Hesekiele

22 Jehofa a bolela le nna gape a re: 2 “Wena morwa wa motho na o itokišeleditše go bolela molaetša wa kahlolo motseng wo o nago le molato wa madi, le go o botša dilo ka moka tše di šišimišago tšeo o di dirilego? 3 O botše motse wo o re: ‘Mmuši Morena Jehofa o re: “Wena motse wo o bolayago batho, nako ya gore o ahlolwe e fihlile. O dira medingwana e šišimišago e le gore o itšhilafatše. 4 Batho bao o ba bolailego ba dirile gore o be le molato ebile medingwana ya gago yeo e šišimišago e go šilafaditše. Bjale ke kgauswi le go go otla, ka baka leo ke tla dira gore ditšhaba tše dingwe di go nyatše, ka dira le gore dinaga tše dingwe di go kwere. 5 Dinaga tša kgole le kgauswi di tla go kwera, wena yo leina la gago le sego la hlweka, le yoo a tletšego kgakanego. 6 Bona! Dikgošana tša Isiraele tše di lego mo go wena Jerusalema, di diriša matla a tšona go bolaya batho. 7 Wena motse, batho bao ba lego go wena ba nyatša botatago bona le bommago bona. Ba ropa batho bao ba tšwago dinageng tše dingwe le gona ba hlakiša ditšhiwana* le bahlologadi.”’”

8 “‘Le nyatša mafelo a ka a makgethwa ebile le dira gore disabatha tša ka e se sa ba tše kgethwa. 9 Mo go wena go na le bao ba senyago batho maina ebile ba nyaka go bolaya batho. Ba ja dihlabelo tša medingwana ya maaka dithabeng, ebile ba tšwela pele ba itshwere ka tsela e šišimišago. 10 Ba robala le basadi ba botatago bona, ebile ba robala le mosadi yo a šilafetšego ka baka la go bona kgwedi. 11 Monna o dira dilo tše di šišimišago le mosadi wa wa gabo, yo mongwe o šilafatša ngwetši ya gagwe ka go itshwara gampe le yona gomme yo mongwe o robala le kgaetšedi ya gagwe, e lego morwedi wa tatagwe. 12 Ba tšea pipamolomo gore ba bolaye batho. Ge ba adima motho tšhelete, ba nyaka gore e boe e na le tswalo, ebile ba tšeela batho ba gabo bona tšhelete ka botsotsi. Wena Jerusalema, o ntebetše,’ o realo Mmuši Morena Jehofa.

13 “‘Ke šišimišwa ke tšhelete yeo o e hweditšego ka tsela yeo e sa lokago, le dilo tšeo o di dirilego gore o bolaye batho mo go wena. 14 Na o tla dula o na le sebete ebile diatla tša gago di na le matla letšatšing la ge ke tla be ke go otla? Nna Jehofa ke boletše, ebile ke tla dira seo ke se boletšego. 15 Ke tla go gašanya gare ga ditšhaba ka ba ka go phatlalaletša dinageng tše dingwe, ke tla dira gore o se sa ba yo a šilafetšego. 16 Wena o tla tlontlollwa pele ga ditšhaba, gomme ke moo o tlago go tseba gore ke nna Jehofa.’”

17 Jehofa a bolela le nna gape a re: 18 “Morwa wa motho, Baisiraele ba fetogile manyedi* mo go nna. Ka moka ga bona ba bjalo ka koporo, thini, tšhipi le morodi ka gare ga sebešo. Ba fetogile manyedi a silifera.

19 “Ka gona Mmuši Morena Jehofa o re: ‘Ka ge ka moka ga lena le fetogile manyedi ao a se nago mohola, ke le kgobokeletša ka gare ga motse wa Jerusalema. 20 Go no swana le ge silifera, koporo, tšhipi, morodi le thini di kgobokeletšwa sebešong e le gore di tle di tološwe ka mollo, ka mo go swanago ke tla le kgoboketša ke galefile ebile ke befetšwe, e le gore ke tle ke le tološe ka mollo. 21 Ke tla le kgoboketša gomme ka le fiša ka mollo wa bogale bja ka, ke moka le tla tološwa gare ga motse. 22 Go no swana le ge silifera e tologela sebešong, le lena le tla tologela gare ga motse. Ke moo le tlago go tseba gore nna Jehofa, ke le galefetše kudu.’”

23 Jehofa a bolela le nna gape a re: 24 “Morwa wa motho, botša Jerusalema o re: ‘O naga yeo e ka se kego ya hlwekišwa, goba ya nelwa ke pula letšatšing leo ke galefilego. 25 Baporofeta ba mo motseng ba loga maanomabe go no swana le tau yeo e rorago yeo e gagolago phoofolo yeo e e bolayago. Ba bolaya batho. Ba tšea mahumo le dilo tše bohlokwa. Ba dirile gore mo motseng go tlale bahlologadi. 26 Baperisita ba Jerusalema ga se ba latela molao wa ka, ebile ba šilafaditše mafelo a ka a makgethwa. Ga ba tsebe phapano magareng ga dilo tše kgethwa le tšeo e sego tše kgethwa. Ga ba dire gore batho ba tsebe phapano magareng ga dilo tše di hlwekilego le tšeo di sego tša hlweka. Ga ba nyake go keteka disabatha tša ka, ebile ba nnyaditše. 27 Dikgošana tša Jerusalema di swana le diphiri tšeo di gagolago phoofolo, di tšholla madi ebile di bolaya batho e le gore di hwetše tšhelete ka tsela e sa lokago. 28 Baporofeta bao ba khupeditše dilo tše mpe tšeo ba di dirago go no swana le ge motho a poleisetera leboto gore a khupetše menga ya lona. Ba bona dipono tša maaka, ebile dilo tšeo ba rego di tlo direga nakong e tlago, ke maaka. Ba re: “Mmuši Morena Jehofa o re,” mola Jehofa yena a se a ba botša selo. 29 Batho ba mo nageng ba logile maanomabe ebile ba dira botsotsi. Ba tlaiša badiidi le batho bao ba hlokago, le gona ba ropa motho yo e sego Moisiraele, ebile ga ba mo ahlole ka toka.’

30 “‘Mo gare ga bona ke be ke nyaka monna yo a tlago go lokiša leboto, goba yo a tlago go ema moo leboto le sentšwego e le gore a lwele naga gore ke se ke ka e fediša, eupša ka se hwetše motho. 31 Ke tla ntšhetša bogale bja ka godimo ga bona. Ka ba fediša bjalo ka ge eka ba fedišwa ke mollo. Ke tla ba otla ka baka la dilo tšeo ba di dirilego,’ o realo Mmuši Morena Jehofa.”