Hesekiele

10 Ge ke dutše ke lebeletše, ke ile ka bona selo se se swanago le leswika le bohlokwa leo le bitšwago safire se le ka godimo ga leratadima leo le bego le le ka godimo ga dihlogo tša bakerubi. Selo seo se be se swana le setulo sa bogoši. 2 Modimo a bolela le monna yo a aperego lešela la linene a re: “Tsena magareng ga maotwana a dikologago, ka tlase ga bakerubi, o tlatše diatla tša gago ka magala a mollo ao a lego gare ga bakerubi o be o a gaše godimo ga motse.” Ke moka monna yoo a tsena ke mo lebeletše.

3 Bakerubi bao ba be ba eme ka lehlakoreng le letona la tempele ge monna yoo a tsena gomme leru le be le tletše ka lapeng la ka gare. 4 Letago la Jehofa la tloga go bakerubi la ya mojakong wa tempele yeo. Gsanyenyane-ganyenyane leru la tlala ka tempeleng gomme lapa lona le be le phadima gohle ka letago la Jehofa. 5 Modumo wa maphego a bakerubi o be o kwagala le ka lapeng la ka ntle. O be o swana le modumo wa ge Modimo Ramatlaohle a bolela.

6 Ke moka Modimo a laela monna yo a aperego lešela la linene a re: “Tšea mollo wo o lego gare ga maotwana ao, gare ga bakerubi.” Monna yoo a napa a tsena gomme a ema kgauswi le leotwana. 7 Yo mongwe wa bakerubi bao a otlollela seatla sa gagwe mollong wo o bego o le gare ga bakerubi, a tšea a mangwe a magala ao a a bea ka diatleng tša monna yola yo a aperego lešela la linene, yena a a tšea a tšwa moo. 8 Ka tlase ga maphego a bakerubi bao go ile gwa bonagala selo se sengwe seo se swanago le diatla tša motho.

9 Ge ke dutše ke lebeletše ke ile ka bona maotwana a mane kgauswi le bakerubi. Kgauswi le mokerubi yo mongwe le yo mongwe go be go na le leotwana. Maotwana ao a be a phadima go swana le leswika le bohlokwa leo le bitšwago kirisolite. 10 Maotwana ao ka moka a be a swana ka ponagalo. A be a bonagala bjalo ka ge eka leotwana le ka gare ga leotwana le lengwe. 11 Ge a be a sepela a be a kgona go ya ka mahlakoreng ka moka a mane a sa retologe. Ka gobane a be a kgona go ya moo hlogo ya mokerubi e lebeletšego gona ntle le gore a retologe. 12 Mebele ka moka ya bakerubi, mekokotlo ya bona, diatla tša bona le maphego a bona, di be di tletše mahlo gohle. Go be go na le maotwana kgauswi le bakerubi bao ba bane ao le ona a bego a tletše mahlo gohle. 13 Ke ile ka kwa lentšu le goeletša le botša maotwana ao le re: “A re yeng lena maotwana!”

14 Mokerubi yo mongwe le yo mongwe o be a na le difahlego tše nne. Sefahlego sa pele e be e le sa mokerubi, sa bobedi e le sa motho, sa boraro e le sa tau gomme sa bone e le sa ntšhu.

15 Ge bakerubi bao ba rotoga, e be e le tšona diphedi tšela ke di bonego nokeng ya Kebara. 16 Ge bakerubi bao ba sepela, maotwana ao a be a sepela kgauswi le bona, ge ba kukela maphego a bona godimo, maotwana ao a be a sa retologele lehlakoreng le lengwe ebile a be a dula a le kgauswi le bona. 17 Ge diphedi tšeo di ema, le maotwana ao a be a ema, ge di be di eya godimo le ona a be a eya godimo ka gobane moya wo o bego o le dipheding tšeo o be o le maotwaneng ao.

18 Letago la Jehofa le ile la tloga mojakong wa tempele gomme la ema godimo ga bakerubi. 19 Bakerubi ba napa ba kukela maphego a bona godimo ba fofela godimo ke ba lebeletše. Ge ba be ba tloga, maotwana le ona a be a le kgauswi le bona, ke moka ba ema keiting yeo e lego ka bohlabela bja ntlo ya Jehofa gomme letago la Modimo wa Isiraele le be le le ka godimo ga bona.

20 Diphedi tše ke tšeo ke di bonego di le ka tlase ga setulo sa bogoši sa Modimo wa Isiraele kua nokeng ya Kebara, ka gona ke ile ka tseba gore ke bakerubi. 21 Diphedi tšeo tše nne, di be di na le difahlego tše nne, maphego a mane, le selo se sengwe seo se bego se bonagala eka ke diatla tša motho ka fase ga maphego a tšona. 22 Ponagalo ya difahlego tša tšona e be e swana le ya tšeo ke di bonego nokeng ya Kebara. Se sengwe le se sengwe se be se eya thwii mo se bego se lebile gona.