Psalme
Ditaelo tšeo di yago go mohlahli. Koša ya Dafida.
19 Dilo tšeo di lego magodimong di bolela ka letago la Modimo,
E bile di bolela ka mediro ya diatla tša gagwe.
2 Letšatši le lengwe le le lengwe di a bolela,
Gomme bošego bjo bongwe le bjo bongwe di utolla tsebo ya gagwe.
3 Ge di bolela ga di ntšhe mantšu,
Ga di na mantšu e bile ga go na motho yo a ka di kwago ge di bolela.
4 Eupša modumo wa tšona o kwagala lefaseng ka moka.
Molaetša wa tšona le wona o kwagala lefaseng ka moka.
Modimo o diretše letšatši tente magodimong.
5 Letšatši le swana le monyadi ge a etšwa ka phapošing ya gagwe.
Le swana le monna wa mogale yo a thabelago go kitima tseleng ya gagwe.
6 Le tšwelela ka lehlakoreng le lengwe la magodimo,
Gomme la ya ka lehlakoreng le lengwe la ona.
Phišo ya lona e fihla mo gohle.
7 Molao wa Jehofa o phethagetše, o dira gore batho ba boele ba be le matla.
Ditaelo tša Jehofa di a tshepega, di dira gore yo a se nago tsebo a be bohlale.
8 Dilo tšeo Jehofa a re laelago tšona di lokile, di dira gore pelo e thabe.
Molao wa Jehofa o hlwekile, o dira gore mahlo a phadime.
9 Go boifa Jehofa ke mo gobotse, le gona batho ba swanetše go mmoifa go ya go ile.
Dikahlolo tšeo Jehofa a di dirago ke tša nnete, e bile di lokile ka moka.
10 Di dumiša kudu go feta gauta,
Le go feta gauta e ntšhi yeo e sekišitšwego,
Di bose go feta todi yeo e elelago e etšwa ka gare ga mamapo a dinose.
11 Modimo, o diriša melao ya gago go ruta mohlanka wa gago gore a pheme go sepela tseleng yeo e fošagetšego.
Ge a e latela, o tla holega kudu.
12 Ke mang yo a ka lemogago diphošo tša gagwe?
Ntebalele dibe tšeo ke di dirilego ke sa lemoge.
13 O se ntese ke dira dilo tša go ikgantšha,
O se di dumelele gore di ntaole.
Ka go realo nka se be le molato,
E bile nka se be le molato wa dibe tše dikgolo.
14 Anke dilo tšeo ke di bolelago le tšeo ke di naganago di go kgahle,
Wena Jehofa, o Leswika leo ke tšhabelago go lona e bile o Mophološi wa ka.