Hesekiele

38 Jehofa a bolela le nna gape a re: 2 “Morwa wa motho, lebelela Gogo wa naga ya Magogo, e lego kgošana e kgolo ya Mesheke le Tubala, gomme o mo porofetele. 3 O mmotše o re: ‘Mmuši Morena Jehofa o re: “Ke lwa le wena Gogo, wena kgošana e kgolo ya Mesheke le Tubala. 4 Ke tla dira gore o sepele ka tsela e nngwe gomme ka go tsenya dihuku mehlagareng. Ke tla dira gore wena le mašole a gago ka moka le yo lwa le na le dipere le banamedi ba dipere bao ka moka ga bona ba aperego gabotse, ebile e le sehlopha se segolo seo se swerego dikotse tše dinyenyane le tše dikgolo. Ka moka ba swere disabola. 5 Ba sepela le mašole a Peresia, a Ethopia le a Pute, ka moka ga bona ba swere dikotse le dikefa tša ntwa. 6 Le gona ba be ba na le Gomere le mašole a yona ka moka, le ditlogolwana tša Togarama tšeo di tšwago karolong ya kgole ya ka leboa gomme le tšona di be di na le mašole a tšona ka moka. Ditšhaba tše dintši di tla go thekga.

7 “‘“Wena le mašole a gago ao a nago le wena itokišeng, gomme wena o tla ba molaodi wa ona.

8 “‘“O tla bitšwa ka morago ga matšatši a mantši. Mafelelong ka morago ga mengwaga e mentši, o tla hlasela naga yeo batho ba yona ba ilego ba phologa ka morago ga gore ba hlaselwe ka sabola, ba kgoboketšwa go tšwa ditšhabeng tše dintši gomme ba išwa dithabeng tša Isiraele tšeo e bego e le kgale e le mašope. Batho bao ba dulago nageng ye, ba tšerwe ditšhabeng tšeo ba bego ba išitšwe go tšona gomme ka moka ga bona ba dula ba šireletšegile. 9 Wena le mašole a gago ka moka le ditšhaba tše dintši tšeo di nago le wena, le tla ba hlasela bjalo ka ledimo, gomme la khupetša naga bjalo ka maru.”’

10 “Mmuši Morena Jehofa o re: ‘Letšatšing leo o tla tlelwa ke dikgopolo tše mpe pelong ya gago, gomme wa loga maanomabe. 11 O tla re: “Ke tla ya go hlasela naga yeo e nago le metse e sa šireletšwago. Ke tla hlasela bao ba šireletšegilego, bao ba sa tshwenywego ke selo, bao ka moka ga bona ba dulago metseng yeo e sego ya šireletšwa ka maboto, dikota tša go tswalela mejako goba dikeiti.” 12 E le gore o thope dilo tše dintši, o hlasele mafelo ao a sentšwego ao gona bjale a nago le batho bao ba dulago go ona, o hlasele le batho bao ba kgobokeditšwego go tšwa ditšhabeng tše dingwe bao ba ikgobokeletšago mahumo le dithoto, e lego bao ba dulago bogareng bja lefase.

13 “‘Basheba, Badedane le batho bao ba rekišago ba Tarashishi gotee le mašole a bona ka moka ba tla re go wena: “Na o hlasela gore o tle o thope dilo tše dintši? Na o kgobokeditše mašole a mantši gore o tle o tšee silifera le gauta, mahumo le dithoto, o be o thope dilo tše dintši kudu?”’

14 “Morwa wa motho, porofeta o botše Gogo o re: ‘Mmuši Morena Jehofa o re: “Na o ka se tsebe letšatšing la ge batho ba ka ba Isiraele ba dula ba šireletšegile? 15 O tla tla o etšwa lefelong la gago, o etšwa karolong ya kgolekgole ya ka leboa, o na le ditšhaba tše dintši, ka moka ga tšona di nametše dipere, e le mašole a mantši. 16 O tla hlasela batho ba ka ba Isiraele go swana le maru ao a khupeditšego naga. Wena Gogo, ke tla dira gore mehleng ya bofelo o hlasele naga ya ka e le gore ditšhaba di tle di tsebe gore ke nna yo mokgethwa ka seo ke go dirago sona.”’

17 “Mmuši Morena Jehofa o re: ‘Na o sa le yena yo ke boletšego le yena nakong e fetilego ke diriša bahlanka ba ka, e lego baporofeta ba Isiraele bao ba ilego ba porofeta ka mengwaga e mentši gore o tla lwa le bona?’

18 “Mmuši Morena Jehofa o re: ‘Letšatšing la ge Gogo a tlo hlasela naga ya Isiraele, ke tlo galefa kudu. 19 Ke tla bolela ke galefile ebile ke befetšwe kudu, gomme letšatšing leo go tla ba le tšhišinyego e kgolo ya lefase nageng ya Isiraele. 20 Dihlapi tša lewatleng, dinonyana tša magodimong, dibata tša nageng, digagabi ka moka tše di gagabago mmung le batho ka moka bao ba lego lefaseng, ba tla thothomela ka baka la ka. Dithaba di tla phušolwa, maswika a wa, gomme maboto ka moka a wela fase.’

21 “Mmuši Morena Jehofa o re: ‘Ke tla dira gore sabola e tle e mo hlasele tikologong ka moka ya dithaba tša ka. Motho yo mongwe le yo mongwe o tla lwa le ngwanabo ka sabola. 22 Ke tla mo ahlola ka leuba la bolwetši le ka go bolaya batho ba bantši, ka pula ya matlorotloro, sefako, mollo le ka sebabole.* Ke tla ahlola yena le mašole a gagwe gotee le ditšhaba tše dintši tšeo di nago le yena. 23 Ke tla bontšha gore ke na le matla a magolo le gore ke nna Modimo yo mokgethwa, ebile ke tla dira gore ditšhaba tše dintši di ntsebe. Ke moo di tlago go tseba gore ke nna Jehofa.’