Diema

26 Go no swana le ge kapoko e sa swanela go wa selemo le ge pula e sa swanela go na ka nako ya puno,

Setlaela le sona ga se sa swanela go hlomphiwa.

 2 Go no swana le ge nonyana e na le lebaka la go tšhaba gomme peolwane e na le lebaka la go fofa,

Thogako le yona ga e tšwe ntle le lebaka le le kwagalago.*

 3 Sefepi ke sa go hlahla pere, ditomo ke tša go hlahla tonki

Gomme thupa ke ya go betha mekokotlo ya batho ba ditlaela.

 4 O se ke wa araba setlaela go ya ka bošilo bja sona,

E le gore o se ke wa swana le sona.

 5 Ge o araba setlaela, se bontšhe gore se botšiša dilo tša botlaela,

E le gore se se ke sa nagana gore se bohlale.

 6 Motho yo a fago setlaela maikarabelo a itšego

O swana le motho yo a ikgobatšago maoto a gagwe e le gore a golofale.

 7 Seema seo se tšwago go batho ba ditlaela

Se swana le maoto a go hlotša a motho yo a golofetšego.

 8 Yo a retago motho wa setlaela,

O swana le motho yo a tlemelelago leswika godimo ga seragamabje.

 9 Seema seo se tšwago melomong ya ditlaela

Se swana le tshehlo yeo e lego seatleng sa setagwa.

10 Motho yo a hirago setlaela goba motho yo a fetago ka tsela,

O swana le motho yo a thuntšhago mesebe yo a hlabago selo se sengwe le se sengwe.*

11 Setlaela se bušeletša bošilo bja sona

Go swana le mpša ge e boela mahlatšeng a yona.

13 Sebodu se re: “Go na le tawana kua tseleng,

E bile go na le tau kua mebarakeng.”

14 Sebodu se pshikologa mpeteng wa sona

Go swana le lebati leo le yago pele le morago ge le bulwa le ge le tswalelwa.

15 Sebodu se tsentše seatla sa sona sekotlelong sa dijo,

Eupša se tšwafa go se bušetša molomong.

16 Sebodu se nagana gore se hlalefile go feta batho ba šupa

Bao ba arabago ka tsela e nepagetšego.

17 Motho yo a rego ge a iphetela ka tsela a galefišwa* ke ngangišano yeo e sa mo nyakego,

O swana le motho yo a swarago mpša ka ditsebe.

18 Segafi se betša dibetša tša mollo, mesebe le dilo tše di bolayago.

19 Motho yo a dirago metlae ka wa gabo gomme a re: “Ke be ke no ipapalela,” o swana le segafi seo.

20 Go no swana le ge moo go se nago dikgong mollo o tima,

Le moo go se nago motho wa go senya ba bangwe maina, diphapano di a fela.

21 Monna wa ditshele yo a hlohleletšago ngangišano

O swana le malahla ao a dirago magala le dikgong tšeo di tukišago mollo.

22 Mantšu a motho yo a senyago ba bangwe maina a bose go swana le dijo tše dibose,

A metšega gabonolo gomme a ya ka mpeng.

23 Mantšu a mabose ao a tšwago mothong wa pelo e mpe,

A swana le silifera yeo e pentilego karolwana ya sebjana se se thubegilego sa letsopa.

24 Motho yo a hloilego ba bangwe, o bolela dilo tšeo di kwagalago eka ga se a ba hloya,

Eupša ka pelong ya gagwe o loga maano a go ba fora.

25 Le ge a ka bolela dilo tša go bontšha lešoko, o se ke wa mo tshepa,

Ka gobane pelong ya gagwe o nagana dilo tše šupa tše mpe.

26 Le ge a ka bolela maaka a uta lehloyo la gagwe,

Dilo tše mpe tšeo a di dirago di tla utollwa pele ga batho.

27 Motho yo a epago molete o tla wela ka gare ga wona

Gomme yoo a pshikološago leswika le tla boela go yena.

28 Motho yo a bolelago maaka o hloile bao a bolelago maaka ka bona,

Gomme motho yo a bolelago mantšu a go gokeletša, o a senya.