Jeremia
1 A ke mantšu a Jeremia morwa wa Hilikia, e lego yo mongwe wa baperisita bao ba bego ba le Anathothe nageng ya Benjamini. 2 Jehofa o ile a bolela le yena ka ngwaga wa bo-13 wa ge go buša Josia morwa wa Amone, kgoši ya Juda. 3 Le gona o ile a bolela le yena gape mehleng ya Jehoyakima morwa wa Josia, kgoši ya Juda, go fihlela Tsedekia morwa wa Josia, kgoši ya Juda, a fetša go buša ka ngwaga wa bo-11, e lego go fihlela ge Jerusalema e išwa bothopša ka kgwedi ya bohlano.
4 Jehofa o ile a bolela le nna a re:
5 “Ke go tsebile le pele ke go bopa ka popelong,
Ke ile ka dira gore o be yo mokgethwa le pele o belegwa.
Ke dirile gore o be moporofeta ditšhabeng.”
6 Eupša nna ke ile ka re: “Aowa hle Mmuši Morena Jehofa!
Ga ke tsebe go bolela, ka gobane ke fo ba mošemanyana.”
7 Ke moka Jehofa a re go nna:
“O se ke wa re o fo ba mošemanyana,
Ka gobane o swanetše go ya go batho ka moka bao ke go romago go bona,
E bile o swanetše go bolela dilo ka moka tšeo ke go laelago tšona.
8 O se ke wa ba tšhaba,
Ka gobane ‘ke na le wena gore ke go phološe,’ o realo Jehofa.”
9 Jehofa a napa a otlolla seatla sa gagwe a kgwatha molomo wa ka. Ke moka Jehofa a re go nna: “Ke tsentše mantšu a ka ka molomong wa gago. 10 Tseba gore lehono ke go neile matla a gore o laole ditšhaba le mebušo, o tumole, o kgereše, o fediše, o phušole, o age o be o bjale.”
11 Jehofa a bolela le nna gape a re: “O bona’ng Jeremia?” Nna ka re: “Ke bona lekala la mohlare wa moalemonte.”
12 Jehofa a re go nna: “O bone gabotse, ka gobane ke dula ke phafogile e le gore ke phethe seo ke se boletšego.”
13 Jehofa a bolela le nna ka lekga la bobedi a re: “O bona’ng?” Nna ka re: “Ke bona pitša yeo e belago, gomme molomo wa yona o furaletše ka leboa gomme o lebeletše ka borwa.” 14 Ke moka Jehofa a re go nna:
“Masetlapelo a tla tla a etšwa ka leboa,
A tlela batho ka moka bao ba dulago mo nageng.
15 Ka gobane ‘ke bitša meloko ka moka ya mebušo ya ka leboa,’ o realo Jehofa,
‘Meloko yeo e tla tla, gomme o mongwe le o mongwe wa yona
Wa bea setulo sa wona sa bogoši dikeiting tša Jerusalema,
Kgauswi le maboto a yona ka moka
Le kgauswi le metse ka moka ya Juda.
16 Ke tla ba botša gore ke tlo ba ahlola bjang ka baka la dilo ka moka tše mpe tšeo ba di dirilego,
Ka gobane ba ntlogetše,
Gomme ba direla medimo e mengwe dihlabelo,
E bile ba khunamela dilo tšeo ba di dirilego ka diatla tša bona.’
17 “Eupša wena o swanetše go itokiša,
Gomme o eme o ba botše dilo ka moka tšeo ke go laelago tšona.
O se ke wa ba boifa,
E le gore ke se ke ka go tšhoša pele ga bona.
18 Ka gobane lehono ke go dirile motse o šireleditšwego,
Philara ya tshipi le maboto a koporo e le gore o eme o tiile,
Gomme o bolele seo se tlago go diragalela naga ka moka,
Dikgoši tša Juda le dintona, baperisita le batho ba mo nageng.
19 Ruri ba tla lwa le wena,
Eupša ba ka se go fenye,
Ka gobane ‘ke na le wena e le gore ke go phološe,’ o realo Jehofa.”