Jeremia
49 Se ke seo Jehofa a se bolelago mabapi le Baamoni:
“Na Baisiraele ga ba na barwa?
Na ga ba na batho bao ba tlago go ja bohwa bja bona?
Ke ka baka la’ng modimo yo a bitšwago Malikamo a dula nageng ya Gada?
Le gona ke ka baka la’ng batho ba gagwe ba dula metseng ya Isiraele?”
2 Jehofa o re: “‘Ka gona, tsebang gore go tla nako yeo ka yona
Ke tlago go dira gore go kwale mokgoši wa ntwa ya go lwa le Raba ya Baamoni.
Raba e tla fetoga mmoto wa lešope,
Gomme metse ya kgauswi le yona e tla tšhungwa ka mollo.’
‘Le gona Baisiraele ba tla tšea gape naga yeo ba bego ba ba amogile yona,’ o realo Jehofa.
3 ‘Lla gabohloko wena Heshibone, ka gobane Ai e fedišitšwe!
Goelelang, lena metse yeo e lego kgauswi le Raba.
Aparang diaparo tša masaka.
Llang le ralaleng gare ga mašaka ao a dirilwego ka maswika,
Ka gobane Malikamo yena o tla ya bothopša,
Yena le baperisita ba gagwe le dikgošana tša gagwe.
4 Goreng o ikgantšha ka meedi ya gago,
Yona yeo e elago meetse, wena morwedi wa go se tshepege,
Yo a tshepilego mahumo a gagwe gomme a re:
“Ga go na yo a tlago go ntlhasela.”’”
5 Mmuši Morena Jehofa wa madira o re: “‘Bjale ke go tlišetša selo seo se tlago go go tšhoša,
Seo se tšwago go batho ka moka bao ba lego kgauswi le wena.
Le tla tšitlanywa, gomme la išwa mafelong ka moka,
Le gona ga go na yo a tlago go kgoboketša bao ba tšhabago.’”
6 Jehofa o re: “‘Eupša ka morago ga moo ke tla kgoboketša Baamoni bao ba thopilwego.’”
7 Jehofa wa madira o bolela mabapi le Edomo gore:
“Na batho ba Themane ga ba sa na bohlale?
Na bao ba nago le keletšo e botse ga ba sa na kwešišo?
Na bohlale bja bona ga se bja fetoga lefeela?
8 Tšhabang, le boeleng morago!
Lena badudi ba Dedane, sepelang gomme le tseneng ka meleteng le utame!
Ka gobane ke tlo tlišetša Esau masetlapelo
Ge nako ya gore ke mo otle e fihla.
9 Ge batho ba ba fulago diterebe ba be ba ka tla go wena,
Na ba be ba ka se tlogele tše dingwe gore batho ba bangwe ba di tope?
Ge e ba mahodu a be a ka tla bošego,
A be a tla senya ka mokgwa wo a nyakago ka gona.
10 Eupša ke tla tšeela Esau selo se sengwe le se sengwe.
Ke tla utolla mafelo a gagwe a go ikuta,
E le gore a se sa kgona go utama go ona.
Bana ba gagwe, meloko ya gagwe le baagišane ba gagwe ba tla fedišwa ka moka,
Gomme yena a se sa ba gona.
11 Tlogela ditšhiwana tša gago,
Gomme ke tla dira gore di phele.
Ge e le bahlologadi ba gago bona ba tla ntshepa.”
12 Jehofa o re: “Ge e ba bao ba bego ba se ba ahlolelwa go nwa komiki ya bogale bja ka ba swanetše go e nwa, na wena o tla tlogelwa o se wa otlwa? O ka se tlogelwe o se wa otlwa, ka gobane o swanetše go e nwa.”
13 Jehofa o re: “Ke ikanne ka nna gore Botsera e tla tšhoša batho, ya gobošwa, ya senywa ya ba ya rogakwa, gomme metse ya yona ka moka e tla ba marope go ya go ile.”
14 Go na le taba yeo ke e kwelego go Jehofa,
E bile go na le moromiwa yo a romilwego ditšhabeng gore a re:
“Kgobokanang gomme le lwe le Edomo,
Itokišetšeng go yo lwa.”
15 “Tseba gore ke go dirile yo monyenyane gare ga ditšhaba,
O yo a nyatšegago gare ga batho.
16 Wena yo a dulago leswikeng leo le lego leweng
Le mebotong yeo e lego malekelekeng,
O forilwe ka gobane batho ba a go tšhaba,
Le ka gobane o ikgantšha ka pelong.
Le ge o aga sehlaga sa gago kua godimo go swana le ntšhu,
Ke tla go fološa gona moo,” o realo Jehofa.
17 “Le gona Edomo e tla tšhoša batho. Motho yo mongwe le yo mongwe yo a fetago go yona o tla e tomolela mahlo a tšhogile, a e leletša molodi a kgotsa ka baka la dikotlo tša yona ka moka.” 18 Jehofa o re: “Go no swana le ge Sodoma le Gomora le metsana yeo e agišanego le tšona di ile tša fedišwa, ga go na motho yo a tlago go dula Edomo, e bile ga go na motho yo a tlago go phela moo.
19 “Tseba gore motho yo mongwe o tla tla bjalo ka tau yeo e tšwago sethokgweng seo se bofaganego seo se lego kgauswi le Noka ya Jorodane, gomme a hlasela mafelo ao a šireletšegilego a Edomo ao diphoofolo di fulago go ona. Eupša ke tla mo raka kapelapela mo nageng, e bile ke tla mo kgethela moetapele. Gobane ke mang yo a swanago le nna, e bile ke mang yo a ka lwago le nna? Le gona ke modiši ofe yo a ka thibelago seo ke nyakago go se dira? 20 Ka gona, lena batho ekwang seo Jehofa a phethilego go se dira mabapi le Edomo le seo a nagannego go se dira badudi ba Themane.
Ruri diphoofolo tše dinyenyane mohlapeng di tla gogoišwa.
Lefelo la tšona le tla fetoga lešope ka baka la dilo tšeo ba di dirilego.
21 Modumo wa ge Edomo e ewa, o ile wa dira gore lefase le šikinyege.
Go kwagala sello!
Sello seo se kwagetše le go fihla Lewatleng le Lehwibidu.
22 Tseba gore go no swana le ge ntšhu e theogela fase gore e phamole seo e nyakago go se bolaya,
Le lenaba le tla phurollela diphego tša lona Botsera.
Letšatšing leo, mašole a Edomo a tla ba tlalelong go swana
Le mosadi yo a belegago.”
23 Molaetša wa mabapi le Damaseko o re:
“Hamathi le Arapadi di hlabilwe ke dihlong,
Ka gobane di kwele ditaba tše di sa kgahlišego.
Di tšhogile wa go hwa.
Batho ba swana le lewatle leo le huduegilego, leo go se nago motho yo a ka kgonago go le homotša.
24 Damaseko e feletšwe ke matla.
E leka go tšhaba eupša go a pala.
Ka gobane e gakanegile, e tlaletšwe,
E bile e kwa bohloko go swana le mosadi yo a belegago.
25 Go tla bjang gore motse wo o tumišwago ga se wa hlwa o lahlwa,
Wona wo badudi ba ona ba kilego ba thaba?
26 “Ka gona masogana a wona a tla šala a rapaletše mebarakeng ya motse wo,
Gomme mašole ka moka a tla bolawa letšatšing leo,” o realo Jehofa wa madira.
27 “Ke tla tšhuma leboto la Damaseko ka mollo,
Gomme mollo woo wa fiša le mafelo ao a šireletšegilego a Bene-hadada.
28 Jehofa o bolela mabapi le Kedara le mebušo ya Hatsora, yeo Kgoši Nebukadinetsara wa Babilona a e hlasetšego, o re:
“Emang le yeng Kedara,
Gomme le fediše batho bao ba dulago ka Bohlabela.
29 Ditente tša bona, mehlape ya bona, diseila tša bona le dithoto tša bona ka moka di tla tšewa.
Dikamela tša bona le tšona di tla tšewa.
Batho ba tla goeletša ba re:
‘Go direga dilo tšeo di tšhošago feela mo gohle!’”
30 “Jehofa o re:
“Lena badudi ba Hatsora, tšhabelang kgole, sepelang le yo dula ka meleteng,
Ka gobane Kgoši Nebukadinetsara wa Babilona o logile maano a go le hlasela,
E bile o naganne go le tlišetša masetlapelo.”
31 “Emang le hlaseleng setšhaba seo se iketlilego, sona setšhaba seo se dulago ka khutšo!
Ga se na mejako goba dikota tša go tswalela mejako,
Se ituletše thokwana,” o realo Jehofa.
32 Dikamela tša setšhaba seo di tla tšewa,
Le diruiwa tša sona tše dintšhi le tšona di tla tšewa.
Batho bao ba kotilego dihlogo ka mo mahlakoreng,
Ke tla ba gašanyetša kae le kae moo moya o yago gona,
E bile ke tla ba tlišetša masetlapelo go tšwa mathokong ka moka,” o realo Jehofa.
33 “Hatsora e tla fetoga lefelo leo go dulago diphukubje,
E tla ba lešope go ya go ile.
Ga go na yo a tlago go dula moo,
E bile ga go na motho yo a tlago go phela moo.”
34 Ge Kgoši Tsedekia wa Juda a sa tšwa go thoma go buša, Jehofa o ile a bolela le moporofeta Jeremia mabapi le Elama, a re: 35 “Jehofa wa madira o re: ‘Ke roba bora bja* Baelama, e lego bjona bo ba thušago gore ba be le matla. 36 Ke tla tlišetša Baelama diphefo tše nne tše di tšwago dikarolong tše nne tša magodimo gomme ke tla ba gašanyetša diphefong tšeo tše nne ka moka, ga go na setšhaba seo Baelama bao ba gašantšwego ba ka se yego go sona.’”
37 “Ke tla pšhatlaganya Baelama pele ga manaba a bona le pele ga bao ba nyakago go ba bolaya. Ke ba tlišetša masetlapelo, ka ba ka ba tukela bogale. Ke tla ba bolaya ka sabola go fihlela e ba fetša ka moka,” o realo Jehofa.
38 “Le gona ke tla bea setulo sa ka sa bogoši kua Elama, gomme ka fediša kgoši le dikgošana tša moo,” o realo Jehofa.
39 “Eupša mehleng ya bofelo ke tla kgoboketša batho bao ba thopilwego ba Elama,” o realo Jehofa.