Doiteronomio

24 “Ge e ba monna a ka nyala mosadi gomme ka morago a se sa mo kgahla ka gobane a hweditše gore o dirile selo seo se lešago dihlong, gona monna yoo a ngwalele mosadi yoo lengwalo la tlhalo gomme a mo nee lona, ke moka a mo tlogele a tšwe ka ntlong ya gagwe. 2 Ka morago ga ge mosadi yoo a tšwele ka ntlong ya monna yoo, a ka nyalwa ke monna yo mongwe. 3 Ge e ba monna wa gagwe wa bobedi le yena a se sa mo rata, a mo ngwalele lengwalo la tlhalo gomme a mo nee lona, e bile a mo tlogele a sepele ntlong ya gagwe, goba ge e ba yena monna yoo wa bobedi a ka hlokofala, 4 gona monna wa gagwe wa pele yo a mo rakilego a ka se dumelelwe gore a mo nyale gape gore e be mosadi wa gagwe, ka gobane ga se a hlweka go monna yoo. Go dira bjalo ke selo seo se šišimišago go Jehofa. Le se ke la šilafatša naga yeo Jehofa Modimo wa lena a le neago yona gore e be ya lena ka go dira sebe sa mohuta woo.

5 “Ge monna a sa tšwa go nyala, ga se a swanela go ya ntweng goba go newa mošomo le ge e le ofe. A fetše ngwaga ka moka a dutše ntlong ya gagwe gomme a thabiše mosadi wa gagwe.

6 “Go se be le motho yo a tšeelago yo mongwe tšhilo goba lwala ge a sa dutše a mo letile gore a tle a mo patele, ka gobane o tla be a mo amoga dilo tšeo di mo thušago gore a phele.

7 “Ge e ba go ka hwetšwa motho yo a tšerego Moisiraele wa gabo ka kgang, a mo swara gampe e bile a ba a mo rekiša, gona motho yoo a bolawe. Ka gona, le tloše motho yo mobe mo gare ga lena.

8 “Ge go ka ba le bolwetši bja lephera, le netefatše gore le latela dilo ka moka tšeo baperisita bao e lego Balefi ba le laelago tšona. Le dire feela ka mokgwa wo ke ba laetšego ka gona. 9 Le gopoleng seo Jehofa Modimo wa lena a se dirilego Miriamo ge le be le le tseleng le etšwa Egepeta.

10 “Ge o ka adima motho yo mongwe selo le ge e le sefe, o se ke wa tsena ka ntlong ya gagwe wa itšeela selo seo a rilego o tla go nea sona gore o se sware go fihlela a go patela. 11 O eme ka ntle gomme motho yoo a go kolotago a tliše selo seo. 12 Ge e ba motho yoo e le modiidi, o se ke wa yo robala o swere seaparo seo a go neilego sona gore o se sware go fihlela a tlo go patela. 13 O bušetše seaparo seo a go neilego sona kapejana ka morago ga gore letšatši le sobele. Motho yoo o tla robala ka seaparo seo sa gagwe gomme a kgopela Modimo gore a go šegofatše. Ke moka seo se tla ra gore o dirile se se lokilego pele ga Jehofa Modimo wa gago.

14 “O se ke wa ropa motho yo o mo hirilego yo a hlakago le yo a diilago, e ka ba e le Moisiraele wa geno, goba e le motho yo e sego Moisiraele yo a dulago nageng ya geno. 15 O mo patele lona letšatšing leo pele letšatši le sobela, ka gobane o a diila e bile o ithekgile ka seo o tlago go mo patela ka sona gore a phele. Ge o ka se dire bjalo, motho yoo o tla llela Jehofa a mmotša ka wena, gomme seo sa ra gore wena o dirile sebe.

16 “Botate ba se ke ba bolawa ka baka la dibe tša bana ba bona, le bana ba se ke ba bolawa ka baka la dibe tša botatago bona. Motho yo mongwe le yo mongwe o swanetše go bolawa feela ka baka la sebe sa gagwe.

17 “O se ke wa ahlola motho yo e sego Moisiraele le tšhiwana ka go hloka toka, e bile o se ke wa tšea seaparo sa mohlologadi wa se swara go fihlela a go patela. 18 O gopole gore o be o le lekgoba nageng ya Egepeta, gomme Jehofa Modimo wa gago a go lokolla moo. Ke ka baka leo ke go laelago gore o dire se.

19 “Ge o ka re o buna ka tšhemong ya gago gomme wa lebala ngatana ka tšhemong, o se ke wa boela morago wa yo e tšea. O e tlogele gore e tle e tšewe ke tšhiwana, mohlologadi le motho yo e sego Moisiraele, e le gore Jehofa Modimo wa gago a tle a go šegofatše dilong ka moka tšeo o di dirago.

20 “Ge o hlohlora mohlare wa gago wa mohlware, o se ke wa boela wa tšea tšeo di šetšego makaleng a wona. O di tlogele gore di tle di tšewe ke tšhiwana, mohlologadi le motho yo e sego Moisiraele.

21 “Ge o fula diterebe serapeng sa gago sa meterebe, o se ke wa boela wa yo fula tšeo di šetšego. O di tlogele gore di tle di tšewe ke tšhiwana, mohlologadi le motho yo e sego Moisiraele. 22 O gopole gore o be o le lekgoba nageng ya Egepeta. Ke ka baka leo ke go laelago gore o dire se.