Jobo

28 “Go na le lefelo leo silifera e epiwago go lona,

Le lefelo leo gauta e hlwekišwago go lona.

 2 Tšhipi yona e hwetšwa mobung,

Gomme koporo e tološwa go tšwa maswikeng.

 3 Motho o dira gore mo go lego leswiswi e be seetša.

O ya mo go lego leswiswi le lesoleso

Gore a hwetše maswika a bohlokwa.

 4 O epa mokoti kgole le moo batho ba dulago,

Mafelong ao a lebetšwego, ao a lego kgole kudu le moo batho ba sepelago gona.

Batho ba bangwe ba theogela mokoting woo ba šomiša dithapo.

 5 Lefase le mediša dijo,

Eupša ka tlase ga lona, le senyegile bjalo ka ge eka le tšhumilwe ke mollo.

 6 Ka fase ga lona go na le maswika ao a bitšwago safire,

E bile mo mobung go na le gauta.

 7 Ga go na nonyana ya go ja nama yeo e tsebago tsejana ya go ya moo,

Pekwa e ntsho le yona ga se ya bona tsejana yeo.

 8 Dibata tše dikgolo ga se tša ka tša sepela go yona.

Tawana le yona ga se ya sepela go yona.

 9 Motho o pšhatlaganya leswika le le thata ka seatla sa gagwe.

O phekgola dithaba ka medu ya tšona.

10 O bula diforo tša meetse leswikeng,

Gomme mahlo a gagwe a bona dilo ka moka tše bohlokwa.

11 O thiba mafelo ao dinoka di elelago di etšwa go ona,

Selo se se utegilego o se tšweletša nyanyeng.

12 Eupša bohlale bo ka hwetšwa kae?

Le gona kwešišo yona e ka hwetšwa kae?

13 Ga go na motho yo a tsebago bohlokwa bja bjona,

E bile ga bo hwetšagale felo mo lefaseng.

15 Bo ka se rekwe ka gauta yeo e hlwekilego,

E bile bo ka se rekwe le ka silifera.

16 Bo ka se rekwe ka gauta ya maemo a godimo,*

E bile bo ka se rekwe le ka leswika le bohlokwa leo le bitšwago onikisi le leo le bitšwago safire.

17 Bohlale bo bohlokwa kudu go feta gauta le galase,

E bile o ka se bo reke ka sebjana seo se dirilwego ka gauta yeo e hlwekišitšwego.

18 Maswika a bohlokwa a ka lewatleng le legakabje ga se selo ge di bapišwa le bohlale,

Le gona bohlale bo bohlokwa kudu go fetiša peke yeo e tletšego diperela.

19 Bohlale bo bohlokwa kudu go fetiša leswika le bohlokwa leo le bitšwago topase la kua Kushe,

Bo ka se rekwe gaešita le ka gauta yeo e hlwekilego.

20 Eupša bohlale bjona bo tšwa kae,

Le gona kwešišo yona e tšwa kae?

21 Bohlale bo utegile mahlong a sephedi se sengwe le se sengwe,

E bile bo utetšwe dinonyana.

22 Go bjalo ka ge eka lebitla le lehu di re:

‘Re no kwa ka mabarebare gore go na le bohlale.’

23 Modimo ke yena a kwešišago gore bo hwetšwa bjang,

E bile ke yena feela a tsebago mo bo lego gona,

24 Ka gobane Modimo o bona le dilo tšeo di lego moo lefase le felelago,

E bile o bona le dilo ka moka tšeo di lego ka tlase ga magodimo.

25 Ge a efa phefo matla,

E bile a kala meetse,

26 Ge a be a beela pula molao,

Gomme maru a pula a a bulela tsela,

27 O ile a bona bohlale gomme a bo hlalosa.

O ile a dira gore bo be gona gomme a bo hlahloba.

‘Bohlale ke go boifa Jehofa,

Gomme go ba le kwešišo ke go se dire dilo tše mpe.’”