Psalme

144 A go retwe Jehofa Leswika la ka,

Yoo a ntlwaetšago ntwa

Gomme a ntokišeletša go lwa.

 2 O mpontšha lerato le le botegago e bile ke tšhabela go yena.

Ke lefelo la ka la go ikuta e bile ke mophološi wa ka.

Ke kotse ya ka e bile o a ntšhireletša.

O dira gore batho ba ditšhaba ba be ka tlase ga ka.

 3 Wena Jehofa, motho ke’ng ge o bile o mo tšeela godimo?

Ngwana wa motho ke’ng ge o bile o tshwenyega ka yena?

 4 Motho yena o swana le mohemo,

Matšatši a gagwe a bophelo a swana le moriti wo o fetago.

 5 Wena Jehofa, theoga bjalo ka ge eka o theoša magodimo.

Kgwatha dithaba gomme o di dire gore di thunye muši.

 6 Dira gore go be le magadima gore o gašanye manaba a ka.

Thuntšha mesebe ya gago gore o a gakantšhe.

 7 Otlolla seatla sa gago o le legodimong.

Nntšhe gomme o mphološe ka meetseng a mantšhi.

Mphološe go batho bao ba tšwago dinageng tše dingwe,

 8 Bao ba bolelago maaka,

Le bao ba bolelago maaka le ge ba ikanne gore ba tla bolela nnete.*

Ke tla go opelela dikoša tša go go reta ka seletšo sa metato e lesome,

10 Wena yoo o dirago gore dikgoši di fenye,

Wena yoo o šireletšago mohlanka wa gago Dafida gore a se ke a bolawa ka tšhoša.

11 Nntšhe gomme o mphološe go batho bao ba tšwago dinageng tše dingwe,

Bao ba bolelago maaka,

Le bao ba bolelago maaka le ge ba ikanne gore ba tla bolela therešo.*

12 Ke moka barwa ba rena ba tla ba bjalo ka dimela tšeo di golago ka lebelo,

Gomme barwedi ba rena ba ba bjalo ka diphilara tšeo di kgabišago dikhona tša ntlo ya ka mošate.

13 Dintlo tšeo re bolokelago dijo ka go tšona di tla tlala ka dijo tša mehutahuta.

Mehlape yeo e lego mašemong a rena e tla ba e mentšhi kudu gomme e ka se balege.

14 Dikgomo tša rena di ka se tswale pele ga nako, e bile di ka se hwelwe ke dinamane tšeo di se šego tša tswalwa.

Go ka se kwagale sello sa batho mebarakeng.