Baahlodi

9 Abimeleke morwa wa Jerubaali o ile a ya Shikeme go bomalome ba gagwe gomme a bolela le bona le ba lapa la rakgolo wa gagwe ka moka a re: 2 “Hle botšišang baetapele ba Shikeme ka moka, le re: ‘Se se kaone ke sefe go lena, na ke gore le bušwe ke barwa ba Jerubaali ba 70, goba ke gore le bušwe ke monna o tee? Gopolang gore ke nna wa gabo lena.’”

3 Ka gona bomalome ba gagwe ba botša baetapele ka moka ba Shikeme dilo tšeo Abimeleke a ba boditšego tšona, gomme ba phetha ka gore ba latele Abimeleke ka ge ba be ba re: “Ke ngwanabo rena.” 4 Ke moka ba fa Abimeleke dishekele tša silifera tše 70 tšeo di tšwago ntlong ya Baali-berithe gomme yena a di diriša go hira banna ba go tšwafa go šoma le bao ba nago le lenyatšo gore ba sepele le yena. 5 Ka morago ga moo a ya ntlong ya tatagwe Jerubaali kua Ofura gomme a bolaya bana babo ba 70 leswikeng letee. Go ile gwa phologa Jothama, e lego morwa yo monyenyane wa Jerubaali, ka ge a be a khutile.

6 Ka gona, baetapele ka moka ba Shikeme le batho ka moka ba Bethe-milo ba kgobokana gomme ba bea Abimeleke gore e be kgoši ba le kgauswi le mohlare o mogolo, ka thoko ga philara yeo e bego e le Shikeme.

7 Ge ba boditše Jothama ka se, gateetee a tloga a ya go ema godimo ga Thaba ya Geritsima, a goeletša a re go bona: “Ntheetšeng lena baetapele ba Shikeme gomme Modimo o tla le theetša.

8 “Go kile gwa ba le mehlare yeo e bego e nyaka go ikgethela kgoši gomme ya re go mohlware: ‘Etla o re buše.’ 9 Eupša mohlware wa re go yona: ‘Na ke tlogele makhura a ka ao Modimo le batho ba tagafatšwago ka ona, ke yo šišinya makala a ka godimo ga mehlare e mengwe gore ke e buše?’ 10 Ke moka mehlare yeo ya re go mogo: ‘Etla o re buše.’ 11 Eupša mogo wa re go yona: ‘Na ke tlogele dienywa tša ka tše dibose, ke yo šišinyega ke okametše mehlare e mengwe ka moka?’ 12 Ke moka mehlare yeo ya re go moterebe: ‘Etla o re buše.’ 13 Moterebe wa re: ‘Na ke tlogele beine ya ka e mpsha yeo e thabišago Modimo le batho, gore ke yo šišinyega ke okametše mehlare e mengwe ka moka?’ 14 Mafelelong mehlare e mengwe ka moka ya re go mošwana: ‘Etla o re buše.’ 15 Ke moka mošwana wa fetola mehlare e mengwe wa re: ‘Ge e ba ruri le nkgetha gore ke be kgoši ya lena, gona etlang le tšhabeleng moriting wa ka. Eupša ge e ba le sa nkgethe, anke mollo o tšwe godimo ga mošwana gomme o tšhume mehlare ka moka ya metsedara ya Libanoni.’

16 “Bjale na le dirile gabotse le go bontšha gore le a botega ka go kgetha Abimeleke gore e be kgoši? Le gona na le bontšhitše Jerubaali le ba lapa la gagwe botho le go mo swara ka tlhompho ka morago ga dilo tše dibotse tšeo a le diretšego tšona? 17 Ge tate a be a le lwela, o ile a bea bophelo bja gagwe kotsing e le gore a le phološe go Bamidiane. 18 Eupša lehono le lwa le ba lapa la tate e bile le bolaile barwa ba gagwe ba 70 leswikeng letee, ke moka la dira Abimeleke yoo e lego morwa wa lekgoba la tate la mosadi gore e be kgoši ya baetapele ba Shikeme, feela ka gobane e le ngwanabo lena. 19 Ka gona, ge e ba lehono le dirile gabotse le go bontšha gore le botegela Jerubaali le lapa la gagwe, gona thabelang Abimeleke gomme le yena a le thabele. 20 Eupša ge e ba go se bjalo, gona anke Abimeleke a tšhume baetapele ba Shikeme le batho ba Bethe-milo ka mollo. Le gona, anke baetapele ba Shikeme le batho ba Bethe-milo ba tšhume Abimeleke ka mollo.”

21 Ke moka Jothama a tšhabela Beera gomme a dula moo ka gobane o be a boifa buti wa gagwe Abimeleke.

22 Abimeleke o ile a fetša mengwaga e meraro a buša* Baisiraele. 23 Ke moka Modimo a dira gore Abimeleke le baetapele ba Shikeme ba se kwane, gomme baetapele bao ba radia Abimeleke. 24 Se se dirilwe e le gore go lefeletšwe sehlogo seo se dirilwego barwa ba 70 ba Jerubaali e le gore banna bao ba nago le molato wa madi ba lefeletšwe ka tsela ye: Abimeleke a rwale molato wa go bolaya bana babo gomme baetapele ba Shikeme ba rwale molato wa go thuša Abimeleke go ba bolaya. 25 Ka gona baetapele ba Shikeme ba bea banna godimo ga dithaba gore ba lalele Abimeleke. Le gona ba be ba amoga batho bao ba bego ba feta tseleng yeo dilo. Mafelelong Abimeleke a tsebišwa ka seo.

26 Ke moka Gaale morwa wa Ebede le bana babo ba ya Shikeme gomme baetapele ba Shikeme ba thoma go mo tshepa. 27 Ba tšwa ba ya mašemong a bona ke moka ba fula diterebe gomme ba di gatakela gore ba dire beine, ke moka ba dira monyanya. Ka morago ga moo, ba ya ntlong ya modimo wa bona gomme ba ja ba ba ba nwa gomme ba roga Abimeleke. 28 Gaale morwa wa Ebede a re: “Abimeleke ke mang, le gona Shikeme ke mang moo re ka mo hlankelago? Na Abimeleke ga se morwa wa Jerubaali, le gona na Sebule ga se molaodi wa gagwe? Hlankelang barwa ba Hamoro, tatago Shikeme. 29 Ge nkabe batho ba ba laolwa ke nna, ke be ke tlo menola Abimeleke.” Ke moka a re go Abimeleke: “Oketša mašole a gago gomme o tle go lwa le nna.”

30 Ge Sebule moetapele wa motse a ekwa seo se boletšwego ke Gaale morwa wa Ebede, o ile a galefa kudu. 31 Ka gona Sebule a romela molaetša go Abimeleke ka sephiring, a re: “Tseba gore Gaale morwa wa Ebede le bana babo ba tlile Shikeme gomme ba hlohleletša batho gore ba lwe le wena. 32 Bjale wena o tsoge bošego le batho bao o nago le bona gomme le ye go ba lalela ka ntle ga motse. 33 Ge letšatši le se na go hlaba, o tsoge ka pela gomme o hlasele motse. Ke moka, ge Gaale le batho bao a nago le bona ba etla go lwa le wena, o dire seo o ka se kgonago go ba fenya.”

34 Ke moka Abimeleke le batho ka moka bao ba bego ba na le yena ba tsoga bošego, ba lalela Shikeme ka dihlopha tše nne tša mašole. 35 Letšatšing la go latela, ge Gaale morwa wa Ebede a etšwa gomme a ema keiting ya motse, Abimeleke le batho bao a bego a na le bona, le bona ba tšwa moo ba bego ba mo laletše. 36 Ge Gaale a bona batho bao, a re go Sebule: “Bona! Go na le batho bao ba theogago godimo ga dithaba.” Eupša Sebule a re go yena: “Wena o bona meriti ya dithaba e le bjalo ka ge eka ke batho.”

37 Ka morago Gaale a re: “Bona! Batho ba theoga ba etšwa ka gare ga naga, gomme sehlopha se sengwe se tla ka tsela yeo e fetago kgauswi le mohlare o mogolo wa Meonenime.” 38 Sebule a re go yena: “Na o lebetše seo o se boletšego ge o be o re: ‘Abimeleke ke mang moo re ka mo hlankelago?’ Na batho ba ga se bona bao o bego o ba nyatša? Bjale sepela o yo lwa le bona.”

39 Ka gona Gaale a etelela pele baetapele ba Shikeme gomme ba ya go lwa le Abimeleke. 40 Abimeleke a mo rakediša gomme Gaale a tšhaba, ke moka batho ba bantši ba bolawa tseleng yeo go fihla keiting ya motse.

41 Ke moka Abimeleke a tšwela pele a dula Aruma gomme Sebule a raka Gaale le bana babo kua Shikeme. 42 Letšatšing le le latelago, batho ba Shikeme ba tšwela ka ntle ga motse, gomme Abimeleke a botšwa taba yeo. 43 Ke moka yena a tšea batho a ba arola ka dihlopha tše tharo gomme ba ba lalela ka ntle ga motse. Ge a bona batho ba tšwela ka ntle ga motse, a ba hlasela gomme a ba bolaya. 44 Ke moka Abimeleke le dihlopha tša banna bao a bego a na le bona, ba batamela gomme ba ema keiting ya motse. Ka nako yeo, dihlopha tše pedi di ile tša hlasela batho bao ba bego ba le ka ntle ga motse gomme tša ba bolaya. 45 Abimeleke a lwa le motse woo letšatši ka moka gomme a o thopa. A bolaya batho bao ba bego ba le ka gare ga motse woo gomme a phušola motse woo ke moka a o tšhela ka letswai.

46 Ge baetapele ka moka ba toreng ya Shikeme ba ekwa seo, gateetee ba tšhabela lefelong la go ikuta leo le bego le le ntlong* ya Ele-berithe. 47 Ge Abimeleke a se na go tsebišwa gore baetapele ka moka ba toreng ya Shikeme ba kgobokane felo gotee, 48 yena le banna ka moka bao ba bego ba na le yena ba rotogela Thabeng ya Tsalamone. Abimeleke a tšea selepe, a rema lekala la mohlare, a le rwala legetleng gomme a botša batho bao a bego a na le bona, a re: “Seo le mponego ke se dira, se direng kapelapela!” 49 Ka gona batho ka moka ba rema makala a mehlare gomme ba latela Abimeleke. Ke moka ba bea makala ao go dikologa lefelo la go ikuta gomme ba le tšhuma ka mollo. Ka gona batho ka moka bao ba bego ba le toreng ya Shikeme, le bona ba hwa. E be e le banna le basadi ba e ka bago ba 1 000 (sekete).

50 Abimeleke a ya Thebetse gomme a hloma ditente moo, a lwa le Thebetse gomme a e thopa. 51 Go be go na le tora e tiilego gare ga motse gomme banna le basadi ka moka gotee le baetapele ka moka ba motse, ba ile ba tšhabela moo. Ba ile ba itswalelela ka gare ga tora gomme ba namela tlhaka ya yona. 52 Abimeleke a ya toreng a e hlasela, a batamela mojakong wa yona gore a e tšhume ka mollo. 53 Ke moka mosadi yo mongwe a lahlela tšhilo hlogong ya Abimeleke, a e pšhatlaganya. 54 Kapejana, Abimeleke a bitša mohlokomedi yo a mo rwalelago dibetša, a re go yena: “Khwamola sabola ya gago o mpolaye, e le gore ba se ke ba bolela ka nna ba re: ‘O bolailwe ke mosadi.’” Ka gona, mohlokomedi wa gagwe a mo hlaba ka sabola gomme a hwa.

55 Ge banna ba Isiraele ba bona gore Abimeleke o hlokofetše, ka moka ga bona ba boela gae. 56 Ka go re’alo, Modimo a bušetša Abimeleke bobe bjo a bo dirilego tatagwe ka go bolaya bana babo ba 70. 57 Le gona, Modimo a dira gore bobe ka moka bjoo banna ba Shikeme ba bo dirilego bo boele go bona. Ka gona, ba welwa ke thogako ya Jothama morwa wa Jerubaali.