Baahlodi

6 Baisiraele ba boela ba direla Jehofa dilo tše mpe. Ka gona Jehofa a tlogela Bamidiane ba ba fenya ka mengwaga e šupago. 2 Bamidiane ba buša Baisiraele. Ka baka leo Baisiraele ba thoma go iphihla dithabeng, maweng le mafelong ao go lego thata go fihla go ona. 3 Ge Baisiraele ba bjetše peu, Bamidiane, Baamaleke le batho bao ba tšwago ka bohlabela ba be ba etla gomme ba ba hlasela. 4 Ba be ba hloma ditente gore ba ba hlasele gomme ba senya dilo tšeo ba di bjetšego mašemong go fihla Gatsa, ba se šadišetše Baisiraele dijo, dinku, dikgomo goba ditonki. 5 Ba be ba etla le diruiwa tša bona le ditente tša bona e le ba bantšhi bjalo ka ditšie, e be e le ba bantšhi kudu e bile ba na le dikamela tše dintšhi. Ba be ba etla nageng gore ba tle ba e senye. 6 Ka gona Baisiraele ba ile ba diila kudu ka baka la Bamidiane, gomme ba kgopela Jehofa gore a ba thuše.

7 Ge Baisiraele ba kgopetše Jehofa gore a ba thuše ka baka la Bamidiane, 8 Jehofa o ile a romela moporofeta yo a ilego a re go bona: “Jehofa Modimo wa Isiraele o re: ‘Ke le ntšhitše Egepeta moo le bego le le makgoba.* 9 Ka le phološa go Baegepeta le go batho ka moka bao ba bego ba le gateletše, ka ba raka pele ga lena gomme ka le nea naga ya bona. 10 Le gona ka re go lena: “Ke nna Jehofa Modimo wa lena. Le se ke la rapela* medimo ya Baamore bao le dulago nageng ya bona.” Eupša lena ga se la ntheetša.’”

11 Ka morago morongwa wa Jehofa a tla a dula ka fase ga mohlare o mogolo woo o bego o le Ofura, woo e bego e le wa Joashe setlogolo sa Abiesere. Morwa wa gagwe Gideone o be a fola korong segatelong sa diterebe e le gore a e utele Bamidiane. 12 Ke moka morongwa wa Jehofa a tla go yena a re: “Jehofa o na le wena, wena monna yo matla wa mogale.” 13 Ge a re’alo, Gideone a re go yena: “Tshwarelo hle, mong wa ka. Ge e ba Jehofa a na le rena, gona go re’ng re wetšwe ke tše ka moka? Le gona di kae dilo tše dibotse tšeo botatago rena ba re boditšego tšona ba re: ‘Jehofa o re ntšhitše Egepeta?’ Bjale Jehofa o re lahlile, e bile o tlogetše Bamidiane gore ba re fenye.” 14 Jehofa* a mo lebelela gomme a re: “Tia matla o sepele, gomme o tla phološa Baisiraele go Bamidiane. Ke nna ke go romago.” 15 Ke moka Gideone a re go yena: “Tshwarelo hle Jehofa. Ke tla phološa Baisiraele bjang? Lapa la gešo ke le lenyenyane-nyenyane molokong wa Manase, le gona ke nna yo monyenyane-nyenyane lapeng la tate.” 16 Eupša Jehofa a re go yena: “Ka gobane ke tla ba le wena gomme o tla fenya Bamidiane bjalo ka ge eka o fenya motho o tee.”

17 Ge a re’alo, Gideone a re go yena: “Ge e ba o nkamogela gona mpontšhe leswao le le bontšhago gore ke wena o bolelago le nna. 18 Hle o se ke wa tloga mo go fihla ke boa le mpho ya ka gomme ke e bea pele ga gago.” Ke moka morongwa yoo a re: “Ke tla dula mo go fihla o boa.” 19 Gideone a ya a apea nama ya putšanyana, a dira senkgwa se se sa omelwago ka folouru yeo e lekanago dikhilograma tše 11.* A tsenya nama ka mmanking gomme sopo a e tšhela ka pitšeng ya go apea, ke moka a mo išetša tšona gomme a mo solela tšona ka fase ga mohlare o mogolo.

20 Morongwa wa Modimo wa nnete a re go yena: “Tšea nama le senkgwa se se sa omelwago o di bee moo godimo ga leswika le legolo gomme o tšhele sopo.” Ke moka Gideone a dira bjalo. 21 Morongwa wa Jehofa a kgwatha nama le senkgwa se se sa omelwago ka ntlha ya lehlotlo leo a bego a le swere, ke moka mollo wa tšwa leswikeng wa tšhuma nama le dinkgwa tše di sa omelwago. Ke moka morongwa wa Jehofa a nyamalala. 22 Ka gona Gideone a lemoga gore e be e le morongwa wa Jehofa.

Gateetee Gideone a re: “Joo Mmuši Morena Jehofa! Ke bone morongwa wa Jehofa re lebantše difahlego!” 23 Eupša Jehofa a re go yena: “Khutšo a e be le wena.* O se ke wa tšhoga. O ka se hwe.” 24 Ka gona Gideone a agela Jehofa aletare moo gomme e sa bitšwa Jehofa-shalomo* go fihla le lehono. E sa le kua Ofura motseng wa Baabiesere.

25 Bošegong bjoo Jehofa a re go yena: “Tšea powana* ya tatago, powana yeo e nago le mengwaga e šupa, gomme o phušole aletare yeo tatago a e diretšego Baali ke moka o reme le kota e kgethwa* yeo e lego kgauswi le yona. 26 Paka maswika gomme o direle Jehofa Modimo wa gago aletare godimo ga sebo se, ka morago o tšee powana gomme o dire sehlabelo sa go fišwa ka yona godimo ga dikgong tša kota e kgethwa* yeo o e remilego.” 27 Ke moka Gideone a tšea banna ba lesome go bahlanka ba gagwe gomme a ya go dira dilo tšeo Jehofa a mmoditšego tšona. O di dirile bošego e sego mosegare ka ge a be a tšhaba ba lapa la tatagwe le banna bao ba bego ba dula motseng woo.

28 Ge banna ba motse ba tsoga ka masa letšatšing la go latela, ba ile ba bona aletare ya Baali e wišitšwe gomme kota e kgethwa* yeo e bego e le ka thoko ga yona e remilwe e bile go dirilwe sehlabelo ka powana godimo ga aletare yeo e bego e sa tšwa go agwa. 29 Ba botšišana ba re: “Ke mang yo a dirilego dilo tše?” Ka morago ga ge ba nyakišišitše ba re: “Ke Gideone morwa wa Joashe a dirilego dilo tše.” 30 Ka gona banna ba motse ba re go Joashe: “Ntšhetša morwa wa gago ka ntle gore re tle re mmolaye, ka gobane o phušotše aletare ya Baali a ba a rema kota e kgethwa* yeo e bego e le kgauswi le yona.” 31 Ke moka Joashe a re go bohle bao ba bego ba elwa le yena: “Na le nyaka go lwela Baali? Na le nyaka go mo phološa? Yo a mo lwelago o swanetše go bolawa mesong ye. Ge e ba Baali e le Modimo, gona a a itwele ka ge go na le yo a phušotšego aletare ya gagwe.” 32 Letšatšing leo Joashe a bitša Gideone gore ke Jerubaali, e le ge a re: “Anke Baali a itwele ka ge go na le yo a phušotšego aletare ya gagwe.”

33 Bamidiane ka moka, Baamaleke le batho bao ba tšwago ka Bohlabela, ba ile ba kgobokana ke moka ba tshela noka ba tshelela Moeding wa Jeseriele gomme ba hloma ditente moo. 34 Ke moka Gideone a tlelwa ke moya wa Jehofa gomme a letša naka ke moka Baabiesere ba kgobokana ba mo šala morago. 35 A romela baromiwa go ba moloko wa Manase gomme le bona ba kgobokana ba mo šala morago. A romela baromiwa le go ba moloko wa Ashere, Sebulone le Nafutali gomme ba tla go mo gahlanetša.

36 Ke moka Gideone a re go Modimo wa nnete: “Ge e ba o phološa Baisiraele ka nna, go etša ge o holofeditše, 37 gona ke ala boya bja nku seboeng. Ge phoka e ka wela godimo ga bjona feela eupša mo fase ka moka gwa oma, gona ke tla tseba gore o tla phološa Baisiraele ka nna go etša ge o holofeditše.” 38 Go ile gwa ba bjalo. Ge a tsoga ka masa letšatšing le le latelago ke moka a gamola boya bja nku, gwa tšwa meetse a mantšhi a phoka ao a ilego a tlatša sebjana se segolo. 39 Lega go le bjalo Gideone a re go Modimo wa nnete: “Anke o se nkgalefele. Ntumelele ke diriše boya bja nku gape go bona ge e ba o tlo ba le nna. Ke kgopela gore boya bja nku e be bjona bo omago gomme phoka e kolobiše mmu ka moka.” 40 Ka gona Modimo a dira bjalo bošegong bjoo, gwa oma boya bja nku feela gomme phoka ya kolobiša mmu ka moka.