Hesekiele

2 Ke moka a re go nna: “Morwa wa motho, emelela gore ke bolele le wena.” 2 Ge a bolela le nna, moya wa Modimo o ile wa tla go nna gomme wa dira gore ke emelele, e le gore ke kwe yo a bolelago le nna.

3 Ke moka a tšwela pele a re go nna: “Morwa wa motho, ke go roma go batho ba Isiraele, e lego setšhaba sa dinganga, bona batho bao ba ilego ba se nkwe. Bona le borakgolokhukhu ba bona ba tshetše melao ya ka go fihla le lehono le. 4 Batho bao ke go romago go bona ba na le kgang le dihlogo tše thata. O ba botše gore mantšu ao o a bolelago a tšwa go Mmuši Morena Jehofa. 5 Go sa šetšwe gore ba tla theetša goba ba gana, ka ge e le batho ba go se kwe, se se šalago ke gore ba tla tseba gore moporofeta o be a le gona gare ga bona.

6 “Eupša wena morwa wa motho, le ge o dikologilwe ke batho ba dinganga le bao ba hlabago bjalo ka meetlwa ebile o dula gare ga diphepheng, ba se ke ba go tšhoša le gona o se ke wa tšhošwa ke seo ba se bolelago. O se ke wa tšhošwa ke dilo tšeo ba di bolelago le gona o se ke wa boifišwa ke difahlego tša bona ka ge e le batho ba go se kwe. 7 O ba botše mantšu a ka, go sa šetšwe gore ba a theetša goba ga ba theetše, ka gobane ke batho ba go se kwe.

8 “Eupša ge e le wena morwa wa motho, theetša seo ke go botšago sona. O se ke wa gana go kwa go swana le batho ba ba go se kwe. Bula molomo o je seo ke go neago sona.”

9 E rile ge ke lebelela, ka bona motho a otlollela seatla go nna a swere lengwalo la go phuthwa leo go bego go na le seo se ngwadilwego go lona. 10 Ge a le phurolla pele ga ka, le be le ngwadilwe ka pele le ka morago. Le be le ngwadilwe dikoša tša sello, dilo tšeo di kwešago bohloko le tšeo di llišago.