Puku ya Bobedi ya Dikoronika
19 Ke moka Kgoši Jehoshafate wa Juda a boela a šireletšegile ntlong ya gagwe kua Jerusalema. 2 Jehu morwa wa Hanani yoo a bego a kgona go bona dipono, o ile a ya a kopana le Kgoši Jehoshafate gomme a re go yena: “Na o swanetše go thuša batho ba babe le go rata bao ba hloilego Jehofa? Ka baka la seo o se dirilego, Jehofa o go galefetše. 3 Eupša go na le dilo tše dibotse tšeo di hweditšwego go wena, ka gobane o fedišitše dikota tše kgethwa* nageng wa ba wa lokiša pelo ya gago gore o tsome Modimo wa nnete.”
4 Jehoshafate o ile a tšwela pele a dutše Jerusalema, ke moka a boela go batho ba Beresheba go ba go fihla tikologong ya dithabeng tša Efuraime gore a ba thuše go boela go Jehofa Modimo wa borakgolokhukhu ba bona. 5 Le gona o ile a kgetha baahlodi nageng ka moka, motseng o mongwe le o mongwe wo o šireleditšwego wa Juda. 6 Ke moka a botša baahlodi a re: “Naganišišang ka seo le se dirago, ka gobane ga le ahlolele batho eupša le ahlolela Jehofa, ebile o tla ba le lena ge le ahlola. 7 Bjale anke le boifeng Jehofa. Hlokomelang seo le se dirago, ka gobane Jehofa Modimo wa rena ga a rate go hloka toka, ga a kgetholle ebile ga a rekwe.”
8 Le gona kua Jerusalema, Jehoshafate a kgetha ba bangwe ba Balefi le baperisita le ba bangwe ba baetapele ba malapa a borakgolokhukhu ba Isiraele gore ba hlankele e le baahlodi legatong la Jehofa le go rarolla melato ya badudi ba Jerusalema. 9 A re go bona: “Se ke se le swanetšego go se dira go bontšha gore le boifa Jehofa, le a mmotegela ebile le mo hlankela ka dipelo tša lena ka moka. 10 Nako le nako ge banababo lena bao ba dulago metseng e mengwe ba tliša molato wo o akaretšago go tšhollwa ga madi goba ba botšiša se sengwe ka molao, ditaelo, tlhahlo goba dikahlolo, le swanetše go ba lemoša e le gore Jehofa a se ke a ba bona molato. Ka ntle le moo, o tla galefela lena le bana babo lena. Se ke se le swanetšego go se dira e le gore le se ke la ba le molato. 11 Moperisita yo mogolo Amaria yo a le hlokometšego o tla le thuša go tseba seo Jehofa a se nyakago mabapi le dilo ka moka. Sebadia morwa wa Ishimaele ke moetapele wa ba ntlo ya Juda ebile o hlokometše mešomo ka moka ya kgoši. Le gona, Balefi ba tla le thuša medirong ya lena. Dirang mošomo wa lena ka sebete gomme anke Jehofa a be le bao ba dirago dilo tše di lokilego.”