Hesekiele

18 Jehofa a bolela le nna gape a re: 2 “Seema seo le se bolelago Isiraeleng seo se rego: ‘Botate ke bona ba jelego diterebe tša go se butšwe, eupša meno a barwa ke ona a šiago,’ se ra goreng?

3 “Mmuši Morena Jehofa o re: ‘Ke ikana ka nna Modimo yo a phelago gore le ka se sa tšwela pele le bolela seema se Isiraeleng. 4 Bonang! Meoya ka moka ke ya ka.* Go no swana le ge moya wa tate e le wa ka, le wa morwa ke wa ka, ka moka ga yona ke ya ka. Moya wo o dirago sebe o tla hwa.

5 “‘Ge motho a dira dilo tše di lokilego le tša toka, 6 ebile a sa je dihlabelo tšeo di diretšwego medingwana ya maaka dithabeng, a sa rapele medingwana e šišimišago ya Baisiraele, a sa robale le mosadi wa wa gabo goba mosadi yo a bonago kgwedi, 7 a sa sware motho gampe, a buša selo seo a bego a se tšeetše motho yo a mo kolotago, a sa rope motho, eupša bao ba swerwego ke tlala a ba fa dijo tša gagwe, gomme bao ba sa aparago a ba apeša diaparo, 8 le gona ge a adimišitše selo a sa nyake gore se boe le tswalo, a ahlola ka toka ge go na le bothata magareng ga batho ba babedi, a sa tsenye letsogo tabeng ya go hloka toka, 9 ebile a dula a latela melao ya ka le ditaelo tša ka e le gore a mpotegele, gona motho yo bjalo o lokile ebile o tla dula a phela,’ o realo Mmuši Morena Jehofa.

10 “‘Eupša ge e ba motho a na le morwa yo e lego tsotsi, goba e le mmolai, goba a dira se sengwe sa dilo tše, 11 (eupša yena motho yoo a se a dira le setee sa dilo tše), a eja dihlabelo tšeo di diretšwego medingwana ya maaka dithabeng, a robala le mosadi wa wa gabo, 12 a swara batho bao ba hlakago le badiidi gampe, a tšea dilo ka botsotsi, a sa buše selo seo a se tšeetšego motho yo a mo kolotago, a rapela medingwana ya maaka, a dira dilo tšeo di šišimišago, 13 ebile ge a adimišitše selo a nyaka gore se boe se na le tswalo, gona morwa yoo a ka se tšwele pele a phela. Ka ge a dirile dilo tše ka moka tšeo di šišimišago, o tla bolawa. O tla ikarabela ka lehu la gagwe.*

14 “‘A re re tate o na le morwa yo a bonago dibe ka moka tšeo tatagwe a di dirago, le ge morwa yo a bona dilo tšeo, a se di dire. 15 Morwa yoo ga a je dihlabelo tšeo di direlwago medingwana ya maaka dithabeng, ga a rapele medingwana ya maaka ya Baisiraele, ga a robale le mosadi wa wa gabo, 16 ga a sware batho gampe, ga a gane go buša selo seo a se tšeetšego motho yo a mo kolotago, ga a tšee selo ka botsotsi, eupša o fa batho bao ba swerwego ke tlala dijo tša gagwe gomme bao ba sego ba apara o ba apeša diaparo. 17 Ga a gatelele batho bao ba diilago, ge a adimišitše selo ga a nyake gore se boe se na le tswalo, ebile o latela ditaelo tša ka le melao ya ka. Motho yoo a ka se hwe ka baka la molato wa tatagwe. O tla tšwela pele a phela. 18 Eupša tatagwe o tla hwa, ka gobane o dirile botsotsi, o ropile ngwanabo a ba a dira dilo tše mpe gare ga batho ba gabo.

19 “‘Eupša lena le tla re: “Ke ka baka lang morwa a sa swanela go rwala molato wa tatagwe?” Ka ge morwa a dirile dilo tše di lokilego le tša toka, ebile a kwele melao ya ka ka moka le go e latela, gona o tla dula a phela. 20 Moya wo o dirago sebe ke wona o tlago go hwa. Morwa a ka se rwale molato wa tatagwe, le tate le yena a ka se rwale molato wa morwa wa gagwe. Motho yo a lokilego o tla ahlolwa go ya ka dilo tše di lokilego tšeo a di dirilego, gomme yo mobe o tla ahlolwa go ya ka dilo tše mpe tšeo a di dirilego.

21 “‘Bjale ge e ba motho yo mobe a ka tlogela dibe tša gagwe ka moka tšeo a di dirilego gomme a kwa melao ya ka, a ba a dira dilo tša go loka le tša toka, gona o tla tšwela pele a phela, a ka se hwe. 22 Nka se mo otle ka baka la dilo tše mpe tšeo a di dirilego. O tla tšwela pele a phela ka ge a dira dilo tšeo di lokilego.’

23 Mmuši Morena Jehofa o re: “‘Ga ke kgahlwe ke ge motho yo mobe a ehwa, eupša ke kgahlwa ke ge a tlogela dilo tše mpe tšeo a di dirago gomme a tšwela pele a phela.’

24 “‘Eupša ge e ba motho yo a lokilego a ka tlogela go dira dilo tše di lokilego, gomme a dira dilo tše mpe le dilo ka moka tše di šišimišago tšeo batho ba babe ba di dirago, gona a ka se tšwele pele a phela. Nka se sa gopola dilo tše di lokilego tšeo a di dirilego. O tla hwa ka ge a dirile sebe ebile a se a botega.

25 “‘Eupša lena le tla re: “Jehofa ga a dire dilo ka toka.” Bjale theetšang lena Baisiraele. Na ke nna yo a sa dirego dilo ka toka, goba ke lena le sa dirego dilo ka toka?

26 “‘Ge motho yo a lokilego a tlogela go dira dilo tše di lokilego, a dira dilo tše mpe, o tla hwa ka baka la dilo tše mpe tšeo a di dirago.

27 “‘Ge motho yo mobe a tlogela go dira dilo tše mpe, gomme a thoma go dira dilo tša go loka a ba a dira dilo ka toka, o tla phološa bophelo bja gagwe. 28 Ge a thoma go lemoga gore dilo tšeo a di dirago ke tše mpe ke moka a di tlogela, gona o tla tšwela pele a phela. A ka se hwe.

29 “‘Eupša lena Baisiraele le tla re: “Jehofa ga a dire dilo ka toka.” Bjale theetšang lena Baisiraele, na ke nna yo a sa dirego dilo ka toka goba ke lena le sa dirego dilo ka toka?’

30 “Mmuši Morena Jehofa o re: ‘Lena Baisiraele, ke tla ahlola yo mongwe le yo mongwe wa lena go ya ka dilo tšeo a di dirago. Itsholeng, le tlogeleng dilo ka moka tše mpe tšeo le di dirago, gore di se ke tša tla tša le šitiša gomme tša dira gore le be le molato. 31 Lena Baisiraele, tlogelang dilo ka moka tše mpe tšeo le di dirago, gomme le fetošeng dipelo tša lena le tsela yeo le naganago ka yona, e le gore le se ke la hwa.’

32 “Mmuši Morena Jehofa o re: ‘Ga ke kgahlwe ke gore motho le ge e le ofe a hwe, ka gona tlogelang dilo tše mpe tšeo le di dirago e le gore le tšwele pele le phela.’”