Jesaya
48 Ekwang se, lena ditlogolwana tša Jakobo,
Lena bao le ipitšago ka leina la Isiraele,
Le lena bao le tšwago go Juda,*
Lena bao le dirago dikeno le diriša leina la Jehofa,
E bile le reta Modimo wa Isiraele,
Eupša dilo tše ka moka ga le di dire go tšwa pelong le ka go loka.
2 Ba ipolela gore ba tšwa motseng o mokgethwa,
Le gore ba nyaka gore Modimo wa Isiraele a ba thekge,
Yoo leina la gagwe e lego Jehofa wa madira.
3 “Ke boletše go tloga kgale dilo tšeo di tlago go direga,
Di tšwile molomong wa ka e bile ke dirile gore batho ba di tsebe.
Ke ile ka dira dilo tšeo ke di boletšego ka ponyo ya leihlo,
Gomme di ile tša direga.
4 Ka ge ke tseba gore le na le dihlogo tše thata,
E bile melala ya lena e swana le tšhipi,
5 Ke le boditše dilo tšeo kgale pele di ka direga,
Ke dirile gore le di kwe gore le se ke la re:
‘Modingwana wa rena ke yena a dirilego dilo tše,
Seswantšho sa rena seo se betlilwego le modimo wa rena wa seswantšho ke bona ba re laetšego dilo tše.’
6 Le kwele dilo tše e bile le di bone.
Na le ka se di bolele?
Go tloga gona bjale ke le tsebiša dilo tše diswa,
Le diphiri tše di fihlilwego tšeo le bego le sa di tsebe.
7 Ga se ka di dira kgale, eupša ke gona ke di dira,
E lego dilo tšeo le sa kago la di kwa go ba go fihlela lehono,
E le gore le se ke la re: ‘Re be re šetše re di tseba.’
8 Ga se la kwa selo e bile ga le tsebe selo.
Le gona ditsebe tša lena di be di tswaletšwe go tloga kgale.
Ke a tseba gore le tletše ka boradia,
Le gore ga e sa le le belegwa le be le duletše go dira sebe.
9 Eupša ke tla fokotša bogale bja ka ka baka la leina la ka,
Ka itshwara gore le se ke la fedišwa,
E le gore ke tumišwe.
10 Ke le hlwekišitše, eupša e sego go swana le kamoo ke hlwekišago silifera.
Ke le dumeletše gore le tlaišege e le gore ke le hlwekiše, go no swana le ge tšhipi e tološwa ke mollo.
11 Ruri ke tla tšea kgato ka baka la leina la ka,
Nka se lese leina la ka le hlomphollwa,
Nka se nee motho yo mongwe letago la ka.
12 “Ntheetše wena Jakobo, wena Isiraele yo ke go kgethilego.
Ke dula ke le ka mokgwa wo, ke nna wa pele e bile ke nna wa mafelelo.
13 Seatla sa ka se theile motheo wa lefase
Le gona seatla sa ka sa le letona se phurolotše magodimo.
Ge ke di bitša ka moka di emelela gotee.
14 “Kgobokanang ka moka ga lena gomme le theetše.
Ke mang gare ga medimo* a boletšego dilo tše?
Jehofa o ratile Korese.
O tla dira seo se kgahlago Modimo mabapi le Babilona,
Gomme o tla diriša letsogo la gagwe go otla Bakaladea.
15 Ge e le nna ke boletše e bile ke mmiditše.
Ke mo tlišitše gomme dilo tšeo a di dirago di tla atlega.
16 “Batamelang go nna gomme le theetše.
Go tloga mathomong ke boletše dilo tše bathong e sego ka sephiring.
Ke be ke le gona go tloga nakong ya ge di direga.
Gona bjale Mmuši Morena Jehofa o nthomile, a ba a mpha le moya wa gagwe.
17 Jehofa, yena yo a le rekollago, e lego yena Mokgethwa wa Isiraele, o re:
“Nna Jehofa, ke Modimo wa lena,
Yo a le rutago dilo tšeo di le holago,
Yo a le sepedišago tseleng yeo le swanetšego go sepela ka yona.
18 Ge feela le be le ka theetša ditaelo tša ka,
Gona khutšo ya lena e be e tla swana le noka,
Gomme go loka ga lena gwa swana le maphoto a lewatle.
19 Bana ba lena e be e tla ba ba bantšhi go swana le santa ya lewatle,
Gomme ditlogolwana tša lena tša swana le dithorwana tša yona.
Leina la lena le be le ka se hwelele goba la phumolwa pele ga ka.”
20 Etšwang Babilona!
Tšhabang le tšweng nageng ya Bakaladea.
Tsebišang dilo tše, le goeletše le thabile.
Di phatlalatšeng go fihlela mo lefase le felelago gona.
Le re: “Jehofa o rekolotše mohlanka wa gagwe Jakobo.
21 Ge a be a ba sepediša maganateng ga se ba ka ba nyorwa.
O be a dira gore meetse a tšwe leswikeng gore ba nwe,
Gomme a pharola leswika gore meetse a tšwe.”
22 Jehofa o re: “Batho ba babe ga ba na khutšo.”