Puku ya Bobedi ya Samuele
12 Ke moka Jehofa a roma Nathane go Dafida. Nathane a fihla a re go Dafida: “Go be go na le banna ba babedi bao ba dulago motseng o tee, yo mongwe e le mohumi yo mongwe e le modiidi. 2 Monna wa mohumi o be a na le dinku le dikgomo tše dintši kudu. 3 Eupša monna wa modiidi o be na le kwana e tee feela ya tshadi yeo a bego a e rekile. O be a e hlokomela gomme e be e gola e dula le yena le barwa ba gagwe. E be e eja dijo tše dinyenyane tšeo a bego a na le tšona, e nwela ka komiking ya gagwe ebile e robala sehubeng sa gagwe. E ile ya ba bjalo ka morwedi wa gagwe. 4 Ka morago monna yoo wa mohumi o ile a ba le moeng, eupša o be a sa nyake go tšea nku ya gagwe goba kgomo ya gagwe gore a e hlabele moeng wa gagwe. Go e na le moo, o ile a tšea kwana ya monna wa modiidi gomme a e hlabela moeng wa gagwe.”
5 Ge Dafida a ekwa seo a galefela monna yoo kudu gomme a re go Nathane: “Ke ikana ka Jehofa yo a phelago gore monna yo a dirilego seo o swanetše go hwa! 6 O swanetše go patela monna yoo wa modiidi ka dikwana tše nne ka gobane o dirile se ebile ga se a mo kwela bohloko.”
7 Ke moka Nathane a re go Dafida: “Monna yoo ke wena! Jehofa Modimo wa Isiraele o re: ‘Nna ke go tloditše gore o be kgoši ya Isiraele, ka ba ka go phološa go Saulo. 8 Ke be ke ikemišeditše go go fa ntlo ya mong wa gago le basadi ba mong wa gago le gona ke go dirile kgoši ya Isiraele le ya Juda. Ge e ba dilo tše di be di ka se go kgotsofatše, ke be ke ikemišeditše go go direla dilo tše dingwe tše dintši. 9 Ke ka baka la eng o nyaditše Jehofa gomme wa dira se? O bolaile Uria wa Mohethe ka sabola. Ke wena o dirilego gore Baamoni ba mmolaye ka sabola ke moka wa tšea mosadi wa gagwe gore e be wa gago. 10 Bjale ba ntlo ya gago ba tla bolawa gasehlogo ka gobane o nnyaditše gomme wa tšea mosadi wa Uria wa Mohethe gore e be mosadi wa gago.’ 11 Jehofa o re: ‘Ke tlišetša ba lapa la gago masetlapelo. Ke tla tšea basadi ba gago o lebeletše ka ba nea monna yo mongwe* gomme yena o tla robala le bona mosegare wa sekgalela. 12 Le ge wena o dirile dilo ka sephiring, nna ke tla dira se mosegare wa sekgalela pele ga Baisiraele ka moka.’”
13 Ke moka Dafida a re go Nathane: “Ke diretše Jehofa sebe.” Nathane a re go Dafida: “Jehofa o tla go lebalela sebe sa gago. O ka se hwe. 14 Eupša ka ge o nyaditše Jehofa, morwa yo o sa tšwago go mmelegelwa, yena o tla hwa.”
15 Ke moka Nathane a ya ntlong ya gagwe.
Jehofa yena a otla ngwana yo mosadi wa Uria a mmelegetšego Dafida, ke moka a babja. 16 Dafida a rapela Modimo wa nnete ka pelo ka moka ka baka la mošemanyana yoo. Dafida a ikona dijo gomme a fetša bošego ka moka a patlame fase. 17 Ka gona banna ba bagolo ba ka mošate ba ema kgauswi le yena gomme ba leka go mo tsoša, eupša yena a se ke a dumela, a ba a gana le go ja le bona. 18 Ka letšatši la bošupa, ngwana yoo a hlokofala eupša bahlanka ba Dafida ba be ba tšhaba go mmotša gore ngwana o hlokofetše. Ba be ba re: “Re boletše le Dafida ngwana a sa phela eupša a se re theetše. Bjale re tla mmotša bjang gore ngwana o hlokofetše? A ka dira selo se sebe.”
19 Ge Dafida a bona gore bahlanka ba gagwe ba a sebelana, a lemoga gore ngwana o hlokofetše. Ke moka Dafida a re go bahlanka ba gagwe: “Na ngwana o hlokofetše?” Bona ba re: “Ee, o hlokofetše.” 20 Ke moka Dafida a tsoga moo fase, a hlapa, a tlola ka makhura, a apara diaparo tše dingwe, a ya ntlong ya Jehofa gomme a khunama a rapela. Ka morago ga moo a ya ntlong ya gagwe a kgopela gore ba mo fe dijo, gomme a ja. 21 Bahlanka ba gagwe ba mmotšiša ba re: “Ke ka baka la eng o dirile dilo ka tsela ye? Ge ngwana a be a sa phela o ile wa ikona dijo gomme wa dulela go lla, eupša gateetee ge ngwana a se na go hlokofala, o ile wa tsoga gomme wa ja dijo.” 22 Yena a re: “Ge ngwana a be a sa phela, ke ile ka ikona dijo gomme ka dulela go lla ka gobane ke be ke ipotša gore: ‘Mohlomongwe Jehofa o tla nkwela bohloko gomme a tlogela ngwana gore a phele.’ 23 Ka ge bjale a hlokofetše, ke ka baka la eng ke swanetše go ikona dijo? Na nka kgona go mmuša? Nna ke tlo ya go yena, eupša yena a ka se boele go nna.”
24 Ke moka Dafida a homotša Batseba mosadi wa gagwe. A robala le yena. Ge nako e dutše e eya, Batseba a belega morwa gomme ba mo reela leina ba re ke Solomone.* Jehofa o be a mo rata, 25 ka baka leo, o ile a romela moporofeta Nathane gore a ba botše gore ba reele ngwana yoo leina ba re ke Jedidia* ka gobane Jehofa o mo ratile.
26 Joaba a tšwela pela a elwa le Raba ya Baamoni gomme a thopa motse wa yona wa bogoši. 27 Ke moka Joaba a romela batho go Dafida a re: “Ke lwele le Raba, ebile ke thopile methopo ya wona ya meetse.* 28 Bjale kgoboketša mašole ao a šetšego gore a lwe le motse gomme a o thope. Ge e ba go se bjalo, nna ke tla o thopa gomme batho ba tla reta nna.”
29 Ka gona, Dafida a kgoboketša mašole ka moka gomme a ya Raba go lwa le yona ke moka a e thopa. 30 Ka morago Dafida a tšea mphapahlogo woo o bego o le hlogong ya Malikamo. Boima bja wona bo be be bo lekana dikhilokgerama tše 34* tša gauta gotee le maswika a bohlokwa gomme wa bewa godimo ga hlogo ya Dafida. A tšea le dilo tše dintši tšeo di bego di šetše motseng ka morago ga ntwa. 31 A ntšha le batho bao ba bego ba le moo motseng gomme a ba fa mošomo wa go betla maswika ka didirišwa tše bogale tša tšhipi le ka dilepe, a ba fa le mošomo wa go dira ditena. Tšeo ke tše a di dirilego metseng ka moka ya Baamoni. Mafelelong Dafida le mašole a gagwe ka moka ba boela Jerusalema.