Ekisodo

27 “O dire aletare ka kota ya mohlare wa mošwana, botelele bja yona e be dimithara tše e ka bago tše pedi, gomme bophara bja yona e be dimithara tše e ka bago tše pedi. Aletare yeo e be ya mahlakore a mane a go lekana. Botelele bja yona go ya godimo e be mo e ka bago mithara o tee. 2 O e direle manaka dikhoneng tša yona tše nne. Manaka ao o a dire ka yona kota yeo o dirilego aletare ka yona gomme o a pente ka koporo. 3 O e direle dipaketana tša go olela molora, o e direle digarafo, dibjana, diforoko, le dibjana tša go swara magala. Dibjana tša yona ka moka o di dire ka koporo. 4 O e direle sefo ka koporo, mo sefong yeo o dire mekgoko e mene ya koporo dikhoneng tša yona tše nne. 5 O e bee ka tlasenyana mo aletare e felelago gona, e be kgauswi le bogareng bja aletare. 6 O direle aletare yeo dikota ka mohlare wa mošwana gomme o di pente ka koporo. 7 Dikota tšeo o di tsenye mekgokong gomme ge aletare e rwalwa di be ka mahlakoreng a yona a mabedi. 8 O dire aletare gore e be lepokisi le le bulegilego la mapolanka. O e dire feela bjalo ka ge ke go bontšhitše thabeng ye.

9 “O direle taberenakele lapa. Ka lehlakoreng la ka borwa la taberenakele o dire digareteine tšeo di dirilwego ka linene e boletiana ya dimithara tše e ka bago tše 44 ka lehlakoreng letee. 10 O e direle diphilara tše 20 le maotwana a 20 a koporo ao a nago le mašoba. Dihuku tša diphilara tšeo le dilo tša go di kopanya e be tša silifera. 11 Digareteine tša ka leboa le tšona e be tša dimithara tše e ka bago tše 44 ka botelele. E be le diphilara tše 20, maotwana a 20 a koporo ao a nago le mašoba, dihuku tša silifera le dilo tša go kopanya diphilara. 12 Digareteine tša ka bodikela bja lapa e be tša dimithara tše e ka bago tše 22 ka botelele, o dire le diphilara tše lesome le maotwana a lesome ao a nago le mašoba. 13 Bophara bja lapa leo ka thoko ya ka bohlabela e be dimithara tše e ka bago tše 22. 14 Digareteine tša ka lehlakoreng le lengwe e be tša dimithara tše e ka bago tše šupa, e be le diphilara tše tharo le maotwana a mararo ao a nago le mašoba. 15 Digareteine tša ka lehlakoreng le lengwe le tšona e be tša dimithara tše e ka bago tše šupa, di be le diphilara tše tharo le maotwana a mararo ao a nago le mašoba.

16 “Keiti ya lapa e be le digareteine tša botelele bja dimithara tše e ka bago tše senyane, di dirwe ka garane e talalerata, wulu ya mmala o mophepholo, garane e khwibidukhwibidu le linene e boletiana, di be le diphilara tše nne le maotwana a mane ao a nago le mašoba. 17 Diphilara ka moka go dikologa lapa leo di be le dilo tša go bofa tša silifera le dihuku tša silifera, eupša maotwana a tšona ao a nago le mašoba e be a koporo. 18 Botelele bja lapa e be dimithara tše e ka bago tše 44, bophara bja lona e be dimithara tše e ka bago tše 22, gomme gareteine yeo e lego lapeng yeo e dirilwego ka linene e boletiana e be dimithara tše e ka bago tše pedi ka botelele go ya godimo, gomme lapeng leo go be le maotwana a koporo ao a nago le mašoba. 19 Dibjana ka moka tša ka taberenakeleng le dilo tšeo di dirišwago moo gotee le dipikiri tša tente ya yona le tša go dira lapa, e be tša koporo.

20 “O laele Baisiraele gore ba go tlišetše makhura a mohlware ao a sego a tswakwa ka selo, e le gore a tle a dirišwe go laeta mabone ka mehla. 21 Arone le barwa ba gagwe ba dire gore mabone ao a tuke ka taberenakeleng* pele ga Jehofa go tloga ge letšatši le sobela go fihla mesong. Mabone ao a be ka ntle ga gareteine yeo e širilego Areka yeo e nago le maswika ao a ngwadilwego melao ya ka. Ye ke taelo yeo Baisiraele ba swanetšego go e phetha melokong ya bona ka moka go ya go ile.