Hesekiele

34 Jehofa o ile a bolela le nna gape a re: 2 “Morwa wa motho, porofetela badiši ba Isiraele o ba botše seo se tlago go ba diragalela. Porofeta o ba botše o re: ‘Mmuši Morena Jehofa o re: “Go madimabe lena badiši ba Isiraele bao ba iphepago! Na badiši ga se ba swanela go fepa mohlape? 3 Le ja makhura a diphoofolo ebile le apara diaparo tšeo di dirilwego ka boya bja nku. Le hlaba phoofolo e nonnego, eupša ga le fepe mohlape. 4 Ga se la matlafatša yeo e fokolago, ga se la fodiša yeo e babjago, yeo e gobetšego ga se la e tlema ka mašela, ga se la buša yeo e arogilego ebile ga se la ya go tsoma yeo e timetšego, eupša le di swara makgwakgwa le go di gatelela. 5 Ka gona di ile tša gašana ka ge di be di se na modiši. Ka ge di ile tša gašana, di ile tša fetoga dijo tša dibata ka moka tša nageng. 6 Dinku tša ka di be di ralala dithabeng ka moka le mebotong, di be di gašane gohle lefaseng, go se na motho yo a nyakanago le tšona goba yo a ikemišeditšego go di hwetša.

7 “‘“Ka gona lena badiši, ekwang lentšu la Jehofa. 8 ‘Mmuši Morena Jehofa o re: “Ke ikana ka nna Modimo yo a phelago gore ka ge dinku tša ka di ile tša fetoga dijo tša dibata ka moka tša nageng ka ge go be go se na modiši, gomme badiši ba ka ba se ba ya go di tsoma eupša ba ile ba dulela go iphepa ba se fepe dinku tša ka,”’ 9 gona lena badiši, ekwang seo Jehofa a se bolelago. 10 Mmuši Morena Jehofa o re: ‘Ke tla lwa le badiši, ebile ka dira gore ba ikarabele ka tsela yeo ba swarago dinku tša ka ka yona. Ka dira gore badiši bao ba se sa fepa dinku tša ka, ebile ba ka se sa iphepa. Ke tla hlakodiša dinku tša ka gore e se sa ba dijo tša bona.’”

11 “‘Mmuši Morena Jehofa o re: “Bjale nna ke tla tsoma dinku tša ka, gomme ka di hlokomela. 12 Ke tla di hlokomela go swana le modiši yo a hweditšego dinku tša gagwe tšeo di gašanego gomme a di fepa. Ke tla di phološa mafelong ka moka ao di bego di gašane go ona nakong ya ge go be go na le maru le leswiswi le leso. 13 Ke tla di ntšha ditšhabeng, ka di kgoboketša go tšwa dinageng, ka di tliša nageng ya tšona gomme ka di fepela dithabeng tša Isiraele, kgauswi le dinokana le kgauswi le mafelo ka moka ao batho ba dulago go ona mo nageng. 14 Ke tla di fudiša mafelong a mabotse, gomme di tla fula dithabeng tše ditelele tša Isiraele. Di tla robala lefelong le lebotse leo di fulago go lona, tša ba tša fula mafelong a mabotsebotse a dithabeng tša Isiraele.”

15 “‘Mmuši Morena Jehofa o re: “Nna ke tla fepa dinku tša ka gomme ka ba ka dira gore di robale. 16 Ke tla nyakana le yeo e timetšego, ka buša yeo e arogilego, yeo e gobetšego ka e tlema ka mašela ka ba ka matlafatša yeo e fokolago. Eupša ke tla fediša yeo e nonnego le yeo e nago le matla, ebile ke tla e ahlola.”

17 “‘Mmuši Morena Jehofa o re: “Lena dinku tša ka, ke tla ahlola dinku, ka ahlola dinku tše tona le diphooko. 18 Na ga se gwa lekana gore le fula mafelong a makaonekaone? Bjale na le nyaka le go gatakela ka dinao tša lena mafelo ka moka ao le fulago go ona? Le gona ka morago ga gore le nwe meetse a sekilego, na le swanetše go a šilafatša ka go a kgotlela ka dinao tša lena? 19 Bjale na le ra gore dinku tša ka di swanetše go fula mafelong ao le a gataketšego ka dinao tša lena di be di nwe meetse ao le a bilošitšego ka dinao tša lena?”

20 “‘Ka gona Mmuši Morena Jehofa o botša dinku tšeo o re: “Bjale nna ke tla ahlola nku e nonnego le e otilego, 21 ka ge le ile la dulela go kgorometša dinku ka moka tše di babjago ka mahlakore a lena le magetla a lena, la ba la di kgorometša ka manaka a lena go fihlela le di gašanyeditše ka ntle. 22 Ke tla phološa dinku tša ka gomme di ka se sa hlaselwa ke dibata, ebile ke tla ahlola dinku. 23 Ke tla di kgethela modiši o tee gore a di fepe, e lego Dafida mohlanka wa ka. Yena o tla di fepa ebile e tla ba modiši wa tšona. 24 Nna Jehofa ke tla ba Modimo wa tšona gomme mohlanka wa ka Dafida e tla ba kgošana gare ga tšona. Go boletše nna Jehofa.

25 “‘“Ke tla dira kgwerano ya khutšo le tšona, ka dira gore mo nageng go se sa ba le dibata tše šoro, e le gore dinku tša ka di dule di šireletšegile lešokeng ebile di robale dithokgweng. 26 Ke tla šegofatša tšona le mafelo ao a dikologilego mmoto wa ka, ka ba ka dira gore pula e ne ka nako ya gona. Ditšhegofatšo di tla tšhologa bjalo ka pula. 27 Mehlare ya nageng e tla enywa, naga yona ya mediša dibjalo, gomme dinku tša ka di tla dula di šireletšegile mo nageng. Ke moo di tlago go tseba gore ke nna Jehofa ge ke roba dijoko tša tšona gomme ke di phološa go bao ba bego ba di dirile makgoba. 28 Ditšhaba di ka se sa di hlasela, le dibata tša naga di ka se di je. Di tla dula di šireletšegile go se na yo a di tšhošago.

29 “‘“Ke tla di nea lefelo leo le tlago go tsebja ka dilo tšeo di melago go lona. Di ka se hlwe di bolawa ke tlala nageng, ebile di ka se sa gobošwa ke ditšhaba tše dingwe. 30 ‘Ke moo di tlago go tseba gore nna Jehofa Modimo wa tšona ke na le tšona ebile tšona ke batho ba ka, bona Baisiraele,’ o realo Mmuši Morena Jehofa.”’

31 “‘Ge e le lena dinku tša ka tšeo ke di hlokometšego, le no ba batho gomme nna ke Modimo wa lena,’ o realo Mmuši Morena Jehofa.”