modimo Ramatlaohle, eupša ga se ka ba tsebiša ka mo go feletšego ka leina la Jehofa. 4 Le gona ke dirile kgwerano le bona ya gore ke tla ba nea naga ya Kanana, e lego naga yeo ba bego ba dula go yona e se ya gabo bona. 5 Ge e le nna ke kwele sello sa Baisiraele bao Baegepeta ba ba dirilego makgoba gomme ka gopola kgwerano yeo ke e dirilego le borakgolokhukhu ba gago.

6 “Ka gona botša Baisiraele o re: ‘Ke nna Jehofa, gomme ke tla le lokolla gore Baegepeta ba se sa le šomiša ga boima, e bile ke tla le ntšha bokgobeng. Ke tla diriša matla a ka go le lokolla gomme ka otla Baegepeta o šoro. 7 Le tla ba setšhaba sa ka, gomme nna ka ba Modimo wa lena. Ruri le tla tseba gore ke nna Jehofa Modimo wa lena yo a tlago go le ntšha mathateng ka moka a Egepeta. 8 Ke tla le iša nageng yeo ke ilego ka ikana gore ke tla e nea Aborahama, Isaka le Jakobo gomme ke tla le nea yona ya ba ya lena. Ke nna Jehofa.’”

9 Ka morago ga moo Moshe o ile a botša Baisiraele dilo tše ka moka. Eupša ga se ba ka ba mo theetša ka baka la go fela matla le ka baka la ge Baegepeta ba be ba ba šomiša ga boima.

10 Ke moka Jehofa a re go Moshe: 11 “Eya o botše Farao kgoši ya Egepeta gore a lokolle Baisiraele ba tloge nageng ya gagwe.” 12 Eupša Moshe a re go Jehofa: “Baisiraele ga se ba ntheetša, bjale Farao yena o tla ntheetša bjang ka ge ke sa kgone go bolela?” 13 Eupša Jehofa o ile a bolela le Moshe le Arone gape, gomme a ba botša dilo tšeo ba swanetšego go di botša Baisiraele le Farao kgoši ya Egepeta e le gore ba tle ba kgone go lokolla Baisiraele nageng ya Egepeta.

14 A ke maina a banna bao e bego e le dihlogo tša malapa a Baisiraele: Barwa ba Rubeni yo e bego e le morwa wa mathomo wa Isiraele e be e le Hanoge, Palu, Hetserone le Karami. Ao ke malapa a moloko wa Rubeni.

15 Barwa ba Simeone bona e be e le Jemuele, Jamini, Ohada, Jakine, Tsohara le Shaulo morwa wa mosadi wa Mokanana. Ao ke malapa a moloko wa Simeone.

16 Maina a barwa ba Lefi go ya ka meloko ya bona e be e le Gerishone, Kohathe le Merari. Lefi yena o phetše mengwaga e 137 (lekgolo-masometharo-šupa).

17 Barwa ba Gerishone go ya ka malapa a bona e be e le Lebini le Shimei.

18 Barwa ba Kohathe e be e le Amorama, Itsehara, Heburone le Usiele. Kohathe yena o phetše mengwaga e 133 (lekgolo-masometharo-tharo).

19 Barwa ba Merari e be e le Maheli le Mushi.

Ao e be e le malapa a Balefi go ya ka meloko ya bona.

20 Bjale Amorama a tšea Jogobede kgaetšedi ya tatagwe ya ba mosadi wa gagwe. O ile a mmelegela Arone le Moshe. Amorama yena o phetše mengwaga e 137 (lekgolo-masometharo-šupa).

21 Barwa ba Itsehara e be e le Kora, Nefege le Sikiri.

22 Barwa ba Usiele e be e le Mishaele, Elisafane le Sithiri.

23 Bjale Arone a tšea Elisheba morwedi wa Aminadaba, e lego kgaetšedi ya Nahashone ya ba mosadi wa gagwe. O ile a mmelegela Nadaba, Abihu, Eleasara le Ithamara.

24 Barwa ba Kora bona e be e le Asiri, Elikana le Abiasafa. Ao e be e le malapa a Bakora.

25 Eleasara morwa wa Arone o ile a tšea yo mongwe wa barwedi ba Putiele ya ba mosadi wa gagwe. O ile a mmelegela Finease.

Ao ke maina a dihlogo tša malapa a Balefi go ya ka meloko ya bona.

26 Jehofa o ile a bolela le Arone le Moshe a re: “Ntšhang Baisiraele nageng ya Egepeta go ya ka dihlopha.” 27 Moshe le Arone ke bona ba ilego ba bolela le Farao kgoši ya Egepeta gore a ntšhe Baisiraele Egepeta.

28 Letšatšing la ge Jehofa a be a bolela le Moshe nageng ya Egepeta, 29 Jehofa o ile a re go Moshe: “Ke nna Jehofa. Botša Farao kgoši ya Egepeta dilo ka moka tšeo ke go botšago tšona.” 30 Ke moka Moshe a re go Jehofa: “Ga ke kgone go bolela, bjale Farao o tlo ntheetša bjang?”