Hesekiele

1 Ka letšatši la bohlano, la kgwedi ya bone, ka ngwaga wa bo-30, ge ke be ke dula kgauswi le noka ya Kebara gare ga batho bao ba thopilwego, magodimo a ile a bulega gomme ka thoma go bona dipono tšeo di tšwago go Modimo. 2 Ka letšatši la bohlano la kgwedi yeo, e lego ka ngwaga wa bohlano wa ge Kgoši Jehoyakini a thopilwe, 3 Jehofa o ile a bolela le nna Hesekiele morwa wa moperisita Butsi ke le nageng ya Bakaladea nokeng ya Kebara. Ge ke le moo moya* wa Jehofa o ile wa tla go nna.

4 Ge ke be ke dutše ke lebeletše, ke ile ka bona phefo e matla e etšwa ka leboa, ka bona le leru le legolo le mollo o hwibitšego. Leru leo le be le dikologilwe ke seetša se se phadimago gomme gare ga mollo go be go na le selo seo se swanago le gauta yeo e tswakilwego le silifera. 5 Gare ga mollo woo go be go na le dilo tše di swanago le diphedi tše nne, gomme ka moka ga tšona di be di bopegile go swana le motho. 6 Sephedi se sengwe le se sengwe se be se na le difahlego tše nne, ebile se na le maphego a mane. 7 Maoto a diphedi tšeo a be a otlologile, gomme ka fase ga maoto a tšona go be go swana le ka fase ga tlhako ya namane, ebile a be a phadima bjalo ka koporo yeo e phadimišitšwego. 8 Diphedi tšeo di be di na le diatla tša motho ka tlase ga maphego a tšona ka mahlakoreng ka moka a mane, le gona ka moka ga tšona di be di na le difahlego le maphego. 9 Maphego a tšona a be a kgomana. Di be di sa retologe ge di sepela, se sengwe le se sengwe se be se eya thwii mo se bego se lebile gona.

10 Difahlego tša tšona di be di le ka mokgwa wo: Ka pele e be e le sefahlego sa motho, ka go le letona e le sefahlego sa tau, ka go le letshadi e le sefahlego sa poo gomme ka morago e le sefahlego sa ntšhu. 11 Difahlego tša tšona di be di le ka wona mokgwa woo. Maphego a diphedi tšeo a be a phurologetše godimo. Se sengwe le se sengwe se be se na le maphego a mabedi ao a bego a kgomane, a mangwe a mabedi a khupeditše mebele ya tšona.

12 Se sengwe le se sengwe sa diphedi tšeo se be se eya thwii mo se bego se lebile gona. Di be di eya kae le kae moo moya o di išago gona. Di be di sa retologe ge di sepela. 13 Diphedi tšeo di be di swana le magala. Le gona, go be go na le selo se sengwe seo se bego se swana le magala ao a tukago go swana le dirumula* se be se eya pele le morago gare ga diphedi tšeo, ebile moo mollong go be go etšwa magadima. 14 Ge diphedi tšeo di be di eya pele le morago, di be di swana le legadima.

15 Ge ke dutše ke lebeletše diphedi tšeo, ke ile ka bona go na le leotwana kgauswi le sephedi se sengwe le se sengwe seo se nago le difahlego tše nne. 16 Maotwana ao a be a phadima go swana le leswika le bohlokwa leo le bitšwago kirisolite, ebile maotwana ao a mane a be a swana. A be a bonagala bjalo ka ge eka leotwana le ka gare ga leotwana le lengwe. 17 Ge a sepela a be a kgona go ya ka mahlakoreng ka moka a mane ntle le gore a retologe. 18 Dirimi tša ona e be e le tše ditelele go ya godimo ka tsela e tšhošago, ebile di be di tletše mahlo gohle. 19 Ge diphedi tšeo di be di sepela, maotwana ao le ona a be a sepela le tšona, le gona ge diphedi tšeo di be di eya godimo, maotwana ao le ona a be a eya godimo. 20 Di be di eya kae le kae moo moya o di išago gona, ebile di eya le moo moya o yago gona. Maotwana a be a eya godimo gotee le tšona, ka gobane moya wo o bego o le dipheding tšeo o be o le le maotwaneng ao. 21 Ge diphedi tšeo di be di sepela, le maotwana ao a be a sepela, ge di ema tsii, le ona a be a ema, ge di eya godimo le ona a be a eya godimo le tšona, ka gobane moya wo o bego o le dipheding tšeo o be o le gona le maotwaneng ao.

22 Ka godimo ga dihlogo tša diphedi tšeo go be go na le selo se se swanago le leratadima le le phadimago bjalo ka lehlwa le le tšhošago, le be le ikadile ka godimo ga dihlogo tša tšona. 23 Maphego a tšona a be a eme thwii ka tlase ga leratadima leo, a kgomane. Sephedi se sengwe le se sengwe se be se na le maphego a mabedi ao a khupeditšego lehlakore le lengwe la mebele ya tšona, gomme a mangwe a mabedi a khupeditše lehlakore le lengwe. 24 Ge ke be ke ekwa modumo wa maphego a tšona ge di fofa, o be o kwagala bjalo ka modumo wa meetse a mantši ao a elelago, ebile o kwagala bjalo ka lentšu la Ramatlaohle. Ge diphedi tšeo di be di sepela di be di kwagala bjalo ka mašole. Ge di eme tsii, di be di theošetša maphego a tšona fase.

25 Go ile gwa kwagala lentšu ka godimo ga leratadima leo le bego le le ka godimo ga dihlogo tša tšona. (Ge di eme, di be di theošetša maphego a tšona fase.) 26 Ka godimo ga leratadima leo le bego le le ka godimo ga dihlogo tša tšona go be go na le selo se se swanago le leswika le bohlokwa leo le bitšwago safire, gomme selo seo se be se swana le setulo sa bogoši. Godimo ga setulo seo sa bogoši go be go bonagala selo se e kego ke motho. 27 Go tloga mathekeng a gagwe go ya godimo, ke ile ka bona selo se se phadimago bjalo ka gauta e tswakilwego le silifera, selo seo se be se swana le mollo. Le gona go tloga mathekeng a gagwe go ya fase ke ile ka bona selo se sengwe seo se swanago le mollo. O be a dikologilwe ke seetša se segolo. 28 Go be go na le selo se se swanago le molalatladi woo o bago marung letšatšing la ge pula e ena. Ye ke tsela yeo seetša seo se bego se mo dikologile se bego se le ka yona. Selo seo se be se swana le letago la Jehofa. Ya re ge ke se bona, ka khunama gomme ka kwa lentšu la motho yo a bolelago.