Puku ya Bobedi ya Dikoronika
16 Ka ngwaga wa bo-36 wa ge Asa a buša, Kgoši Baasha wa Isiraele o ile a hlasela Juda gomme a thoma go tsošološa* Rama e le gore go se ke gwa ba le motho yo a tsenago goba yo a tšwago nageng ya Kgoši Asa wa Juda. 2 Ka baka leo Asa a ntšha silifera le gauta go tšwa matlotlong a ntlo ya Jehofa le ntlong ya kgoši gomme a a romela go Kgoši Bene-hadada wa Siria yo a bego a dula Damaseko, a re: 3 “Nna le wena re dirile kgwerano go swana le ge tate a be a dirile kgwerano le tatago. Ke go romela silifera le gauta. Bjale senya kgwerano yeo o e dirilego le Kgoši Baasha wa Isiraele e le gore a kgaogane le nna.”
4 Ka gona Bene-hadada a theetša Kgoši Asa gomme a romela baetapele ba mašole a gagwe gore ba yo lwa le metse ya Isiraele, a hlasela Ijoni, Dani, Abele-maima le mafelo ka moka ao go bego go bewa dilo go ona metseng ya Nafutali. 5 Ge Baasha a ekwa ka seo o ile a tlogela go tsošološa Rama kapelapela, a tlogela mošomo wa gagwe woo a bego a o dira moo. 6 Ke moka Kgoši Asa a tšea Bajuda ka moka gomme ba rwala maswika le dikota tša Rama tšeo Baasha a bego a tsošološa motse wa Rama ka tšona gomme a aga motse wa Geba le wa Mitsipa ka maswika le dikota tšeo.
7 Ka nako yeo Hanani yo a bego a kgona go bona dipono a tla go Kgoši Asa wa Juda a re go yena: “Ka ge o ithekgile ka kgoši ya Siria eupša o se wa ithekga ka Jehofa Modimo wa gago, mašole a kgoši ya Siria a phonyokgile seatleng sa gago. 8 Na mašole a Baethopia le a Balibia e be e se a mantšhi kudu, e bile a na le dikariki tše dintšhi tša ntwa le banamedi ba dipere? Eupša ka ge o ile wa ithekga ka Jehofa, o ile a go thuša gore o ba fenye. 9 Ka gobane mahlo a Jehofa a lebeledišiša lefase ka moka gore a bontšhe matla a gagwe ka go thuša batho bao ba mo hlankelago ka dipelo tša bona ka moka. Wena o dirile tša bošilo tabeng ye. Ka gona go tloga gona bjale go ya pele go tla dula go na le batho bao ba lwago le wena.”
10 Eupša Asa a kgopišwa ke motho yoo a bego a bona dipono gomme a mo golega* ka gobane o be a galefišitšwe ke seo motho yoo a mmoditšego sona. Le gona, ka yona nako yeo Asa a thoma go se sa swara batho ba bangwe gabotse. 11 Ditaba tša Asa tša go tloga mathomong go fihla mafelelong, di ngwadilwe ka Pukung ya Dikgoši tša Juda le tša Isiraele.
12 Ka ngwaga wa bo-39 wa ge Asa a buša, maoto a gagwe a ile a thoma go kwa bohloko go fihlela a babja kudu. Le ge a be a babja ga se a ka a kgopela Jehofa gore a mo thuše, eupša o ile a ya go dingaka. 13 Mafelelong Asa o ile a hlokofala go no swana le borakgolokhukhu ba gagwe. O hlokofetše ka ngwaga wa bo-41 wa ge a buša. 14 Ka gona ba mmolokela lebitleng la gagwe le legolo leo a bego a ikepetše lona Motseng wa Dafida. Ba mo robatša mpeteng woo o bego o tletše ka makhura a balesamo le dilo tše dintšhi tše di fapafapanego tšeo di bego di tswakilwe le makhura a go fapafapana ao a nkgago bose. Go oketša moo, ge ba be ba mmoloka, ba ile ba mo direla mollo o mogolo kudu go bontšha gore ba a mo hlompha.*