Puku ya Bobedi ya Samuele
5 Ge nako e dutše e eya, meloko ka moka ya Isiraele ya tla go Dafida kua Heburone gomme ya re: “Bona! Re batho ba geno. 2 Nakong e fetilego ge Saulo e be e le kgoši ya rena, ke wena o bego o eteletše Baisiraele pele ge ba eya ntweng. Jehofa o itše go wena: ‘O tla diša batho ba ka ba Isiraele, ebile o tla ba moetapele wa Isiraele.’” 3 Ka gona banna ba bagolo ka moka ba Isiraele ba tla go kgoši kua Heburone, gomme Kgoši Dafida a dira kgwerano le bona moo Heburone pele ga Jehofa, ke moka ba tlotša Dafida gore e be kgoši ya Isiraele.
4 Dafida o be a na le mengwaga e 30 ge a eba kgoši, gomme o bušitše ka mengwaga e 40. 5 O bušitše Juda ka mengwaga e šupago le dikgwedi tše tshelelago a le kua Heburone, gomme a buša Isiraele ka moka le Juda ka mengwaga e 33 a le Jerusalema. 6 Kgoši le banna bao e bego e na le bona, ba ile ba ya Jerusalema gore ba yo lwa le Bajebusi bao ba bego ba dula nageng yeo. Bajebusi ba ile ba kwera Dafida ba re: “O ka se tsoge o tsene mo, gaešita le batho bao ba sa bonego le bao ba golofetšego ba tla go raka.” Bajebusi ba be ba ipotša gore Dafida a ka se tsoge a thopile motse wa bona. 7 Eupša Dafida a thopa lefelo leo le šireletšegilego la Tsione, leo ga bjale e lego Motse wa Dafida. 8 Letšatšing leo Dafida a re: “Bao ba hlaselago Bajebusi ba swanetše go tsena ka mokero wa meetse gomme ba bolaye batho bao ba golofetšego le bao Dafida a ba hloilego!” Ke ka baka leo go nago le polelwana yeo e rego: “Batho bao ba sa bonego le bao ba golofetšego ba ka se tsoge ba tsene ka ntlong.” 9 Ke moka Dafida a dula sebong gomme sa bitšwa gore ke Motse wa Dafida. Dafida a thoma go aga maboto le meago e mengwe go dikologa Mmotong le dikarolong tše dingwe tša motse. 10 Dafida a thoma go ba le matla kudu, gomme Jehofa Modimo wa madira o be a mo thekga.
11 Kgoši Hirama wa Tiro a romela batho go Dafida, a romela le dikota tša motsedara, babetli le batho bao ba šomago ka maswika, ke moka ba thoma go agela Dafida ntlo. 12 Ka gona Dafida a lemoga gore Jehofa o mmeile gore e be kgoši ya Isiraele, a ba a dira gore mmušo wa gagwe e be o mogolo ka baka la setšhaba sa Gagwe sa Isiraele.
13 Dafida o ile a nyala basadi ba bangwe ba direthe, a ba a nyala le basadi ba bangwe kua Jerusalema ka morago ga gore a tloge Heburone, gomme ba mmelegela barwa le barwedi ba bantšhi. 14 Maina a bana bao ba belegetšwego Dafida kua Jerusalema šea: Shamua, Shobaba, Nathane le Solomone, 15 Ibehara, Elishua, Nefege, Jafia, 16 Elishama, Eliada le Elifelete.
17 Ge Bafilisita ba ekwa gore Dafida o tloditšwe gore e be kgoši ya Isiraele, ka moka ga bona ba ile ba tšama ba mo nyaka. Ge Dafida a ekwa seo, a theogela lefelong la go iphihla. 18 Ke moka Bafilisita ba tla gomme ba dikologa Moedi wa Barefaimi. 19 Dafida a botšiša Jehofa a re: “Na ke yo lwa le Bafilisita? Na o tla nthuša gore ke ba fenye?” Ge a realo Jehofa a re go yena: “Sepela, ka gobane ke tla go thuša gore o ba fenye.” 20 Ka gona Dafida a ya Baali-peratsime a ba bolaela gona moo. Ke moka Dafida a re: “Jehofa o wišitše manaba a ka bjalo ka leboto leo le wišitšwego ke meetse.” Ke ka baka leo a ilego a reela lefelo leo leina a re ke Baali-peratsime. 21 Bafilisita ba ile ba tlogela medingwana ya bona gona moo. Ke moka Dafida le banna bao a bego a na le bona ba e tšea.
22 Ka morago Bafilisita ba tla gape, gomme ba dikologa Moedi wa Barefaimi. 23 Dafida a botšiša Jehofa, eupša Yena a re: “O se ke wa ya go bona o ba lebile. Etla ka morago ga bona ke moka o gahlane le bona mehlašaneng ya Baka. 24 Ge o ekwa mogwanto wa mašole mehlašaneng ya Baka, o hlasele mašole ao a Bafilisita ka pela, ka gobane Jehofa o tla ba a go etile pele gore o a bolaye.” 25 Ka gona, Dafida a dira kamoo Jehofa a mo laetšego ka gona, gomme a bolaya mašole a Bafilisita go tloga Geba go fihla Getsere.