Lengwalo la Bobedi le le Yago go Bathesalonika

3 Ka gona, banabešo tšwelang pele le re rapelela, gore re kgone go tšwela pele re phatlalatša lentšu la Jehofa ka lebelo, gore batho ba le amogele ka tlhompho bjalo ka ge le lena le le amogetše ka tlhompho 2 e le gore Modimo a re phološe go batho ba babe le ba kotsi, ka gobane ga se batho ka moka bao ba nago le tumelo. 3 Eupša Morena o a botega, o tla le matlafatša a ba a le šireletša go Sathane.* 4 Le gona, ka ge re le balatedi ba Morena, re a le tshepa. Re a tseba gore le dira dilo tšeo re le laetšego gore le di dire ebile le tla tšwela pele le di dira. 5 Eka Morena a ka tšwela pele a le thuša go rata Modimo le go kgotlelela e le gore le kgone go tšwela pele le latela Kriste.

6 Bjale banabešo, re le fa ditaelo re diriša leina la Jesu Kriste Morena wa rena gore le kgaogane le ngwanabo rena yo mongwe le yo mongwe yo a sa dirego dilo ka thulaganyo ebile a sa phele ka go dumelelana le dilo tšeo re le boditšego tšona. 7 Lena le tseba gabotse gore le swanetše go dira eng gore le re ekiše ka gobane ga se ra ka ra itshwara gampe ge re be re na le lena. 8 Le gona ga se ra ka ra ja dijo tša motho mahala. Eupša re be re šoma ka thata bošego le mosegare e le gore re kgone go itlhokomela gore re se ke ra imetša le o tee wa lena. 9 Re na le tshwanelo ya gore re le kgopele gore le re thuše, eupša re be re nyaka go ba mohlala o mobotse go lena gore le re ekiše. 10 Le a tseba gore ge re be re na le lena re be re fela re le fa taelo yeo e rego: “Ge e ba motho a sa nyake go bereka, le go ja a se ke a ja.” 11 Ka gobane re kwele gore mo gare ga lena go na le batho bao ba dirago dilo tša go tšwa tseleng, ga ba bereke ebile ba tsenatsena ditaba tšeo di sa ba nyakego. 12 Batho ba mohuta woo re ba fa taelo le keletšo re diriša leina la Jesu Kriste Morena wa rena gore ba se ke ba tsenatsena ditaba tša batho, eupša ba šome ka thata gomme ba je dijo tšeo ba di bereketšego.

13 Ge e le lena banabešo, le se ke la lesa go dira se sebotse. 14 Eupša ge e ba motho le ge e le ofe a sa kwe dilo tšeo re di boletšego lengwalong le, le mmee leihlo* gomme le kgaogane le yena, gore a tle a hlabje ke dihlong. 15 Fela le se ke la mo tšea e le lenaba, eupša tšwelang pele le mo eletša ka ge e le ngwanabo rena.

16 Bjale re rapela gore eka Morena wa khutšo a ka le nea khutšo dilong ka moka. Eka Morena a ka ba le lena ka moka.

17 Nna Paulo, ke le ngwalela mantšu ao a go le dumediša ka seatla sa ka. Ye ke tsela yeo ke dulago ke ngwala mangwalo a ka ka moka gore le tle le tsebe gore ke nna ke a ngwadilego.

18 Eka Morena wa rena Jesu Kriste a ka le bontšha botho bjo bogolo ka moka ga lena.