Puku ya Bobedi ya Samuele

4 Ge Ishiboshethe morwa wa Saulo a ekwa gore Abenere o hlokofaletše kua Heburone, o ile a nyama kudu gomme Baisiraele ka moka ba thoma go tshwenyega. 2 Morwa wa Saulo o be a na le banna ba babedi bao e bego e le baetapele ba banna ba go hlasela. Yo mongwe wa bona e be e le Baena gomme yo mongwe e le Rekaba. E be e le barwa ba Rimone wa Mobeerothe yoo e bego e le wa moloko wa Benjamini. (Ka gobane Beerothe le yona e be e le karolo ya Benjamini. 3 Babeerothe ba tšhabela Githaima, ba dula moo bjalo ka ba-tšwa-ntle go fihla le lehono.)

4 Jonathane morwa wa Saulo o be a na le morwa yo a bego a golofetše maoto. O be a na le mengwaga e mehlano ge ba hwetša molaetša wo o tšwago Jeseriele wa gore Saulo le Jonathane ba hlokofetše gomme moledi wa gagwe a mo kuka a tšhaba le yena. Eitše ge a tšhaba a tšhogile, morwa wa Jonathane a wa gomme a golofala. Leina la gagwe e be e le Mefiboshethe.

5 Barwa ba Rimone wa Beerothe, e lego Rekaba le Baena ba ile ba ya ntlong ya Ishiboshethe nakong ya ge letšatši le be le fiša tšhiritšhiri gomme Ishiboshethe o be a robetše mosegare a ikhuditše. 6 Ba ile ba tsena ka ntlong ba itira eka ba tlile go tšea korong gomme ba mo hlaba mo mpeng, ke moka Rekaba le butiagwe Baena ba tšhaba. 7 Ge ba be ba tsena ka ntlong, Ishiboshethe o be a robetše mpeteng ka kamoreng ya gagwe. Ba mo hlaba ba mmolaya gomme ba mo kgaola hlogo. Ke moka ba tšea hlogo ya gagwe gomme ba sepela bošego ka moka ba lebile Araba. 8 Ba tliša hlogo ya Ishiboshethe go Dafida kua Heburone gomme ba re go kgoši: “Še hlogo ya Ishiboshethe morwa wa Saulo lenaba la gago leo le bego le nyaka go go bolaya. Lehono Jehofa o lefeletša kgoši mong wa rena go Saulo le ditlogolo tša gagwe.”

9 Dafida a araba Rekaba le butiagwe Baena bao e lego barwa ba Rimone wa Beerothe, a re: “Ke ikana ka Jehofa yo a phelago yo a mphološitšego mathateng a ka ka moka gore, 10 ge motho yo mongwe a be a mpotša gore: ‘Saulo o hwile’ gomme a nagana gore o ntlišeditše ditaba tše dibotse, ke ile ka mo swara ka mmolaya kua Tsikilaga. Woo e bile moputso wo ke ilego ka mo fa wona. 11 Bjale nka se tlogele banna ba babe bao ba bolailego monna wa go loka ka ntlong ya gagwe a le mpeteng wa gagwe. Ke tlo le otla ka gobane le mmolaile* gomme ka le fediša mo lefaseng.” 12 Ke moka Dafida a laela banna bao a bego a na le bona gore ba ba bolaye. Ba ba kgaola diatla le maoto gomme ba ba fega kgauswi le sediba sa kua Heburone eupša ba tšea hlogo ya Ishiboshethe ba e boloka lebitleng la Abenere kua Heburone.