Jesaya
9 Eupša leswiswi le ka se swane le la nakong ya ge naga e be e le tlalelong, go swana le nakong e fetilego ge naga ya Sebulone le naga ya Nafutali di be di nyatšwa. Ka morago Modimo o tla dira gore Galilea ya ditšhaba yeo e lego tseleng ya kgauswi le lewatle, tikologong ya Noka ya Jorodane, e hlomphege.
2 Batho bao ba bego ba sepela leswiswing
Ba bone seetša se segolo.
Ge e le bao ba dulago nageng ya leswiswi le lesoleso,
Ba hlabetšwe ke seetša.
3 O dirile gore setšhaba se be le batho ba bantšhi,
E bile o dirile gore se thabe kudu.
Setšhaba se se thabile pele ga gago
Go swana le ge batho ba thaba nakong ya puno,
Le go swana le ge batho ba thabile ge ba arolelana dilo tšeo ba di thopilego ntweng.
4 O robagantše joko yeo ba rwalago morwalo ka yona,
Kgati yeo e ba bethago magetla, le molamo wa yoo a ba gapeletšago go šoma,
O di robagantše go swana le nakong ya ge Midiane e fenywa.
5 Seeta sa lešole le lengwe le le lengwe seo se dirago gore lefase le thothomele ge se gata,
Le seaparo se sengwe le se sengwe seo se kgamathetšego madi,
Di tla fišwa mollong.
O tla bitšwa Moeletši yo Bohlale, Modimo yo Matla, Tate wa ka mo go sa Felego le Kgošana ya Khutšo.
7 Mmušo wa gagwe o tla buša kae le kae,
Gomme o tla ba le khutšo go ya go ile
Setulong sa bogoši sa Dafida le mmušong wa gagwe,
E le gore a o tiiše le go o matlafatša
Ka toka le ka go loka,
Go tloga gona bjale le go ya go ile.
Jehofa wa madira o tla dira seo ka mafolofolo.
8 Jehofa o ile a romela molaetša wa kahlolo go Jakobo,
Gomme kahlolo yeo ya wela Isiraele.
9 Setšhaba ka moka sa Efuraime le badudi ba Samaria
Ba tla tseba taba yeo,
Gomme ba bolela ka go ikgogomoša le ka go ikgantšha ba re:
10 “Dintlo tša ditena di wele,
Eupša rena re tla aga ka maswika ao a betlilwego.
Mehlare ya mesikamore* e remilwe,
Eupša rena re tla diriša mehlare ya metsedara.”
11 Jehofa o tla dumelela manaba a Retsini gore a lwe le yena gomme a mo fenye,
E bile o tla dira gore manaba a Baisiraele a mo hlasele,
12 Siria e tlo tšwelela ka bohlabela gomme Bafilisita ba tšwelela ka bodikela,
Ditšhaba tšeo di tla hlasela Baisiraele go swana le phoofolo yeo e gagoganyago phoofolo yeo e e bolailego.
Ka baka la dilo tše ka moka Modimo o tla dula a galefile,
E bile o tla dula a otlolotše letsogo la gagwe gore a ba otle.
13 Batho ga se ba boela go yoo a ba otlago,
Gomme ga se ba nyaka Jehofa wa madira.
14 Jehofa o tla ripa hlogo ya Isiraele le mosela wa yona ka letšatši letee,
E lego lekala le lehlaka tša Isiraele.
15 Motšofadi le motho yo a hlomphegago ke hlogo,
Gomme moporofeta yo a neago ditaelo tša maaka ke mosela.
16 Bao ba etelelago batho ba pele ba dira gore ba timele,
Gomme bao ba etelelwago pele, ba gakanegile.
17 Ke ka baka leo Jehofa a ka se thabišwego ke masogana a bona,
E bile a ka se gaugele ditšhiwana tša bona le bahlologadi ba bona,
Ka gobane ka moka ga bona ba hlanogetše Modimo e bile ba dira dilo tše mpe.
Le gona ka moka ga bona ba bolela dilo tše mpe.
Ka baka la dilo tše ka moka Modimo o tla dula a galefile,
E bile o tla dula a otlolotše letsogo la gagwe gore a ba otle.
18 Ka gobane bobe bo tuka go swana le mollo.
Bo tla fiša mehlašana ya meetlwa le ngwang.
Bo tla tšhuma sethokgwa
Gomme sa tupa muši.
19 Naga e tšhungwa ka mollo
Ka baka la ge Jehofa wa madira a galefile,
Gomme batho e tla ba dikgong tša go bešetša mollo woo.
Ga go yo a tlago go kwela le ngwanabo bohloko.
20 Motho o tla sega nama ka go le letona gore a e je
Eupša a no fela a swerwe ke tlala,
Gomme yo mongwe o tla ja nama ka go le letshadi
Eupša a se khore.
Yo mongwe le yo mongwe o tla ja nama ya letsogo la gagwe.
21 Manase o tla ja Efuraime,
Gomme Efuraime a ja Manase.
Ka moka ga bona ba tla hlasela Juda.
Ka baka la dilo tše ka moka Modimo o tla dula a galefile,
E bile o tla dula a otlolotše letsogo la gagwe gore a ba otle.