Go Filemone

1 Nna Paulo yo a golegilwego ka baka la Kriste Jesu, ke na le Timotheo ngwanabo rena, ke ngwalela wena Filemone yo re mo ratago le yo re šomišanago le yena, 2 le Apifia kgaetšedi ya rena, Arekipase yo a šomago ka thata bjalo ka lešole go swana le rena le phuthego yeo e kopanelago ntlong ya gago ke re:

3 Ke rapelela gore Modimo Tatago rena le Morena wa rena Jesu Kriste ba le bontšhe botho bjo bogolo le go le fa khutšo.

4 Ke dula ke leboga Modimo wa ka ge ke bolela ka wena dithapelong tša ka, 5 ka ge ke dula ke ekwa gore o na le tumelo go Morena Jesu le gore o mo rata ka pelo ka moka e bile o rata le badumedigotee le wena. 6 Ke rapela gore tumelo yeo wena le badumedigotee le wena le nago le yona, e dire gore o lemoge dilo ka moka tše dibotse tšeo re di hweditšego ka baka la Kriste. 7 Ngwanešo, ke ile ka thaba kudu le go kgothatšega ge ke ekwa gore o rata badumedigotee le wena e bile o a ba lapološa.

8 Ka gona, ka ge ke le Moapostola wa Kriste ke na le matla a go go botša gore o dire eng, 9 eupša ke go kgopela ka gobane ke tseba gore o na le lerato, le gona nna Paulo ke šetše ke tšofetše e bile ke golegilwe ka ge ke dumela go Kriste Jesu. 10 Ke go kgopela gore o thuše ngwanaka Onesimo, yo ke ilego ka ba bjalo ka tatagwe ge ke be ke golegilwe.* 11 Mathomong o be a se na mohola go wena, eupša gona bjale o na le mohola go rena ka moka. 12 Le ge ke mo rata kudu, ke mo gomišetša go wena.

13 Ke be nka rata gore a dule le nna gore a ntlhankele ka tsela yeo o bego o ka rata go ntlhankela ka yona, ka ge ke golegilwe ka baka la go bolela ditaba tše dibotse. 14 Eupša ga ke nyake go dira selo o se wa ntumelela, e le gore o mo amogele ka go rata e sego ka go gapeletšwa. 15 Mohlomongwe ke ka baka leo a go tlogetšego ka nakwana, e le gore a boele go wena go ya go ile, 16 e se sa le lekgoba, eupša a le bohlokwa kudu go feta lekgoba, e le ngwanabo rena yo a rategago. Ke mo rata kudu, e bile le wena o tlo mo rata kudu ka ge e le lekgoba la gago le modumedigotee le wena. 17 Ka gona ge e ba o ntšea ke le mogwera wa gago, gona mo amogele ka tsela yeo o bego o tla nkamogela ka yona. 18 Le gona, ge e ba a go fošeditše goba a go kolota selo le ge e le sefe, gona molato woo a e be wa ka. 19 Nna Paulo ke ngwala ka letsogo la ka, ke re: Ke tla go patela, le ge nna ke go thušitše ka dilo tše dintšhi. 20 Ngwanešo, ke kgopela o nthuše ka ge nna le wena re le barutiwa ba Morena. Matlafatša pelo ya ka ka ge re le barutiwa ba Kriste.

21 Ke go ngwalela ke kgodišegile gore o tla dumelelana le kgopelo ya ka, ke tseba gore o tla dira le dilo tše di fetago tše ke di bolelago. 22 E bile ke kgopela gore o ntokišeletše le madulo, gobane ke tshepa gore ka ge le nthapelela ke tla lokollwa kgolegong gore ke boele go lena.

23 Epafora yo a golegilwego gotee le nna* ka baka la Kriste Jesu o re ke go dumediše. 24 Mareka, Aristareko, Dema le Luka bao ke šomago le bona, le bona ba re ke go dumediše.

25 Ke rapela gore Morena Jesu Kriste a le bontšhe botho bjo bogolo ka ge le na le dipelo tše dibotse.