Puku ya Pele ya Samuele
21 Ka morago Dafida a tla Nobe go moperisita Ahimeleke. Ahimeleke a tšhoga ge a gahlana le Dafida gomme a re go yena: “Ke ka baka la’ng o tlile o nnoši o se wa tla le motho yo mongwe?” 2 Dafida a re go moperisita Ahimeleke: “Kgoši e kgopetše gore ke e direle selo se itšego, eupša e itše: ‘O se ke wa botša motho ka taba ye ke go romago ka yona le ka dilo tšeo ke go laetšego go di dira.’ Ke kwane le masogana a ka gore re gahlane lefelong le itšego. 3 Ge e ba o na le dinkgwa tše hlano, hle mphe tšona goba o mphe selo le ge e le sefe seo se lego gona.” 4 Eupša moperisita a re go Dafida: “Ga go na senkgwa se se tlwaelegilego, eupša go na le se sekgethwa feela. Ke tla go fa sona ge e ba masogana ao o nago le ona a se a robala le basadi.” 5 Dafida a re go moperisita: “Ga se ra robala le basadi go no swana le peleng ge ke be ke yo lwa dintwa. Ge e ba masogana a a ile a dula e le a makgethwa le ge a sa ye lesolong le lekgethwa, gona go ra gore lehono ke a makgethwa le go feta.” 6 Moperisita a mo nea dinkgwa tše kgethwa ka ge go be go se na dinkgwa tše dingwe ge e se feela seo se bego se neetšwe Modimo.* Senkgwa seo se be se tlošitšwe pele ga Jehofa gore legatong la sona go bewe senkgwa sa go fiša.
7 Yo mongwe wa bahlanka ba Saulo o be a le moo letšatšing leo ka ge a be a tlamegile go dula pele ga Jehofa. Leina la gagwe e be e le Doege wa Moedomo. E be e le yo mogolo wa badiši ba mehlape ya Saulo.
8 Dafida a re go Ahimeleke: “Na ga o na lerumo goba sabola? Ga se ka tšea sabola ya ka goba dibetša tša ka ka ge taba ya kgoši e be e akgofile.” 9 Moperisita yena a re: “Sabola ya Goliata, yena Mofilisita yo o mmolailego Moeding wa Elaa še e phuthetšwe ka seaparo, e širilwe ke efoda.* Ge e ba o nyaka go e tšea e tšee, ka gobane ga go na e nngwe mo ge e se yona.” Dafida a re: “Mphe yona, ka gobane ga go na ye e swanago le yona.”
10 Letšatšing leo, Dafida a tšhabela Saulo gomme a fihla go Kgoši Akishe wa Gathe. 11 Bahlanka ba Akishe ba re go yena: “Na yo ga se yena Dafida kgoši ya naga? Na ga se yena yo ba bego ba mo opelela e bile ba mminela ba re:
‘Saulo o bolaile ba dikete,
Dafida yena o bolaile ba dikete tše masome’?”
12 Dafida a naganišiša ka mantšu a gomme a thoma go boifa Akishe kgoši ya Gathe kudu. 13 Ge a le gare ga bona, a itira tše e kego o hlakane hlogo gomme a dira dilo tša botlaela ge a dutše a na le bona. O be a ngwapa mabati ao a lego keiting ya motse e bile a edišetša ditete ditedung tša gagwe. 14 Mafelelong Akishe a re go bahlanka ba gagwe: “Le a bona gore monna yo o a gafa. Ke ka baka la’ng le mo tliša go nna? 15 Na ke nyaka digaswi tše dingwe moo e bilego le ntlišeditše segaswi se gore se tlo nkgafela? Na monna yo o swanetše go tsena ka ntlong ya ka?”