Lefitiko

8 Jehofa a tšwela pele a bolela le Moshe a re: 2 “Tšea Arone le barwa ba gagwe, diaparo tša bona tša boperisita, makhura a go tlotša motho ge a kgethwa, poo ya sebego sa sebe, dinku tše pedi tše tona le manki wa dinkgwa tšeo di sa omelwago, 3 gomme o kgoboketše setšhaba ka moka mojakong wa taberenakele.”

4 Ke moka Moshe a dira ka mokgwa wo Jehofa a mo laetšego ka gona, gomme setšhaba sa kgobokana mojakong wa taberenakele. 5 Moshe a bolela le setšhaba a re: “Se ke seo Jehofa a laetšego gore re se dire.” 6 Ka gona Moshe a batametša Arone le barwa ba gagwe gomme a ba hlapiša ka meetse. 7 Ka morago ga moo a apeša Arone seaparo, a mo tlema ka lepanta, a mo apeša le seaparo sa go hloka matsogo le efoda* a ba a mo tlema ka lepanta la yona gore e dule gabotse. 8 Ke moka a mo apeša phaphathiana ya sehubeng yeo e nago le maswikana, gomme mo go yona a tsenya Urime le Thumime.* 9 A mmofa ka tuku hlogong ke moka godimo ga yona ka mo pele a bea tšhipi ya go phadima ya gauta, e lego tšhipi e kgethwa.* Moshe a dira ka mokgwa wo Jehofa a bego a mo laetše ka gona.

10 Ke moka Moshe a tšea makhura a go tlotša motho ge a kgethwa gomme a tlotša taberenakele le dilo ka moka tšeo di bego di le ka go yona ke moka a di dira gore e be tše kgethwa. 11 Ka morago ga moo, a foketša a mangwe a makhura ao gašupa godimo ga aletare, a tlotša aletare le dibjana tša yona ka moka le sekotlelo sa yona sa go hlapela gotee le selo seo se bewago go sona e le gore a di dire tše kgethwa. 12 Mafelelong a tšea a mangwe a makhura ao a go tlotša motho ge a kgethwa, a a tšhela hlogong ya Arone, a mo tlotša gore a mo dire yo mokgethwa.

13 Ka morago ga moo, Moshe a batametša barwa ba Arone ke moka a ba apeša diaparo, a ba tlema ka mapanta a ba a ba rweša dituku. Moshe a dira ka mokgwa wo Jehofa a bego a mo laetše ka gona.

14 Ke moka a tliša poo ya sebego sa sebe, Arone le barwa ba gagwe ba bea diatla tša bona godimo ga hlogo ya poo yeo. 15 Moshe a e hlaba gomme a kgwatha madi a yona ka monwana, a a tlotša manakeng ka moka a aletare ke moka a dira gore aletare e hlweke.* Madi ka moka ao a šetšego a a tšhollela fase kgauswi le aletare gore a e dire e kgethwa e le gore a tle a direle dihlabelo tša go lebalelwa dibe go yona. 16 Ka morago ga moo Moshe a tšea lekhura ka moka leo le lego maleng, lekhura leo le lego sebeteng, dipshio tše pedi le makhura a tšona gomme a di beša gore di thuntšhe muši aletareng. 17 Ke moka Moshe a tšea poo yeo, letlalo la yona, nama ya yona le ditšhila tša yona tšeo di lego ka maleng, gomme a laela gore di fišwe ka mollo ka ntle ga ditente. A dira ka mokgwa wo Jehofa a bego a mo laetše ka gona.

18 Bjale a batametša nku e tona ya sebego sa go fišwa gomme Arone le barwa ba gagwe ba bea diatla tša bona godimo ga hlogo ya nku yeo. 19 Ka morago ga moo, Moshe a e hlaba gomme a foketša madi a yona mahlakoreng ka moka a aletare. 20 Ke moka Moshe a ripaganya nku yeo, a beša hlogo ya yona, diripana tša yona le makhura gore di thuntšhe muši. 21 Moshe a hlatswa mala a yona le maoto a yona ka meetse ke moka a beša nku yeo ka moka ya thuntšha muši aletareng. E be e le sebego sa go fišwa seo se nkgago bose seo se diretšwego Jehofa. Moshe a dira ka wona mokgwa wo Jehofa a bego a mo laetše ka gona.

22 Ke moka a batametša nku e tona ya bobedi, e lego nku ya go dira sehlabelo ge motho a bewa go ba moperisita, gomme Arone le barwa ba gagwe ba bea diatla tša bona godimo ga hlogo ya nku yeo. 23 Ka morago ga moo Moshe a e hlaba, gomme a tšea a mangwe a madi a yona a a tlotša karolong e boletiana ya tsebe ya le letona ya Arone le monwaneng o mogolo wa seatla sa gagwe sa le letona gotee le monwaneng o mogolo wa leoto la gagwe la le letona. 24 Ke moka Moshe a batametša barwa ba Arone a ba tlotša ka a mangwe a madi karolong e boletiana ya ditsebe tša bona tša ka go le letona le menwaneng e megolo ya diatleng tša bona tša le letona, gotee le menwaneng e megolo ya maoto a bona a le letona. Eupša madi ka moka ao a šetšego a a foketša mahlakoreng ka moka a aletare.

25 Ke moka a tšea makhura, mosela o nonnego le lekhura ka moka leo le bego le le maleng, lekhura leo le lego sebeteng, dipshio tše pedi le makhura a tšona le leoto la le letona. 26 Ka manking wa dinkgwa tšeo di sa omelwago woo o bego o le pele ga Jehofa, a tšea senkgwa setee sa nkgokolo seo se sa omelwago le senkgwa setee sa nkgokolo seo folouru ya sona e tšhetšwego ka makhura, ke moka a tšea le sephaphatha setee gomme a di bea godimo ga makhura le leotong la le letona la nku yeo. 27 Ka morago ga moo, a bea dilo tšeo ka moka ka diatleng tša Arone le tša barwa ba gagwe gomme ba di tšokoletša pele le morago e le sebego sa go tšokotšwa pele ga Jehofa. 28 Ke moka Moshe a di tšea diatleng tša bona a di beša tša thuntšha muši aletareng godimo ga sebego sa go fišwa. Dilo tšeo e be e le sehlabelo sa ge motho a bewa go ba moperisita. E be e le sebego sa go fišwa sa monkgo o bose woo o yago go Jehofa.

29 Ke moka Moshe a tšea sehuba a se tšokoletša pele le morago e le sebego sa go tšokotšwa pele ga Jehofa. Sehuba sa nku e tona sa ge motho a bewa go ba moperisita ya ba sa Moshe. Moshe a dira ka mokgwa wo Jehofa a bego a mo laetše ka gona.

30 Ka morago ga moo, Moshe a tšea a mangwe a makhura a go tlotša motho ge a kgethwa gotee le a mangwe a madi ao a bego a le aletareng ke moka a a foketša godimo ga Arone le diaparong tša gagwe le go barwa ba gagwe le diaparong tša bona. Ka go dira bjalo, a dira gore Arone le diaparo tša gagwe le barwa ba gagwe le diaparo tša bona e be tše kgethwa.

31 Ke moka Moshe a bolela le Arone le barwa ba gagwe a re: “Fufutšang nama yeo kgauswi le mojako wa taberenakele, le e jele moo gotee le senkgwa seo se lego ka manking wo o dirišwago ge motho a bewa go ba moperisita, ka gobane Modimo o ntaetše gore: ‘Se jewe ke Arone le barwa ba gagwe.’ 32 Nama le senkgwa seo se šetšego le di fiše ka mollo. 33 Le gona, le se ke la tloga kgauswi le mojako wa taberenakele ka matšatši a šupago go fihlela go fela matšatši a ge le bewa go ba baperisita, ka gobane go tla tšea matšatši a šupago gore le bewe go ba baperisita. 34 Jehofa o laetše gore re dire sona seo re se dirilego lehono, e le gore re dire dihlabelo tša gore le lebalelwe dibe. 35 Le se ke la tloga mojakong wa taberenakele. Le dule le le moo mosegare le bošego ka matšatši a šupago, gomme le dire mešomo yeo Jehofa a e laetšego gore re e dire e le gore le se ke la hwa, ka gobane se ke seo Modimo a ntaetšego sona.”

36 Ka gona, Arone le barwa ba gagwe ba dira dilo ka moka tšeo Jehofa a di laetšego Moshe.