Puku ya Pele ya Dikoronika

22 Ke moka Dafida a re: “Ye ke ntlo ya Jehofa Modimo wa nnete gomme ye ke aletare yeo Isiraele e tlago go direla dibego tša go fišwa go yona.”

2 Ke moka Dafida a laela gore go kgoboketšwe batho bao ba tšwago dinageng tše dingwe bao ba dulago Isiraele. A ba fa mošomo wa go sega maswika le gore ba a bope ka tsela yeo a tlago go kgona go aga ntlo ya Modimo wa nnete. 3 Dafida a kgoboketša tšhipi e ntšhi kudu gore go dirwe dipikiri tša mabati a moo go tsenwago gona le dilo tša go swaraganya mabati. A tliša le koporo e ntšhi kudu yeo e bego e sa kalege, 4 gotee le dikota tša metsedara tše dintšhi kudu ka gobane Basidone le Batiro ba be ba tlišeditše Dafida dikota tša metsedara tše dintšhi kudu. 5 Ke moka Dafida a re: “Solomone morwa wa ka e sa le yo moswa e bile ga a na tsebo e ntšhi le gona ntlo yeo e swanetšego go agelwa Jehofa e swanetše go ba e kgolo kudu e le gore botumo bja yona le bobotse bja yona, di tsebje dinageng tšohle. Ka baka leo, ke tla mo lokišeletša dilo.” Ka gona Dafida a kgoboketša dilo tše dintšhi kudu pele ga ge a ka hlokofala.

6 Le gona, o ile a bitša Solomone morwa wa gagwe gomme a mo laela gore a agele Jehofa Modimo wa Isiraele ntlo. 7 Dafida a botša Solomone morwa wa gagwe a re: “Ge e le nna, pelong ya ka ke be ke ratile kudu go agela leina la Jehofa Modimo wa ka ntlo. 8 Eupša Jehofa o itše go nna: ‘O tšholotše madi a mantšhi kudu, e bile o lwele dintwa tše dikgolo. O ka se agele leina la ka ntlo, ka gobane o tšholotše madi a mantšhi lefaseng pele ga ka. 9 Tseba gore o tlo ba le morwa yo a tlago go phela ka khutšo e bile ke tla mo khutšiša go manaba a gagwe ka moka ao a mo dikologilego, ka gobane leina la gagwe e tla ba Solomone,* e bile mehleng ya gagwe ke tla dira gore Baisiraele ba phele ka khutšo e bile ba iketlile. 10 Ke yena a tlago go agela leina la ka ntlo. Yena o tla ba morwa wa ka gomme nna ka ba tatagwe. Ke tla dira gore mmušo wa gagwe o dule o le gona Isiraeleng.’

11 “Bjale morwa wa ka, ke rapelela gore Jehofa a be le wena, le gore o atlege gomme o age ntlo ya Jehofa Modimo wa gago, feela bjalo ka ge a boletše gore wena o tlo dira bjalo. 12 Go feta tšohle, anke Jehofa a go nee temogo le kwešišo ge a go nea matla a go buša Isiraele e le gore o kwe molao wa Jehofa Modimo wa gago. 13 Ke moka ge o ka kgonthišetša gore o kwa ditaelo le dikahlolo tšeo Jehofa a laetšego Moshe gore a di fe Baisiraele, o tla atlega. Eba le sebete gomme o tie matla. O se ke wa boifa goba wa tšhoga. 14 Ke šomile ka thata gore ke kgobokeletše ntlo ya Jehofa gauta yeo e lekanago dikhilokgerama tše 3 400 000 (dimilione tše tharo le dikete tše makgolo a mane)* le silifera yeo e lekanago dikhilokgerama tše 34 000 000 (dimilione tše masometharo-nne)* le koporo le ditšhipi tše dintšhi tšeo di sa kalegego. Ke kgobokeditše le dikota le maswika, eupša wena o tla di oketša. 15 O na le bašomi ba bantšhi e lego bao ba segago maswika, ba go šoma ka maswika, ba go šoma ka kota le batho ka moka bao ba nago le bokgoni bja go dira mehuta ka moka ya mešomo. 16 Go na le gauta, silifera, koporo le ditšhipi tše dintšhi kudu. Bjale thoma go šoma, anke Jehofa a be le wena.”

17 Ke moka Dafida a laela baetapele ka moka ba Isiraele gore ba thuše Solomone morwa wa gagwe, a re: 18 “Jehofa Modimo wa lena o na le lena e bile o le khutšišitše go manaba a lena ka moka ao a le dikologilego? Ka gobane o nthušitše gore ke fenye batho ba naga ye, gomme naga ye e laolwa ke Jehofa le batho ba gagwe. 19 Bjale ikemišetšeng go hlankela Jehofa Modimo wa lena ka dipelo tša lena ka moka le ka moya wa lena ka moka gomme le thomeng go aga sekgethwa sa Jehofa Modimo wa nnete, e le gore le kgone go tliša areka ya kgwerano ya Jehofa le dibjana tše kgethwa tša Modimo wa nnete ka ntlong yeo e agetšwego leina la Jehofa.”