Jobo
42 Ke moka Jobo a araba Jehofa a re:
2 “Bjale gona ke a tseba gore o kgona go dira dilo ka moka,
Le gore ga go na selo seo o se nagannego seo se ka go palelago.
3 Wena o itše: ‘Ke mang yena yo, yoo a belaelago diphetho tšeo ke di dirilego a sa tsebe selo?’
Nna ke boletše eupša ke be ke sa kwešiše
Dilo tše di makatšago tšeo ke sa di tsebego.
4 O itše: ‘Hle ntheetše gomme nna ke tla bolela.
Ke tla go botšiša dipotšišo wena wa nkaraba.’
5 Ke kwele ka wena ka mabarebare,
Eupša bjale gona ke a go bona.
6 Ke ka baka leo ke itsholelago dilo tšeo ke di boletšego,
Le gona ke dutše leroleng le meloreng go bontšha gore ke ipona molato.”
7 Ka morago ga gore Jehofa a botše Jobo mantšu a, Jehofa a bolela le Elifase wa go tšwa Themane a re:
“Ke galefetše wena le bagwera ba gago ba babedi, ka gobane ga se la bolela nnete ka nna, eupša Jobo mohlanka wa ka yena o boletše nnete ka nna. 8 Bjale wena le bagwera ba gago ba babedi tšeang dipoo tše šupago le dinku tše tona tše šupago le ye go mohlanka wa ka Jobo, le neele sehlabelo sa lena sa go fišwa, ke moka Jobo mohlanka wa ka o tla le rapelela. Ke tla mo kwa ge a kgopela gore ke se ke ka le otla, ka gobane ga se la bolela nnete ka nna, eupša yena o boletše nnete ka nna.”
9 Ka gona Elifase wa go tšwa Themane, Bilidada wa go tšwa Shua le Tsofara wa go tšwa Naama ba dira seo Jehofa a ba boditšego gore ba se dire, ke moka Jehofa a kwa thapelo ya Jobo.
10 Ka morago ga gore Jobo a rapelele bagwera ba gagwe, Jehofa o ile a tloša mathata a Jobo gomme a dira gore a hume gape. Jehofa a nea Jobo dilo tša go lekana le tšeo a bego a na le tšona mathomong, a di okeditše gabedi. 11 Bomorwarragwe ka moka le dikgaetšedi tša gagwe ka moka le bao e bego e le bagwera ba gagwe ba tla go yena, ba ja le yena ka ntlong ya gagwe. Ba ile ba mo kwela bohloko ka baka la mathata ka moka ao Jehofa a bego a dumeletše gore a mo wele gomme ba mo homotša. Yo mongwe le yo mongwe o ile a mo nea tšhelete le palamonwana ya gauta.
12 Jehofa o ile a šegofatša Jobo go feta mathomong, gomme Jobo o ile a ba le dinku tše 14 000 (dikete tše lesomenne), dikamela tše 6 000 (dikete tše tshelelago), dikgomo tše 2 000* (dikete tše pedi) le ditonki tše ditshadi tše 1 000 (sekete). 13 Le gona o ile a ba le barwa ba bangwe ba šupago le barwedi ba bangwe ba bararo. 14 Morwedi wa mathomo o ile a mo rea leina la Jemima, wa bobedi a mo rea la Ketsia gomme wa boraro a mo rea la Kerene-hapuka. 15 Nageng ka moka go be go se na basadi ba babotse go swana le barwedi ba Jobo. Tatago bona o ile a ba fa bohwa gotee le dikgaetšedi tša bona.
16 Ka morago ga dilo tše ka moka, Jobo o ile a tšwela pele a phela mengwaga e 140 (lekgolo-masomenne) gomme o ile a bona bana ba gagwe le ditlogolo tša gagwe go fihla ka moloko wa bone. 17 Jobo o ile a phela nako e telele e bile a ipshina ka bophelo, gomme mafelelong a hlokofala.