Lengwalo la Pele le le Yago go Bathesalonika

1 Nna Paulo ke ngwalela phuthego ya Bathesalonika lengwalo le ke na le Silibano* le Timotheo. Phuthego ye ke ya Modimo Tate le Morena Jesu Kriste. Ke re:

Eka Modimo a ka le bontšha botho bjo bogolo a ba a dira gore le be le khutšo.

2 Re dula re leboga Modimo dithapelong tša rena, ge re le gopola ka moka ga lena. 3 Le gona, ge re le pele ga Modimo Tatago rena, re dula re gopola dilo tše dibotse tšeo le di dirilego ka gobane le mo rata ebile le na le tumelo go yena. Re gopola le kamoo le kgotleletšego mathata ka gona ka gobane le na le kholofelo go Jesu Kriste Morena wa rena. 4 Lena banabešo bao ba ratwago ke Modimo, re a tseba gore Modimo o le kgethile, 5 ka gobane ditaba tše dibotse tšeo re le boditšego tšona, ga se ra le botša tšona ka mantšu feela eupša re le boditše tšona re thušwa ke moya o mokgethwa. Re be re kgodišegile gore dilo tšeo re le botšago tšona ke nnete le gore molaetša wa rena o le thušitše kudu. Le a tseba gore re ile ra itshwara bjang ge re na le lena gore le holege. 6 Le ile la re ekiša la ba la ekiša Morena, ka gobane le ge le be le tlaišwa kudu, le ile la amogela lentšu le thabile ka ge le thušwa ke moya o mokgethwa. 7 Ka gona le bile mohlala o mobotse go badumedi ka moka ba Matsedonia le ba Akaya.

8 Ga se la bolela lentšu la Jehofa Matsedonia le Akaya feela, eupša lefelong le lengwe le le lengwe batho ba kwele ka tumelo yeo le nago le yona go Modimo. Ka gona ga go sa nyakega gore re bolele selo. 9 Ba dula ba bolela kamoo re ilego ra kopana le lena la mathomo le kamoo le ilego la tlogela medingwana ya lena, e le gore le thome go hlankela* Modimo yo a phelago le wa nnete. 10 Le gona ba dula ba bolela kamoo le letetšego morwa wa gagwe go tšwa magodimong. Morwa yoo ke Jesu yo a ilego a mo tsoša bahung, e lego yena yoo a tlago go re phološa nakong ya ge Modimo a tla be a galefile.