Hesekiele
16 Jehofa a bolela le nna gape a re: 2 “Morwa wa motho, botša Jerusalema dilo tše di šišimišago tšeo a di dirago. 3 O re: ‘Mmuši Morena Jehofa o botša Jerusalema o re: “Wena o tšwa nageng ya Bakanana ebile o belegetšwe gona. Tatago e be e le Moamore gomme mmago e le Mohethe. 4 Letšatšing leo o belegwego ka lona ga se wa ka wa ripša kalana, ga se wa ka wa hlapišwa ka meetse gore o hlweke, ga se wa ka wa tlotšwa ka letswai, le gona ga se wa ka wa phuthelwa ka mašela. 5 Ga go na motho yo a ilego a go kwela bohloko gomme a go direla dilo tše, le gona ga go na motho yo a ilego a go šokela, eupša ba ile ba go lahlela nageng ka gobane ba ile ba go hloya letšatšing la ge o be o belegwa.
6 “‘“Ge ke be ke feta ke ile ka go bona o ragaraga o le mading a gago, ka re go wena o le moo: ‘Phela!’ Ke ile ka bolela le wena o le moo mading a gago ka re: ‘Phela!’ 7 Ke ile ka dira gore o ate go swana le dimela tšeo di tletšego naga. O ile wa gola wa ba kgarebe ebile wa ikgabiša ka dilo tše dibotse kudu. Matswele a gago a ile a gola, le moriri wa gago wa gola eupša o be o sa dutše o se wa apara.”’
8 “‘Mmuši Morena Jehofa o re: ‘Ge ke feta ke ile ka go lebelela gomme ka go bona o godile gore o ka thoma go ratana. Bjale ke ile ka phurullela seaparo sa ka godimo ga gago ka go khupetša ka ge o be o se wa apara, gomme ka dira kgwerano le wena ke moka wa ba wa ka. 9 Ke ile ka go hlapiša ka meetse, ka tloša madi ao a bego a le mmeleng wa gago gomme ka go tlotša ka makhura. 10 Ke ile ka go apeša seaparo seo se kgabišitšwego, ka go nea dieta tša letlalo le boleta, ka go phuthela ka lešela le boletiana la linene ka ba ka go apeša diaparo tša go tura. 11 Ke ile ka go kgabiša ka dilo tša go kgabiša, ka go rweša maseka diatleng le pheta molaleng. 12 Ke ile ka go rweša lengina la nkong le mangina a ditsebeng, ka go rweša le mphapahlogo o mobotse hlogong. 13 O ile wa ikgabiša ka gauta le silifera, wa apara diaparo tša lešela le boletiana la linene le la go tura le seaparo seo se kgabišitšwego. Dijo tša gago di be di na le folouru yeo e šitšwego gabotse, todi ya dinose le makhura. O ile wa ba yo mobotsebotse gomme wa feleletša o swanelegela go ba kgošigadi.’”
14 “Mmuši Morena Jehofa o re: ‘O ile wa tuma ditšhabeng ka baka la botse bja gago. O be o ka se be botse ka tsela ye ge nkabe ke se ka go nea letago la ka.’”
15 “‘Eupša o ile wa thoma go tshepa bobotse bja gago gomme wa rekiša mmele ka ge o be o tumile. O ile wa rekišetša motho yo mongwe le yo mongwe yo a bego a feta ka tsela mmele, wa ba wa mo nea mmele wa gago. 16 O ile wa tšea tše dingwe tša diaparo tša gago tša mebalabala gomme wa kgabiša mafelo a gago a phagamego ao o rekišetšago mmele go ona. Dilo tša mohuta woo ga se tša swanela go ba gona, ebile ga se tša swanela go direga. 17 Le gona o ile wa tšea dilo tša gago tše dibotse tša go ikgabiša tša gauta le tša silifera yeo ke go neilego yona, wa itirela diswantšho tša banna wa otswa le tšona. 18 O ile wa tšea diaparo tša gago tšeo di kgabišitšwego wa di apeša diswantšho tšeo gomme wa di nea makhura a ka le diorelo tša ka. 19 Le gona o ile wa tšea borotho bjo ke bego ke go neile bjona gore o bo je, bjo bo dirilwego ka folouru yeo e šitšwego gabotse, makhura le todi ya dinose, wa bo neela diswantšho e le sehlabelo sa go nkga bose. Se ke sona seo se ilego sa direga,’ o realo Mmuši Morena Jehofa.”
20 “‘O ile wa tšea barwa le barwedi ba gago bao o mpelegetšego bona, wa direla diswantšho tšeo dihlabelo ka bona. Na go be go sa lekana gore o be o rekiša mmele, moo o ilego wa fetelela wa ba wa dira dihlabelo ka bana ba gago? 21 O bolaile bana ba ka, wa ba wa direla diswantšho tšeo dihlabelo ka bona.* 22 Ge o be o dira dilo tšeo ka moka tše di šišimišago ebile o rekiša mmele, ga se wa ka wa gopola nakong ya ge o be o sa le ngwana, o se wa apara, o hlobotše ebile o ragaraga mading a gago. 23 O wa madimabe! O wa madimabe ka baka la dilo tše mpe ka moka tšeo o di dirilego,’ o realo Mmuši Morena Jehofa. 24 ‘O ile wa ikagela mafelo a go rapela medimo ya maaka, wa itirela le lefelo la go rapela modingwana wa maaka mmarakeng o mongwe le o mongwe. 25 O ile wa ikagela mafelo a gago a go rapela medimo ya maaka mafelong ao a bonwago ke batho ka moka, seterateng se sengwe le se sengwe. O ile wa dira gore bobotse bja gago bo šišimiše ka go robala le motho yo mongwe le yo mongwe yo a fetago ka tsela, le gona o ile wa tšwela pele o rekiša mmele. 26 O ile wa rekišetša Baegepeta mmele, e lego baagišane ba gago bao ba nago le kganyogo e feteletšego ya thobalano, le gona o ile wa nkweša bohloko ka go no tšwela pele o rekiša mmele. 27 Bjale ke tla otlolla seatla sa ka gore ke go otle, ka ba ka dira gore o se sa ba le dijo, ebile ke tla dumelela gore basadi bao ba go hloilego ba dire se sengwe le sengwe seo ba se ratago ka wena, ke ra bona barwedi ba Bafilisita, bao ba ilego ba jewa ke dihlong ka baka la boitshwaro bja gago bjo bo šišimišago.
28 “‘Ka ge o be o sa kgotsofale, o ile wa rekišetša Baasiria mmele wa gago, eupša le gona moo o ile wa se kgotsofale. 29 O ile wa fetela pele nageng ya batho bao ba rekišago le go Bakaladea gore o yo rekiša mmele, eupša le gona moo o ile wa se kgotsofale. 30 Ge o be o dira dilo tše ka moka, o be o fokola, o itshwere bjalo ka motho yo a rekišago mmele yo a sa jewego ke dihlong,’ o realo Mmuši Morena Jehofa. 31 ‘O ile wa ikagela lefelo la go tlo rapela Modimo wa maaka mafelong ao a bonwago ke batho ka moka seterateng se sengwe le se sengwe, wa ba wa itirela le lefelo la go rapela modingwana wa maaka mmarakeng o mongwe le o mongwe. O be o sa swane le motho yo a rekišago mmele, ka gobane o ile wa gana go patelwa. 32 O mosadi yo a dirago bohlotlolo,* yo a robalago le banna ba bangwe go e na le go robala le monna wa gagwe. 33 Batho ba tlwaetše go fa batho bao ba rekišago mmele dimpho, eupša wena o neile batho ka moka bao ba bego ba kganyoga go robala le wena dimpho, ebile o file batho ba go tšwa thoko tšohle tšhelete gore ba tle ba robale le wena. 34 Ga o swane le basadi ba bangwe bao ba rekišago mmele. Dilo tšeo o di dirago di fapana le tšeo batho ba bangwe bao ba rekišago mmele ba di dirago. Batho ga ba patele gore ba robale le wena, eupša ke wena o ba patelago. Ga o dire dilo go swana le batho ba bangwe.’
35 “Bjale wena motho yo a rekišago mmele, ekwa seo Jehofa a se bolelago. 36 Mmuši Morena Jehofa o re: ‘Ka ge o bontšhitše gore o na le kganyogo e feteletšego ya go ba le thobalano, ebile batho ba go bone o se wa apara nakong ya ge o rekišetša batho bao o ratanago le bona mmele, ba bona le dilo ka moka tše di šišimišago tšeo o di dirago, ba ba ba bona le ge o be o direla medingwana dihlabelo ka madi a bana ba gago, 37 bjale ke kgoboketša batho ka moka bao o kilego wa robala le bona, bao o bego o ba rata le bao o bego o ba hloile. Ke tla ba kgoboketša gore ba tle ba lwe le wena go tšwa thoko tšohle, gomme ka go hlobola pele ga bona gore ba go bone o se wa apara selo.
38 “‘Ke tla go otla ka dikotlo tšeo di swanelago basadi bao ba hlotlolago le bao ba bolayago, ke tla dira gore o bolawe ka sehlogo ke kwatile ebile ke galefile.* 39 Ke tla dira gore ba go hlasele, ba tla phušola mafelo ao o a agilego a go rapela medimo ya maaka, ba go hlobodiša, ba tšea dilo tše dibotse tšeo o ikgabišago ka tšona, ba go tlogela o se wa apara selo o hlobotše. 40 Ba tla tliša batho ba bantši ba go kgatla ka maswika, ba ba ba go bolaya ka disabola. 41 Ba tla fiša dintlo tša gago ka mollo, ba ba ba go ahlola pele ga basadi ba bantši. Ke tla dira gore o se sa rekiša mmele, ke moka o tla tlogela go patela batho. 42 Nka se sa go galefela le go go kwatela. Ke tla iša maswafo fase gomme ka se sa kgopišega.’
43 “Mmuši Morena Jehofa o re: ‘Ka ge o lebetše gore ke ile ka go hlokomela ge o be o sa le ngwana gomme wa mpefediša ka go dira dilo tše ka moka, gona ke tla go otla ka baka la dilo tšeo o di dirilego. O ka se sa tšwela pele o itshwere gampe ebile o ka se sa dira dilo ka moka tšeo di šišimišago.’”
44 “‘Tseba gore batho bao ba dirišago diema ba tla bolela seema ka wena ba re: “Morwedi o swana le mmagwe!” 45 O no swana le mmago yo a bego a hloile monna wa gagwe le bana ba gagwe. Le gona o no swana le banabeno bao ba bego ba hloile banna ba bona le bana ba bona. Mmago e be e le Mohethe gomme tatago e le Moamore.’”
46 “‘Sesiago yo a dulago ka leboa la gago le barwedi ba gagwe ke Samaria, gomme ngwaneno yo a dulago ka borwa bja gago le barwedi ba gagwe ke Sodoma. 47 O dirile dilo tše mpe wa ba wa dira dilo tše di šišimišago tšeo ba bego ba di dira, eupša ka morago ga nakwana wa dira dilo tše mpe go feta tšeo ba bego ba di dira.’ 48 Mmuši Morena Jehofa o re: ‘Ke ikana ka nna Modimo yo a phelago gore Sodoma ngwaneno le barwedi ba gagwe ga se ba dira dilo tšeo wena le barwedi ba gago le di dirilego. 49 Tseba gore molato wa Sodoma ngwaneno e bile gore yena le barwedi ba gagwe ba be ba ikgantšha, ba na le dijo tše dintši ebile ba phela ba iketlile ba sa šetše selo, eupša ga se ba ka ba thuša batho bao ba hlakago le bao ba diilago. 50 Ba ile ba no tšwela pele ba ikgantšha ebile ba dira dilo tše di šišimišago pele ga ka. Ka gona ke ile ka bona go swanetše gore ke ba fediše.
51 “‘Dibe tšeo Samaria a di dirilego ga di lekane le seripa sa tšeo wena o di dirilego, wena o dirile dilo tše dintši kudu tšeo di šišimišago go feta banabeno. Ka baka la dilo tšeo o di dirilego, bona ba ile ba bonagala ba lokile go feta wena. 52 O tla tlontlollega ka gobane o ile wa dumelelana le tsela yeo banabeno ba bego ba itshwere ka yona. Ba lokile go go feta ka gobane wena o dirile dilo tše di šišimišago kudu go ba feta. Bjale hlabja ke dihlong o be o tlontlollege ka gobane o dirile gore banabeno ba bonagale ba lokile go go feta.’
53 “‘Ke tla kgoboketša batho ba bona bao ba thopilwego, le batho ba Sodoma bao ba thopilwego le barwedi ba gagwe, le batho bao ba thopilwego ba Samaria le barwedi ba gagwe, ka ba ka kgoboketša le batho ba gago bao ba thopilwego. 54 Ke tlo dira se e le gore o tlontlollege o be o lewe ke dihlong ka baka la seo o se dirilego ge o be o ba homotša. 55 Banabeno, e lego Sodoma le Samaria le barwedi ba bona, ba tla boela ba ba seo ba bego ba le sona mathomong, gomme wena le barwedi ba gago le tla boela la ba seo le bego le le sona mathomong. 56 Ge o be o ikgantšha, o be o bona Sodoma ngwaneno e se selo ebile o be o sa nyake le go bolela ka yena. 57 Ka nako yeo o be o se wa tšwa o tlontlollwa gore o dira dilo tše mpe. Gona bjale barwedi ba Siria le batho bao ba dulago kgauswi le yena ba a go goboša gomme barwedi ba Bafilisita le batho bao ba dulago kgauswi le bona ba a go kwera. 58 Wena o tla welwa ke ditlamorago tša boitshwaro bja gago bjo bobe le dilo tše di šišimišago tšeo o di dirilego,’ o realo Jehofa.”
59 “Mmuši Morena Jehofa o re: ‘Ke tla go otla go ya ka dilo tšeo o di dirilego, ka gobane ga se wa botegela kgwerano ya ka. 60 Eupša nna ke tla gopola kgwerano ya ka yeo ke e dirilego le wena ge o be o sa le moswa, ebile ke tla dira kgwerano ya go ya go ile le wena. 61 O tla gopola tsela yeo o bego o itshwere ka yona, gomme wa lewa ke dihlong ge o amogela banabeno ba bagolo go wena le ba banyenyane go wena. Ke tla go nea bona gore e be barwedi ba gago eupša e sego ka baka la kgwerano ya gago.’
62 “‘Ge e le nna ke tla tiiša kgwerano ya ka le wena gomme ke moo o tlago go tseba gore ke nna Jehofa, 63 O tla gopola dilo tšeo o di dirilego gomme wa lewa ke dihlong tša go bula le molomo ge ke tla be ke go lebalela go sa šetšwe dilo ka moka tšeo o di dirilego,’ o realo Mmuši Morena Jehofa.”