Jesaya
54 Jehofa o re: “Goelela o thabile wena mosadi yo a sa kago a ba le bana.
Goelela o thabile gomme o thakgale, wena mosadi yo a sa kago a ba le dihlabi tša pelego.
Ka gobane bana ba mosadi yo a tlogetšwego
Ke ba bantšhi go feta ba mosadi yo a nago le monna.
2 “Katološa tente ya gago.
Phurolla diseila tša taberenakele ya gago e kgolo.
O se ke wa tšhaba. Dira gore dithapo tša tente ya gago e be tše ditelele,
Gomme o kokotele dipikiri tša tente ya gago di tie.
3 Ka gobane o tla phatlalalela ka go le letona le ka go le letshadi,
Gomme bana ba gago ba tla laola ditšhaba,
E bile ba tla dula le metseng ya marope.
4 O se ke wa tšhoga, ka gobane ga go na yo a tlago go go hlabiša dihlong,
Le gona o se ke wa ikwa o tlontlolotšwe, ka gobane ga go na yo a ka go nyamišago.
O tla lebala dihlong tša nakong ya ge o be o sa le moswa,
E bile o ka se sa gopola kamoo o ilego wa gobošwa ka gona nakong ya ge o be o sa le mohlologadi.”
5 “Mmopi wa gago yo Mogolo o bjalo ka monna wa gago,
Leina la gagwe ke Jehofa wa madira,
Yena Mokgethwa wa Isiraele yo a go rekolotšego.
O tla bitšwa Modimo wa lefase ka moka.
6 Ka gobane ge Jehofa a be a go bitša o be o swana le mosadi yo a tlogetšwego le yo a kwelego bohloko,
O swana le mosadi yo a nyetšwego e sa le yo moswa gomme ka morago a tlogelwa ke monna wa gagwe,” o realo Modimo wa gago.
7 “Ke ile ka go tlogela ka nakwana,
Eupša ke tla go buša ka kgaugelo e kgolo.
8 Ke ile ka go utela sefahlego sa ka ka nakwana ke galefile kudu,
Eupša ke tla go gaugela ka botho bja ka bja go ya go ile.”* Jehofa yo a go rekollago ke yena a bolelago se.
9 “Se se swana le mehla ya Noa.
Go no swana le ge ke ile ka ena ka re meetse a mehleng ya Noa a ka se sa khupetša lefase,
Ka gona ke ena gore nka se sa go galefela goba go go otla.
10 Ka gobane dithaba di ka tlošwa,
Gomme meboto e ka šikinyega,
Eupša ge e le nna ke tla dula ke le bontšha botho bja ka bjo bogolo,*
E bile kgwerano ya ka ya khutšo e ka se šikinyege.” Go bolela Jehofa, yena Modimo yo a le gaugelago.
11 “Wena mosadi yo a tlaišwago, yo a tšubutlwago ke ledimo le yo a sa homotšwego,
Ke go aga ka maswika le ka taka,
Gomme fantešeni ya gago ke tla e dira ka maswika a bohlokwa ao a bitšwago safire.
12 Ke tla aga leboto la gago la motse
Leo le šireletšegilego ka maswika a bohlokwa ao a bitšwago rubi,
Gomme ka aga le maboto a gago ka moka a motse ka maswika a bohlokwa.
13 Bana ba gago ka moka ba tla rutwa ke Jehofa,
Gomme khutšo ya bona e tla ata.
14 O tla tiišwa ke go loka.
Ga go na yo a tlago go go gatelela,
O ka se boife selo e bile ga go na selo seo se ka go tšhošago,
Ka gobane se ka se go batamele.
15 Ge go ka ba le motho yo a go hlaselago,
O tla be a sa laelwa ke nna.
Motho le ge e le ofe yo a lwago le wena o tla fenywa.”
16 “Bona! Ke nna ke bopilego setsebi sa mošomo wa diatla,
Seo se butšwetšago mollo wa magala,
Gomme mošomo wa sona ke go dira dibetša.
Le gona ke nna ke bopilego motho wa go diriša dibetša gore a senye.
17 Sebetša le ge e le sefe seo se diretšwego go lwa le wena se ka se atlege,
Gomme o tla ahlola leleme le ge e le lefe leo le lekago go bolela gampe ka wena tshekong.
Dilo tše tše dibotse ke bohwa bjo nna Jehofa ke tlago go bo nea bahlanka ba ka,
E bile ke ba bona ba lokile mahlong a ka,” o realo Jehofa.