Doiteronomio

16 “O gopole gore kgwedi ya Abibi e bohlokwa, gomme o keteke Paseka ya Jehofa Modimo wa gago, ka gobane ka kgwedi ya Abibi Jehofa Modimo wa gago o go ntšhitše Egepeta e le bošego. 2 Le gona, o direle Jehofa Modimo wa gago sehlabelo sa Paseka ka dinku, dipudi, le dikgomo tša gago. O se direle lefelong leo Jehofa a tlago go kgetha gore le mo hlankele go lona.* 3 Ka morago ga moo, o je phoofolo yeo o dirilego sehlabelo ka yona, gotee le senkgwa seo se se nago komelo.* Ke moka, o se ke wa ja selo le ge e le sefe seo se nago le komelo ka matšatši a šupago. O je feela senkgwa seo se se nago komelo, go no swana le ge o ile wa dira bjalo nakong ya ge o tloga Egepeta ka lepotlapotla. Ge o dutše o dira se, o tlo gopola tsela yeo o ilego wa tlaišega ka yona. Le gona o ka se tsoge wa lebala kamoo Modimo a ilego a go lokolla ka gona nageng ya Egepeta. 4 Go fele matšatši a šupago ditikologong tša lena ka moka go se na folouru yeo e dubilwego yeo e bidilego. Le gona, nama le ge e le efe ya phoofolo yeo le tlago go dira sehlabelo ka yona mantšiboeng a letšatši la pele, e se ke ya šala bošego ka moka go fihlela mesong e latelago. 5 O ka se dumelelwe go dira sehlabelo sa Paseka motseng le ge e le ofe wa metse yeo Jehofa Modimo wa gago a go neago yona. 6 Eupša o dire sehlabelo lefelong leo Jehofa Modimo wa gago a tlago go le kgetha gore le mo hlankele go lona. O dire sehlabelo sa Paseka mantšiboa ge letšatši le se no sobela, go no swana le seo se ilego sa direga letšatšing leo le tšwilego Egepeta ka lona. 7 O apee nama yeo le go e jela lefelong leo Jehofa Modimo wa gago a tlago go le kgetha, ke moka mesong o boele ditenteng tša gago. 8 O fetše matšatši a tshelelago o eja dinkgwa tšeo di se nago komelo, gomme ka letšatši la bošupa go tlo ba le kopano e kgethwa ya Jehofa Modimo wa gago. O se ke wa dira mošomo le ge e le ofe ka letšatši leo.

9 “O thome go bala dibeke tše šupago go tloga nakong ya ge le thoma go buna mabele mašemong a lena. 10  Ka morago ga moo, o keteke Monyanya wa Dibeke wa Jehofa Modimo wa gago, ka go tliša sebego sa go ithaopa go ya kamoo Jehofa Modimo wa gago a go šegofatšago ka gona. 11 O thabe pele ga Jehofa Modimo wa gago. Go thabe wena, morwa wa gago, morwedi wa gago, lekgoba la gago la monna le la mosadi, Balefi bao ba dulago metseng ya lena, batho bao e sego Baisiraele, ditšhiwana le bahlologadi, e lego bao ba dulago metseng ya lena. O thabe le bona lefelong leo Jehofa Modimo wa gago a tlago go le kgetha gore le mo hlankele go lona. 12 O gopole gore o be o le lekgoba kua Egepeta, ka gona o latele ditaelo tše.

13 “O keteke Monyanya wa Mešaša ka matšatši a šupago ge o kgobela dilo tšeo o di bunnego mašemong a gago, le makhura ao a tšwago moo o gatelago mehlware ya gago, le beine yeo e tšwago moo o gatelago diterebe. 14 O thabe nakong ya ge o keteka monyanya woo. Go thabe wena, morwa wa gago, morwedi wa gago, lekgoba la gago la monna le la mosadi, Molefi, motho yo e sego Moisiraele, tšhiwana le mohlologadi, e lego bao ba dulago metseng ya lena. 15 O fetše matšatši a šupago o keteka monyanya wa Jehofa Modimo wa gago o le lefelong leo Jehofa a tlago go le kgetha, ka gobane Jehofa Modimo wa gago o tla šegofatša dilo ka moka tšeo o di bunnego, le dilo ka moka tšeo o di dirago gomme wena o tla thaba kudu.

16 “Monna yo mongwe le yo mongwe o swanetše go tla gararo ka ngwaga pele ga Jehofa Modimo wa gago lefelong leo a tlago go le kgetha. A tle Monyanyeng wa Dinkgwa tše di sa Omelwago, Monyanyeng wa Dibeke le Monyanyeng wa Mešaša, gomme go se be le motho yo a tlago pele ga Jehofa a lekeleditše diatla. 17 Motho yo mongwe le yo mongwe a tliše mpho yeo e lekanago go ya le ka mokgwa wo Jehofa Modimo wa gagwe a mo šegofaditšego ka gona.

18 “Go moloko o mongwe le o mongwe, le kgethe baahlodi le baetapele metseng ka moka yeo Jehofa Modimo wa lena a le filego yona, gomme bona ba swanetše go ahlola batho ka toka. 19 O se ke wa ahlola ka go hloka toka, wa kgetholla, goba wa tšea pipamolomo, ka gobane pipamolomo e dira gore yo a ahlolago a se ke a ahlola gabotse. E bile e ka dira gore motho yo a lokilego a fetoše diphetho tša gagwe. 20 O dule o dira dilo ka toka, e le gore o dule o phela gomme o tle o hwetše naga yeo Jehofa Modimo wa gago a tlago go go nea yona.

21 “O se ke wa bjala mohlare wa mohuta le ge e le ofe gore e be kota e kgethwa* kgauswi le aletare yeo o tlago go e direla Jehofa Modimo wa gago.

22 “Le gona o se ke wa bea leswika leo o tlago go le rapela, e lego selo seo Jehofa Modimo wa gago a se hloilego kudu.