Lengwalo la Bobedi le le Yago go Bathesalonika
2 Banabešo, ge e le mabapi le taba ya go ba gona ga Morena wa rena Jesu Kriste le go kgobokeletšwa ga rena gotee go yena, re le kgopela 2 gore le se ke la dumelela batho ba fetoša tsela e nepagetšego yeo le naganago ka yona, goba ba dira gore le tshwenyege ka go le botša gore letšatši la Jehofa le fihlile. Le se ke la tshwenyega le ge ba ka re molaetša woo o tšwa go Modimo goba ba re ba o badile lengwalong leo le tšwago go rena.
3 Le se ke la dumelela motho le ge e le ofe a le aroša ka tsela le ge e le efe, ka gobane bahlanogi ba swanetše go tla pele letšatši leo le etla gomme motho wa go hloka molao a utollwe, e lego yena motho yo a tlago go fedišwa. 4 Motho yoo ke lenaba leo le iponago le phagametše motho yo mongwe le yo mongwe yoo batho ba mo tšeago e le modimo goba selo se sengwe le se sengwe seo batho ba se rapelago. Ka baka leo o dula tempeleng ya Modimo, a itira modimo gore batho ka moka ba kgone go mmona. 5 Na ga le gopole gore ge ke be ke sa na le lena, ke be ke fela ke le botša dilo tše?
6 Bjale le a tseba gore ke eng seo se mo thibelago gore a se ke a utollwa pele nako yeo e beilwego e fihla. 7 Ke nnete gore motho yoo wa go hloka molao o šetše a thomile go dira dilo tše mpe, eupša dilo tšeo e tla dula e le sephiri go fihlela yo a mo thibelago a se sa le gona. 8 Ka morago ga moo, motho yo wa go hloka molao o tla utollwa. Morena Jesu o tla mo fediša ka mantšu a matla ao a tšwago molomong wa gagwe,* gomme a mo fetoša lefeela nakong ya ge go ba gona ga Jesu go bonagala. 9 Eupša motho wa go hloka molao o gona ka baka la Sathane. Sathane ke yena a mo neago matla a go dira mehlolo e mentšhi, dipontšho tša maaka le dilo tša go makatša. 10 Ebile o mo nea le matla a gore a dire selo se sengwe le se sengwe seo se sa lokago, e le gore a fore bao ba tlago go fedišwa. Ba tla fedišwa ka gobane ga se ba ka ba amogela nnete le go e rata e le gore ba tle ba phološwe. 11 Ke ka baka leo Modimo a ba tlogelago gore ba forwe ka thuto ya maaka, gore ba dumele maaka ao ba a botšwago, 12 e le gore batho ka moka bao ba sa dumelego nnete eupša ba kgahlwa ke go dira dilo tša go se loke, ba tle ba ahlolwe.
13 Eupša lena banabešo bao ba ratwago ke Jehofa, re swanetše go dula re leboga Modimo ka baka la lena ka gobane o le kgethile go tloga mathomong gore le phološwe. O dirile gore le be ba bakgethwa ka moya wa gagwe ka gobane le dumela nnete. 14 Le gona o le kgethile gore le tle le phološwe ka ditaba tše dibotse tšeo re di bolelago, e le gore le tle le hwetše letago go swana le Morena wa rena Jesu Kriste. 15 Ka gona bana bešo, emang le tiile gomme le swarelele dilong tšeo le di rutilwego, go sa šetšwe gore le di boditšwe goba le di kwele ka lengwalo leo re le ngwaletšego lona. 16 Modimo Tatago rena o a re rata, gomme ka baka la ge a na le botho o dula a re kgothatša le go re nea kholofelo. Re rapela gore yena le Morena wa rena Jesu Kriste 17 ba le kgothatše ebile ba le matlafatše, e le gore le dule le bolela dilo tše dibotse le go di dira.