Puku ya Pele ya Dikgoši

13 Jehofa o ile a laela moporofeta wa gagwe gore a tloge Juda a ye Bethele nakong ya ge Jeroboama a eme kgauswi le aletare gore a dire dihlabelo tšeo di thuntšhago muši. 2 Bjale a goeletša aletare yeo go ya kamoo Jehofa a bego a mmoditše, gomme yena a re: “Wena aletare, aletare, Jehofa o re: ‘Bona! Go tlo belegwa morwa ntlong ya Dafida, yoo a tlago go bitšwa Josia! Yena o tla dira sehlabelo godimo ga gago ka baperisita ba mafelong a phagamego bona bao ba dirago dihlabelo tša go thuntšha muši godimo ga gago, e bile o tla fišetša marapo a batho godimo ga gago.’” 3 Letšatšing leo o ile a bontšha bohlatse bja gore dilo tše di be di tlo direga, a re: “Bohlatse bjo Jehofa a boletšego ka bjona ke bjo: Bona, aletare e tla phatloga ka bogare gomme melora yeo e lego ka go yona e tla tšhollwa.”

4 Ge kgoši Jeroboama a se na go kwa seo moporofeta wa Modimo wa nnete a se boletšego ka aletare ya kua Bethele, a tloša letsogo la gagwe aletareng gomme a šupa moporofeta wa Modimo wa nnete letsogo la gagwe le otlologile a re: “Mo swareng!” Ka yona nako yeo letsogo leo a bego a mo šupile ka lona la omelela ke moka a se kgone go le bušetša morago. 5 Ke moka aletare ya phatloga ka bogare, melora ya tšhologela fase go ya ka seo moporofeta wa Modimo wa nnete a se boletšego a laelwa ke Jehofa.

6 Bjale kgoši ya re go moporofeta wa Modimo wa nnete: “Hle nkgopelele go Jehofa Modimo wa gago gore a nkgaugele* gomme o nthapelele gore a fodiše letsogo la ka.” Ke moka moporofeta wa Modimo wa nnete a kgopela Jehofa gore a gaugele Kgoši Jeroboama gomme letsogo la gagwe la fodišwa la boela sekeng. 7 Ke moka kgoši ya re go moporofeta wa Modimo wa nnete: “A re ye ntlong ya ka o ye go ja, ke go fe le mpho.” 8 Eupša moporofeta wa Modimo wa nnete a re go kgoši: “Le ge o ka be o mphile seripa sa ntlo ya gago ke be nka se sepele le wena gomme ka ja dijo goba ka nwa meetse lefelong le. 9 Ka gobane Jehofa o ntaetše a re: ‘O se ke wa ja selo goba wa nwa meetse lefelong le, le gona o se ke wa boela morago ka tsela yeo o tlilego ka yona.’” 10 A boela morago ka tsela e nngwe, gomme a se diriše yeo a tlilego Bethele ka yona.

11 Go be go na le moporofeta yo mongwe yo a tšofetšego yo a bego a dula Bethele. Barwa ba gagwe ba ile ba tla go yena ba mmotša dilo ka moka tšeo moporofeta wa Modimo wa nnete a di dirilego letšatšing leo moo Bethele le dilo tšeo a di boditšego kgoši. Ka morago ga gore ba hlalosetše tatago bona ditaba tše, 12 tatago bona a re: “O ile ka thoko efe?” Ke moka barwa ba gagwe ba mmontšha gore moporofeta wa Modimo wa nnete yo a bego a etšwa Juda o sepetše ka tsela efe. 13 Bjale a re go barwa ba gagwe: “Ntokišeletšeng tonki.” Ke moka ba mo lokišetša tonki gomme a e namela.

14 O ile a šala moporofeta wa Modimo wa nnete morago ke moka a mo hwetša a dutše ka fase ga mohlare o mogolo. A re go yena: “Na ke wena moporofeta wa Modimo wa nnete yo a tšwago Juda?” Ke moka yena a re: “Ee, ke nna yena.” 15 Moporofeta wa mokgalabje a re go yena: “A re ye ntlong ya ka o ye go ja.” 16 Eupša moporofeta wa Modimo wa nnete a re go yena: “Nka se boele le wena morago goba go tsena ntlong ya gago, le gona nka se je dijo goba go nwa meetse le wena lefelong le. 17 Ka gobane Jehofa o ntaetše a re: ‘O se ke wa ja dijo goba wa nwa meetse lefelong leo. Le gona o se ke wa boela morago ka tsela yeo o tlilego ka yona.’” 18 Ge a realo moporofeta wa mokgalabje a re go yena: “Le nna ke moporofeta go swana le wena, e bile morongwa o boletše le nna a laetšwe ke Jehofa a re: ‘Mmotše gore a boele le wena ntlong ya gago gore a je dijo a be a nwe meetse.’” (Eupša o be a mo fora.) 19 Ka gona a boela morago le yena e le gore a ye go ja dijo le go nwa meetse ntlong ya gagwe.

20 Ge ba be ba dutše tafoleng Jehofa o ile a bolela le moporofeta yola wa mokgalabje yo a bego a bušeditše moporofeta wa Modimo wa nnete morago, 21 gomme mokgalabje yo a bolela ka go hlaboša le moporofeta wa Modimo wa nnete yo a bego a etšwa Juda, a re: “Jehofa o re: ‘Ka ge o hlanogetše taelo ya Jehofa gomme wa se latele taelo yeo Jehofa Modimo wa gago a go neilego yona, 22 eupša wa boela morago gore o ye go ja dijo le go nwa meetse lefelong leo o boditšwego gore: “O se ke wa ja dijo goba wa nwa meetse go lona,” gona setopo sa gago se ka se bolokwe mabitleng a borakgolokhukhu ba gago.’”

23 Ka morago ga ge moporofeta wa Modimo wa nnete a jele e bile a nwele, moporofeta wa mokgalabje o ile a mo lokišeletša tonki. 24 Ka morago, moporofeta wa Modimo wa nnete a tloga gomme a re a le tseleng a kopana le tau ke moka ya mmolaya. Setopo sa gagwe se be se rapaletše tseleng gomme tonki le tau di be di eme kgauswi le sona. 25 Go be go na le batho bao ba bego ba feta ka tsela bao ba bonego setopo seo se rapaletše tseleng gomme tau e le kgauswi le sona. Ba ile ba fihla ba bolela ka taba ye motseng woo moporofeta wa mokgalabje a bego a dula go wona.

26 Ge moporofeta wa mokgalabje, yo a gomišitšego moporofeta wa Modimo wa nnete a e kwa ka seo, a napa a re: “Monna yoo ke moporofeta wa Modimo wa nnete, yo a sego a kwa taelo ya Jehofa. Jehofa o mo tlogeletše gore tau e mo hlasele, e mo gagoganye e be e mmolaye, go ya le kamoo Jehofa a bego a mmoditše ka gona.” 27 Ka gona a re go barwa ba gagwe: “Ntokišeletšeng tonki.” Barwa ba gagwe ba mo lokišeletša yona. 28 Ke moka moporofeta wa mokgalabje a tloga gomme a hwetša setopo sa moporofeta wa Modimo wa nnete se rapaletše tseleng, tau le tonki di le kgauswi le sona. Tau e be e se ya ja setopo seo goba go gagoganya tonki. 29 Moporofeta wa mokgalabje a nametša setopo sa moporofeta wa Modimo wa nnete godimo ga tonki, ke moka moporofeta wa mokgalabje a ya le yena motseng wa gabo e le gore a mo llele le go mmoloka. 30 Ke moka a boloka setopo sa moporofeta wa Modimo wa nnete lebitleng la gagwe, gomme batho ba mo llela ba re: “Joo, ngwanešo!” 31 Ge a mmolokile a botša barwa ba gagwe a re: “Ge ke hlokofala le mpolokeng moo ke boloketšego moporofeta wa Modimo wa nnete. Le beeng marapo a ka kgauswi le a gagwe. 32 Molaetša woo Jehofa a mo laetšego gore a o bolele mabapi le aletare ya Bethele le dintlo ka moka tša borapedi tšeo di lego mafelong a phagamego ao a lego metseng ya Samaria, o tla phethagala.”

33 Le ge dilo tše ka moka di ile tša direga, Jeroboama ga se a ka a tlogela go dira dilo tše mpe, eupša o ile a tšwela pele a kgetha baperisita gare ga batho bao e sego Balefi gore ba hlankele mafelong ao a phagamego ao go rapelwago go ona. O be a kgetha motho yo mongwe le yo mongwe yo a bego a nyaka go ba moperisita gore e be moperisita, a re: “Anke e be yo mongwe wa baperisita ba mafelong a phagamego ao go rapelwago go ona.” 34 Sebe seo Jeroboama le ba lapa la gagwe ba se dirilego se dirile gore ba bolawe le go fedišwa mo lefaseng.