Nehemia

2 Ka kgwedi ya Nisani, ngwageng wa bo-20 wa ge go buša Kgoši Arithasasitha, kgoši e be e nyaka go nwa beine gomme bjale ka mehleng ke ile ka tšea beine ka e nea kgoši. Kgoši e be e se ya ka ya mpona ke nyamile kudu ka tsela ye. 2  Bjale kgoši e ile ya re go nna: “O re’ng o nyamile mola o sa babje? Ke a bona gore go na le seo se go tshwenyago.” Ge e realo, ke ile ka tšhoga kudu.

3  Ke moka ke ile ka re go kgoši: “Anke kgoši e phele go ya go ile! Ke tla se nyame bjang mola motse woo borakgolokhukhu ba ka ba boloketšwego go wona o sentšwe e bile dikeiti tša wona di jelwe ke mollo?” 4  Ke moka kgoši ya re go nna: “O nyaka go dira eng?” Kapelapela ke ile ka rapela Modimo wa magodimong. 5  Ka morago ka re go kgoši: “Ge e ba kgoši e se na bothata e bile e bona nna mohlanka wa yona a lokile, gona ntumelele ke ye Juda, e lego motse woo borakgolokhukhu ba rena ba boloketšwego go wona, gore ke ye go o aga leswa.” 6  Ge ke realo kgoši e ile ya bolela le nna gomme mohumagadi wa yona a dutše kgauswi le yona, ya re: “Leeto la gago le tlo tšea matšatši a makae, gona o tlo boa neng?” Ka gona, ke ile ka botša kgoši gore ke tlo boa neng, gomme ya ntumelela gore ke sepele.

7  Ke moka ka re go kgoši: “Ge e ba go kgahla kgoši, ke kgopela go newa mangwalo gore ke a iše go babuši ba ka bodikela bja Noka ya Eforate, gore ba tle ba ntumelele go feta nageng ya bona ge ke eya Juda. 8  Ke kgopela go newa le lengwalo leo le yago go Asafa yo a hlokomelago Serapa sa Kgoši, gore a nnee dikota gore go agwe dikeiti tša Moago wa Mašole wo o lego kgauswi le tempele, le gore go agwe maboto a motse le ntlo yeo ke tlago go dula go yona.” Ka gona kgoši e ile ya nnea mangwalo ao ka gobane Modimo wa ka o be a na le nna.

9  Mafelelong, ke ile ka fihla go babuši ba ka bodikela bja Noka ya Eforate ka ba nea mangwalo ao a tšwago go kgoši. Kgoši e be e nthomile le baetapele ba mašole le mašole ao a sepelago ka dipere. 10  Ge Sanebalathi wa Mobethe-horoni le Tobia wa Moamoni yo e lego mohlanka ba ekwa ka se, ba ile ba se thabe ka ge go be go na le motho yo a tlilego go thuša Baisiraele.

11  Mafelelong ke ile ka fihla Jerusalema gomme ka dula moo matšatši a mararo. 12  Nna le banna ba sego kae bao ke bego ke na le bona re ile ra tsoga bošego ra ya motseng. Go be go se na motho yo ke mmoditšego dikgopolo tšeo Modimo wa ka a mphilego tšona tša mabapi le seo ke swanetšego go se dira Jerusalema. Le gona ke be ke se na seruiwa se sengwe ntle le tonki yeo ke bego ke e nametše. 13  Ke moka ka tšwa bošego ka Keiti ya Moeding, ka feta pele ga Sediba sa Noga e Kgolo, ka leba Keiting ya Dintotoma tša Melora. Ke be ke lebeledišiša maboto a Jerusalema ao a bego a wele, le dikeiti tša yona tšeo di bego di jelwe ke mollo. 14  Ke ile ka fetela Keiting ya Sedibeng le Letangwaneng la Kgoši, gomme go be go se moo seruiwa seo ke bego ke se nametše se bego se ka feta gona. 15  Eupša ke ile ka tšwela pele ke sepela moeding bošegong bjoo, ke lebeledišiša maboto a motse, ke moka ka boa ka tsena ka Keiti ya Moeding, ka boela moo ke dulago gona.

16  Dintona di be di sa tsebe moo ke bego ke ile gona le gore ke be ke ile go dira eng, ka gobane ke be ke se ka bolela selo ka taba yeo le Bajuda, baperisita, bakgomana, banna bao ba etelelago pele le batho ka moka bao ba šomago. 17  Mafelelong ka re go bona: “Le lena le bona bothata bjo bogolo bjo re lego ka gare ga bjona. Le bona kamoo Jerusalema e sentšwego ka gona le kamoo dikeiti tša yona di fišitšwego ke mollo. Etlang re yo aga leswa maboto a Jerusalema gore re se sa hlabja ke dihlong.” 18  Ke ile ka ba botša kamoo Modimo wa ka a ilego a ba le nna, ka ba botša le mantšu ao kgoši e mpoditšego ona. Ke moka bona ba re: “A re yeng re thomeng go aga.” Ka gona ba ile ba kgothatšana gore ba thome mošomo.

19  Ge Sanebalathi wa Mobethe-horoni le Tobia wa Moamoni yo e lego mohlanka, gotee le Geshema wa Moarabia ba ekwa ka taba ye, ba re kwera ba ba ba bolela ka lenyatšo ba re: “Le dira’ng? Na le leka go hlanogela kgoši?” 20  Ke moka ka ba araba ka re: “Modimo wa magodimong ke yena yo a tlago go dira gore dilo di re sepelele gabotse, gomme rena bahlanka ba gagwe re tla thoma go aga, eupša lena ga le na selo Jerusalema e bile ga le na selo seo le ka se fiwago goba selo seo le se dirilego seo le ka gopolwago ka sona.”