Psalme
Tumišang leina la Jehofa,
Mo tumišeng lena bahlanka ba Jehofa,
2 Lena bao le hlankelago ntlong ya Jehofa,
Ka malapeng a ntlo ya Modimo wa rena.
3 Tumišang Jah, gobane Jehofa o lokile.
Opelang dikoša tša go tumiša leina la gagwe, gobane seo se a kgahliša.
5 Gobane nna ke tseba gabotse gore Jehofa ke yo mogolo,
Le gore Morena wa rena ke yo mogolo go feta medimo e mengwe ka moka.
6 Jehofa o dira selo se sengwe le se sengwe seo a ratago go se dira,
Legodimong le lefaseng, mawatleng le ka garegare ga wona.
7 O rotoša maru go tloga moo lefase le felelago gona,
O dira gore go be le magadima ge pula e ena,
O ntšha phefo lefelong leo a e beilego go lona.
8 O bolaile maitšibulo a Egepeta,
A batho le a diphoofolo.
9 O go rometše dipontšho le mehlolo, wena Egepeta,
A di romela Farao le bahlanka ba gagwe ka moka.
10 O bolaile ditšhaba tše dintšhi,
A ba a bolaya le dikgoši tše matla,
11 E lego Sihoni kgoši ya Baamore
Le Ogo kgoši ya Bashani,
A ba a fediša mebušo ka moka ya Kanana.
12 A tšea naga ya bona a e nea batho ba gagwe gore ba dule go yona,
Ya ba bohwa bja batho ba gagwe ba Isiraele.
13 Wena Jehofa, le ke leina la gago go ya go ile.
Wena Jehofa, o tla gopolwa melokong ka moka le go ya go ile.
14 Jehofa o tla lwela batho ba gagwe,
E bile o tla kwela bahlanka ba gagwe bohloko.
15 Medingwana ya ditšhaba e dirilwe ka silifera le gauta,
E dirilwe ke diatla tša motho.
16 E na le molomo, eupša ga e kgone go bolela.
E na le mahlo, eupša ga e kgone go bona.
17 E na le ditsebe, eupša ga e kgone go kwa.
Le gona ga e kgone go hema.
18 Bao ba e dirago ba tla swana le yona,
Le bohle bao ba e tshepilego.
19 Lena setšhaba sa Isiraele, retang Jehofa.
Lena ba lapa la Arone, retang Jehofa.
20 Lena ba lapa la Lefi, retang Jehofa.
Lena ba le boifago Jehofa, retang Jehofa.
21 Jehofa a a retwe ke barapedi ba gagwe bao ba lego Tsione,
Yena yo a dulago Jerusalema.
Tumišang Jah!