Jesaya
25 Wena Jehofa, o Modimo wa ka.
Ke a go godiša e bile ke reta leina la gago,
Ka gobane o dirile dilo tše di kgahlišago,
O dirile seo o bego o se boletše,
Gomme wa bontšha gore o a tshepega.
2 O dirile gore motse o fetoge mokgobo wa maswika,
Wa dira gore motse wo o šireleditšwego o fetoge marope.
Motse wo o šireletšegilego wa batho ba ditšhaba tše dingwe o ka se sa ba gona,
E bile o ka se tsoge o tsošološitšwe gape.
3 Ke ka baka leo setšhaba seo se nago le matla se tlago go go tumiša,
Gomme motse wa setšhaba se sehlogo o tla go tšhaba.
4 O fetogile lefelo leo batho ba tlasana
Le badiidi ba ka tšhabelago go lona ge ba le tlalelong.
O lefelo leo ba ka tšhabelago ledimo,
Le moriti wo ba ka yago go wona ge go fiša.
Wena o a ba šireletša ge batho bao ba ba gatelelago ba ba hlasela go swana le pula ya matlakadibe ge e betha leboto.
5 O homotša lešata la manaba
Go no swana le ge moriti wa leru o timola phišo nageng yeo e omilego,
Le koša ya batho ba šoro
E tla homotšwa ka tsela yeo.
6 Jehofa wa madira o tla direla ditšhaba ka moka monyanya wa dijo tša maemo a godimo
Le wa beine e bosebose thabeng ye.
O tla ba nea dijo tše bose tšeo di apeilwego ka makhura a mohlware a makaonekaone
Le tšeo di nago le moko,
A ba nea le beine ya maemo a godimo.
7 Thabeng ye o tla tloša lešira leo le širilego merafo ka moka,
Le lešela leo le apešitšego ditšhaba ka moka.
8 Mmuši Morena Jehofa o tla metša lehu sa ruri,
Gomme o tla phumola megokgo difahlegong tša batho ka moka.
O tla dira gore batho ba gagwe ba se sa hlabišwa dihlong lefaseng ka moka,
Ka gobane Jehofa ka boyena o boletše seo.
9 Letšatšing leo batho ba tla re:
“Bonang! Yo ke Modimo wa rena.
Re tshepile yena,
Gomme o tla re phološa.
Yo ke Jehofa,
Re holofetše yena.
A re thabeng re be re thakgaleng, ka gobane ke yena a re phološago.”
10 Seatla sa Jehofa se tla šireletša thaba ye,*
Ge e le Moaba yona e tla gatakelwa mo e lego gona,
Go no swana le ge ngata ya mahlaka e gatakelwa moroleng.
11 O tla otlolla diatla tša gagwe a otla Moaba,
Go no swana le ge motho yo a ruthago a kgapha meetse ka diatla tša gagwe ge a rutha,
Gomme o tla kokobetša Moaba
A diriša diatla tša gagwe ka bokgoni.
12 O tla wiša motse wo o šireleditšwego
Gotee le maboto a wona a matelele a go o šireletša.
O tla o phušola a o wišetša fase leroleng.