Psalme
Koša ya Dafida.
27 Jehofa o mpha seetša e bile o a mphološa.
Ke tla boifa mang?
Jehofa o šireletša bophelo bja ka.
Nka se boife motho.
2 Ge badirabobe bao e lego manaba a ka ba be ba ntlhasela e le gore ba je nama ya ka,
Ba ile ba kgopša gomme ba wa.
3 Le ge mašole a ka ntikanetša gore a lwe le nna,
Nka se boife.
Le ge mašole a ka lwa le nna,
Ke tla dula ke tshepile Modimo.
4 Selo setee seo ke se kgopetšego go Jehofa,
E lego seo ke katanelago go se fihlelela,
Ke gore ke dule ka ntlong ya Jehofa matšatši ohle a ge ke sa phela,
Gore ke bone dilo tše dibotse tša Jehofa
Le gore ke kgahlwe ke go lebelela tempele ya gagwe.
5 Ka gobane o tla nkuta lefelong la gagwe letšatšing la tlalelo.
O tla nkuta lefelong leo le utegilego ka tenteng ya gagwe.
O tla mpea godimodimo ga leswika e le gore manaba a ka a se nkgobatše.
6 Ga bjale hlogo ya ka e godimo ga manaba a ka ao a ntikologilego.
Ke tla dira dihlabelo tenteng ya gagwe ke opelela godimo ke thabile.
Ke tla opelela Jehofa dikoša tša go mo reta.
7 Hle Jehofa, anke o nkwe ge ke go goelela,
O nkwele bohloko gomme o nkarabe.
8 Pelo ya ka e nkgopoditše gore o itše ke go nyake gore o nkwele bohloko.
Hle Jehofa, ke tla go nyaka gore o nkwele bohloko.
9 O se nkutele sefahlego sa gago.
O se rake mohlanka wa gago o galefile.
O a nthuša.
O se ntahle goba wa ntlogela, wena Modimo wa ka yo a mphološago.
10 Le ge tate le mma ba ka ntlogela,
Wena Jehofa o tla nkamogela.
11 Hle Jehofa, ntlhahle gore ke sepele tseleng ya gago.
Ntshepediše tseleng ya go loka gomme o ntšhireletše go manaba a ka.
12 O se tlogele manaba a ka a dira seo a se ratago ka nna.
Ka gobane dihlatse tša maaka di boletše maaka ka nna,
E bile di nyaka go nkgobatša.
13 Nkabe ke le kae ge nkabe ke se na tumelo
Ya gore ke tla bona dilo tše dibotse tšeo Jehofa a di dirago, ge feela ke sa phela?
14 Letela Jehofa o sa fele pelo,
Eba le sebete gomme o tie matla.
Letela Jehofa o sa fele pelo.