Lengwalo le le Yago go Baefeso
1 Nna Paulo, yo a kgethilwego ke Modimo go ba moapostola wa Kriste Jesu, ke ngwalela Bakriste ba botegago bao ba lego phuthegong ya Efeso e bile e le balatedi ba Kriste Jesu ke re:
2 Ke rapela gore Modimo Tatago rena le Morena Jesu Kriste ba ka le bontšha botho bjo bogolo le go le nea khutšo.
3 A re tumišeng Modimo yena Tatago Morena wa rena Jesu Kriste, ka gobane o dirišitše moya o mokgethwa go re šegofatša ka ge re le barutiwa ba Kriste. 4 Modimo o re kgethile gore re be balatedi ba Kriste pele batho ba mathomo ba ka ba le bana, gore re be ba bakgethwa gomme borapedi bja rena bo hlweke ka ge re mo rata. 5 Ka gobane o re kgethile e sa le pele gore re be bana ba gagwe a diriša Jesu Kriste go ya ka thato ya gagwe, 6 e le gore batho ba tumiše Modimo ka ge a re bontšhitše botho bja gagwe bjo bogolo a diriša morwa wa gagwe yo a mo ratago kudu. 7 Modimo o re lokolotše a ba a re lopolla a diriša madi a morwa wa gagwe gore a re lebalele dibe tša rena. Ka nnete bjo ke botho bjo bogolo bja Modimo.
8 Modimo ga se a re tima botho bja gagwe bjo bogolo gotee le bohlale le kwešišo, 9 ka go re tsebiša sephiri sa gagwe se sekgethwa sa dilo tšeo a nyakago go di dira. Sephiri seo ke sa dilo tšeo di mo kgahlago tšeo a bego a rerile go di dira. 10 O ikemišeditše go dira gore dilo di laolwe go fihla mafelelong a nako yeo a e beilego gore a kgoboketše gape dilo ka moka go Kriste, dilo tšeo di lego magodimong le dilo tšeo di lego lefaseng. Ee, dilo ka moka di kgoboketšwe pele ga Kriste, 11 gomme rena le yena, Modimo o re kgethile gore a re fe dilo tše dibotse tšeo a re tshepišitšego tšona, ka ge a ile a re kgetha e sa le pele ka go dumelelana le morero wa gagwe gore a dire dilo ka moka tšeo a nyakago go di dira, 12 gore Modimo a tumišwe le go tagafatšwa ka rena bao re bilego ba mathomo ba go dumela go Kriste. 13 Eupša ka morago ga gore le kwe lentšu la therešo, e lego ditaba tše dibotse tša mabapi le phološo ya lena, le ile la dumela go yena ke moka la swaiwa ka moya o mokgethwa wo Modimo a le holofeditšego wona, 14 woo a ilego a re kgonthišetša ka wona e sa le pele gore o tla re nea dilo tšeo a re tshepišitšego tšona. Modimo o dirile se gore a lokolle batho ba gagwe a diriša topollo gomme se sa dira gore a tumišwe.
15 Ka ge ke kwele ka tumelo yeo le nago le yona go Morena Jesu le tsela yeo le bontšhago gore le rata bakgethwa* ka moka, 16 ga ke tlogele go leboga Modimo ka baka la lena. Ke dula ke le rapelela, 17 gore Modimo wa Morena wa rena Jesu Kriste, yena Tate wa letago, a le thuše gore le be bohlale le go le utollela dilo tšeo di le thušago gore le kgone go mo tseba gabotse. 18 O ile a le bula mahlo gore le bone le go tseba kholofelo yeo a le bileditšego go yona le dilo tše dibotse kudu tšeo a di tshepišitšego bakgethwa, 19 le kamoo a bontšhago matla a gagwe a magolo go rena badumedi. Matla a a bonagala dilong tšeo a di dirilego, 20 ge a be a tsoša Kriste bahung gomme a mmea ka letsogong la gagwe le letona magodimong, 21 ka godimodimo ga mmušo o mongwe le o mongwe, bolaodi, matla, borena le leina le lengwe le le lengwe, e sego feela mo nakong ye,* eupša le nakong e tlago. 22 Le gona Modimo o mo neile matla a go laola dilo ka moka gomme a mo dira hlogo ya dilo ka moka ka phuthegong. 23 Phuthego yeo ke mmele wa Kriste, yeo a e tlatšago ka dika tša gagwe le go dira gore dilo ka moka di felele.