Psalme
94 Wena Jehofa Modimo yo a itefeletšago go batho ba babe,
Bontšha letago la gago gomme o otle batho ba babe.
2 Ema hle Moahlodi wa lefase.
Otla baikgogomoši ka baka la dilo tše mpe tšeo ba di dirilego.
3 Wena Jehofa, ba babe ba tla thaba go fihla neng?
Ba babe ba tla tšwela pele ba thabile go fihla neng?
4 Dilo tšeo ba di bolelago di bontšha gore ke mašilo e bile ba a ikgantšha.
Batho ka moka bao ba dirago dilo tše mpe ba a itheta.
5 Wena Jehofa, ba gatelela batho ba gago,
E bile ba hlakiša batho ba gago.
6 Ba bolaya mohlologadi le batho ba go tšwa dinageng tše dingwe,
E bile ba bolaya bana bao ba se nago botatago bona.
7 Ba re: “Jah ga a di bone.
Modimo wa Jakobo ga a tsebe gore go diragala eng.”
8 Lena batho ba go hloka tlhaologanyo, le tla kwešiša neng?
Lena ditlaela, le tla kwešiša neng?
9 Na yo a dirilego tsebe a ka palelwa ke go kwa?
Goba na yo a bopilego leihlo a ka palelwa ke go bona?
10 Na yo a phošollago ditšhaba, a ka palelwa ke go kgalema?
Ke yena a dirago gore batho ba be le tsebo.
11 Jehofa o a tseba gore dilo tšeo batho ba di naganago
Di swana le mohemo feela.
12 Wena Jah, go thaba monna yo o mo phošollago
Le yoo o mo rutago molao wa gago,
13 Woo o mo thušago gore a dule a na le khutšo nakong ya ge a welwa ke mathata,
Go fihlela ge yo mobe a wela ka moleteng.
14 Ka gobane Jehofa a ka se lahle batho ba gagwe,
E bile a ka se tlogele batho ba gagwe.
15 Ka gobane baahlodi ba tla ahlola ka toka,
Gomme batho ka moka ba go loka ba tla kwa dikahlolo tšeo.
16 Ke mang yo a tlago go nkemelela go batho ba babe?
Ke mang yo a tlago go nthekga gore ke fenye batho bao ba dirago dilo tše mpe?
17 Ge nkabe Jehofa a se a nthuša,
Ka se sebaka nkabe ke hwile.
18 Ge ke be ke re: “Lenao la ka le a thelela,”
Wena Jehofa, lerato la gago le le botegago le ile la dula le nthekga.
19 Ge mathata a ka a be a nkimela,
O nkgothaditše gomme wa ntira gore ke thabe.
20 Na o ka dirišana le babuši ba babe,
Mola ba diriša molao gore ba bake mathata?
21 Ba hlasela moloki gasehlogo
Gomme ba latofatša motho yo a se nago molato gore a bolawe.
22 Eupša Jehofa e tla ba lefelo la ka leo ke ikutago go lona.
Modimo wa ka ke leswika la ka leo ke tšhabelago go lona.
23 O tla dira gore dilo tše mpe tšeo ba di dirago di boele go bona.
O tla diriša bobe bja bona go ba fediša.
Jehofa Modimo wa rena o tla ba tswalela melomo.