Hesekiele
28 Jehofa o ile a bolela le nna gape a re: 2 “Morwa wa motho, botša moetapele wa Tiro o re: ‘Mmuši Morena Jehofa o re:
“Ka ge pelo ya gago e ikgogomoša, o dulela gore: ‘Ke nna modimo.
Ke dula setulong sa bogoši sa modimo garegare ga lewatle.’
Eupša o no ba motho, ga o modimo,
Le ge ka pelong ya gago o nagana gore ke wena modimo.
3 O nagana gore o bohlale go feta Daniele.
O nagana le gore ga go na diphiri tšeo o ka palelwago ke go di utolla.
4 O itirile gore o hume ka bohlale bja gago le temogo ya gago,
O tšwela pele o ikgobokeletša gauta le silifera mafelong a gago ao o beago dilo tše bohlokwa.
5 Bokgoni bja gago bja go rekiša bo dirile gore o hume kudu,
Le gona pelo ya gago e ile ya thoma go ikgogomoša ka baka la mahumo a gago.”’
6 “‘Ka gona Mmuši Morena Jehofa o re:
“Ka baka la ge ka pelong ya gago o nagana gore o modimo,
7 Ke tla tliša batho bao ba tšwago ditšhabeng tše dingwe gore ba tle ba go hlasele, e lego batho bao ba lego sehlogo go feta ditšhaba ka moka.
Ba tla khwamola disabola tša bona ba lwa le selo se sengwe le se sengwe se sebotse seo o se hweditšego ka baka la bohlale bja gago,
Gomme ba tla šilafatša letago la gago le legolo.
8 Ba tla go lahlela ka moleteng,
Gomme o tla hwa ga sehlogo garegare ga lewatle.
9 Na o tla no tšwela pele o re go yo a go bolayago, ‘ke nna modimo?’
Bao ba go šilafatšago ba tla go bona o le motho feela, o se modimo.”’
10 ‘Batho ba ditšhaba tše dingwe ba tla go bolaya go swana le ge ba bolaya batho ba sa bollago,
Ka gobane nna ke boletše,’ o realo Mmuši Morena Jehofa.”
11 Jehofa a bolela le nna gape a re: 12 “Morwa wa motho, opelela kgoši ya Tiro koša ya sello o e botše o re: ‘Mmuši Morena Jehofa o re:
“O be o tsebega ka go ba yo a phethagetšego,
O le bohlale ebile o le botse kudu.
13 O be o le serapeng sa Modimo sa Edene.
O be o kgabišitšwe ka maswika ka moka a bohlokwa,
E lego rubi, topase le jasepere, kirisolite, onikisi, jade, safire, thekoise le emeralede.
Dilo tša go kgomaretša maswika ao di be di dirilwe ka gauta.
Ke a dirile letšatšing la ge ke be ke go bopa.
14 Ke go tloditše ebile ke go kgethile gore o be mokerubi yo a šireletšago.
O be o le thabeng e kgethwa ya Modimo, o sepelasepela gare ga maswika ao a tukago mollo.
15 Dilo ka moka tšeo o bego o di dira di be di sa solege go tloga letšatšing leo o bopilwego ka lona,
Go fihlela o thoma go dira dilo tša go se loke.
16 Ka ge o be o rekiša dilo tše dintši,
O ile wa thoma go rata ntwa gomme wa dira sebe.
Wena mokerubi yo a šireletšago, ka ge o šilafetše, ke tla go tloša thabeng ya Modimo ka go fediša,
Ka go tloša le gare ga maswika ao a tukago mollo.
17 Pelo ya gago e ikgogomošitše ka baka la ge o le yo mobotse.
Letago la gago le legolo le ile la dira gore o se sa ba bohlale.
Ke tla go lahlela lefaseng.
Ke tla dira gore dikgoši tše dingwe di bone seo se go diragaletšego.
18 O šilafaditše mafelo a gago a makgethwa ka baka la molato wa gago o mogolo le ka baka la go dira kgwebo ka botsotsi.
Ke tla dira gore go be le mollo gare ga gago, gomme o tla go fiša.
Ke tla dira gore o fetoge molora lefaseng batho ka moka ba go lebeletše.
19 Batho ka moka bao ba go tsebago mo gare ga ditšhaba, ba tla go lebelela ba maketše.
O tla fedišwa ga sehlogo le ka ponyo ya leihlo,
Ebile o ka se sa ba gona go ya go ile.”’”
20 Jehofa a bolela le nna gape a re: 21 “Morwa wa motho, retologa o lebelele Sidone gomme o e porofetele molaetša wa gore e tlo ahlolwa. 22 O e botše o re: ‘Mmuši Morena Jehofa o re:
“Bjale ke lwa le wena Sidone, ebile ke tla tumišwa gare ga gago.
Batho ka moka ba tla tseba gore ke nna Jehofa ge ke tla be ke go ahlola ebile ke bontšha gore ke nna Modimo yo mokgethwa.
23 Ke tla go tlišetša leuba la bolwetši, ka ba ka dira gore diterata tša gago di tlale ka madi.
Ke tla bolaya batho ba bantši motseng wa gago ke šomiša sabola yeo e tšwago ka mahlakoreng ka moka,
Gomme ke moo ba tlago go tseba gore ke nna Jehofa.
24 Baisiraele ba ka se sa hlwa ba dikologilwe ke ditšhaba tšeo di ba swarago gampe le tšeo di ba kwešago bohloko go swana le mootlwa wo o hlabago. Ke moo batho ba tlago go tseba gore ke nna Mmuši Morena Jehofa.”’
25 “‘Mmuši Morena Jehofa o re: “Ge ke kgoboketša Baisiraele go tšwa ditšhabeng tšeo ba bego ba phatlalaleditšwe go tšona, ke tla kgethagatšwa gare ga bona ditšhaba di lebeletše. Baisiraele ba tla dula nageng ya bona yeo ke e neilego Jakobo mohlanka wa ka. 26 Ba tla dula nageng yeo ba šireletšegile, ba aga dintlo ba ba ba lema mašemo a meterebe. Ba tla dula ba šireletšegile ge ke tla be ke ahlola ditšhaba ka moka tšeo di ba swarago gampe tšeo di ba dikologilego. Ke moo ba tlago go tseba gore ke nna Jehofa Modimo wa bona.”’”