Hesekiele

3 Ke moka a re go nna: “Morwa wa motho, eja selo se se lego pele ga gago. Eja lengwalo le la go phuthwa gomme o sepele o yo bolela le Baisiraele.”

2 Ka gona ka bula molomo, gomme a nnea lengwalo leo gore ke le je. 3 A tšwela pele a re go nna: “Morwa wa motho, eja lengwalo le la go phuthwa leo ke go neago lona, o tlatše mpa ya gago ka lona.” Ka gona ka thoma go le ja, gomme le be le le bose go swana le todi ya dinose.

4 Ke moka a re go nna: “Morwa wa motho, eya go Baisiraele gomme o ba botše seo ke go botšago sona. 5 Ka gobane batho bao ke go romago go bona ke Baisiraele, ga se batho bao ba bolelago leleme le thata goba leo le sa kwagalego. 6 Ga ke go rome go ditšhaba tše dintši tšeo di bolelago maleme a thata goba ao o sa a tsebego, le tšeo di sa kgonego go kwešiša seo di se bolelago. Ge ke be nka go roma go tšona, di be ba tlo go theetša. 7 Eupša Baisiraele ba ka se go theetše, ka gobane ga ba nyake go ntheetša. Baisiraele ka moka ba na le dihlogo tše thata ebile ba na le kgang. 8 Tseba gore ke dirile gore o be le manganga le hlogo e thata go swana le bona.* 9 Ke dirile gore phatla ya gago e be e thata go swana le taamane, ka dira gore e be e thata go feta leswika. O se ke wa ba boifa, ebile difahlego tša bona di se ke tša go tšhoša, ka gobane ke dinganga.”

10 A tšwela pele a re go nna: “Morwa wa motho, dilo ka moka tšeo ke tlago go go botša tšona o di theetše, gomme o di bee pelong. 11 Sepela o ye gare ga batho ba geno bao ba thopilwego, gomme o bolele le bona go sa šetšwe gore ba a go theetša goba ba gana go go theetša. O ba botše gore mantšu ao o a bolelago a tšwa go Mmuši Morena Jehofa.”

12 Moya o ile wa ntšea, ke moka ka morago ga ka ka kwa modumo o mogolo le lentšu le re: “Anke Jehofa a retwe a le mo a dulago gona ka baka la letago la gagwe.” 13 Go be go na le modumo wa maphego a diphedi tšeo ge di kgomana, le modumo wa maotwana ao a bego a le kgauswi le tšona gotee le modumo o mogolo. 14 Moya woo o ile wa ntšea wa sepela le nna, gomme ka sepela ke kwele bohloko ebile ke galefile. Le gona moya wa Jehofa o be o bereka mo go nna ka tsela e matla. 15 Ke ile ka ya Thele-abiba go batho bao ba bego ba thopilwe bao ba bego ba dula kgauswi le noka ya Kebara, gomme ka dula moo ba bego ba dula gona. Ke ile ka dula moo le bona matšatši a šupago ke maketše.

16 Ka morago ga matšatši a šupago Jehofa o ile a bolela le nna a re:

17 “Morwa wa motho, ke go beile gore o be moleti wa Baisiraele, gomme ge o ekwa lentšu la ka o ntemošetše bona. 18 Ge ke botša motho yo mobe gore o tlo hwa, eupša wena o sa mo lemoše gomme o sa mmotše gore a tlogele dilo tše mpe tšeo a di dirago e le gore a phele, o tla hwa ka baka la melato ya gagwe ka ge e le yo mobe, eupša wena o tla ikarabela ka lehu la gagwe. 19 Eupša ge e ba wena o lemošitše motho yo mobe gomme a se tlogele go dira dilo tše mpe, gona o tla hwa ka baka la molato wa gagwe, eupša wena o tla be o phološitše bophelo bja gago. 20 Ge motho yo a lokilego a tlogela go dira dilo tše di lokilego gomme a dira dilo tše mpe, ke tla bea selo seo se tlago go mo kgopa pele ga gagwe, gomme yena o tla hwa. Ge e ba o se wa mo lemoša, o tla hwa ka baka la sebe sa gagwe, gomme nka se sa gopola dilo tše di lokilego tšeo a di dirilego, eupša madi a gagwe ke tla a nyaka seatleng sa gago. 21 Eupša ge e ba o lemošitše motho yo a lokilego gore a se ke a dira sebe gomme yena a se se dire, ruri o tla tšwela pele a phela ka gobane o mo lemošitše, gomme wena o tla be o phološitše bophelo bja gago.”

22 Ge ke le moo moya wa Jehofa o ile wa ntlela, ke yena a re go nna: “Ema o ye moeding, gomme ke tla bolela le wena ge o le moo.” 23 Ka gona ke ile ka ema ka ya moeding woo, gomme go be go na le letago la Jehofa moo. Letago leo le be le swana le leo ke le bonego nokeng ya Kebara, ke moka ka khunama ka inamiša sefahlego. 24 Moya wa Modimo o ile wa tsena go nna gomme wa dira gore ke emelele. Ke moka Modimo a bolela le nna a re:

“Sepela o yo itswalelela ka ntlong ya gago. 25 Wena morwa wa motho, tseba gore ba tlo go tatetša ka dithapo ba ba ba go tlema ka tšona e le gore o se ke wa ya go bona. 26 Ke tla dira gore leleme la gago le kgomarele magalagapeng a gago, wa se sa kgona go bolela, gomme wa se kgone go ba kgala ka gobane ke dinganga. 27 Eupša ge ke bolela le wena ke tla bula molomo wa gago, gomme o ba botše gore mantšu ao o a bolelago a tšwa go Mmuši Morena Jehofa. Yo a kwago a a kwe gomme yo a ganago go kwa a tšwele pele a sa kwe, ka gobane ke dinganga.